ខេត្តស្ទឹងត្រែង ៖ បុរសវ័យជាង៤០ឆ្នាំម្នាក់ ត្រូវបានកម្លាំងអធិការដ្ឋាននគរបាលស្រុកថាឡាបរិវ៉ាត់ចាប់ ខ្លួន បន្ទាប់ប៉ះទង្គិចក្នុងអំពើហិង្សាមួយ បណ្តាលអោយបុរសភាគីម្ខាងទៀតរងរបួសធ្ងន់ ។ ហេតុការណ៍នេះបានកើតឡើងកាលពីថ្ងៃទី១៥ មិថុនា ២០២០ ស្ថិតនៅភូមិវាលដេញឃុំអន្លង់ជ្រៃស្រុក ថាឡាបរិវ៉ាត់ខេត្តស្ទឹងត្រែង។
នគរបាលប៉ុស្តិ៍រដ្ឋបាលឃុំអន្លង់ជ្រៃអោយដឹងថា ជនសង្ស័យដែលកម្លាំងសមត្ថកិច្ចបានឃាត់ខ្លួនឈ្មោះ
ឈុន ដាំ អាយុ៤៣ឆ្នាំ ស្នាក់នៅកន្លែងកើតហេតុខាងលើ ។ ចំណែកជនរងគ្រោះឈ្មោះ ណៃ សេត ភេទប្រុសអាយុ៤៤ឆ្នាំ ស្នាក់នៅភូមិឃុំកើតហេតុខាងលើដូចគ្នារបួសត្រង់ក្បាលពោះ ។ ក្រោយរងរបួសត្រូវបានបញ្ជូនទៅកាន់មន្ទីពេទ្យបង្អែកខេត្ត ។
នគរបាលដដែលបន្តថា ទាក់ទិនករណីហិង្សាឈានទៅដល់មានអ្នករបួស និងឃាត់ខ្លួនផងនោះ តាមចម្លើយរបស់ជនសង្ស័យ គឺមូលហេតុដោយសារជនរងគ្រោះដើរមកដល់កន្លែងជនសង្ស័យកំពុងអង្គុយផឹកស្រា ហើយយកដំបងវាយលើក្បាលជនបង្ក និងច្របាច់កជនបង្កទាំងគ្មានរឿងអ្វីនឹងគ្នាសោះ ។
ភ្លាមៗនោះ ជនបង្កបានរើបំរះចាប់បោកជនរងគ្រោះទៅលើគ្រែ បណ្តាលអោយប៉ះនឹងកាំបិតចុងស្រួចរបួសចំពោះ តែម្តង។ ក្រោយហេតុការណ៍ខាងលើកម្លាំងនគរបាលប៉ុស្តិ៍រដ្ឋបាលបានឃាត់ខ្លួនជនសង្ស័យទៅសាកសួររួចបញ្ជូនទៅកាន់ស្នងការដ្ឋាននគរបាលខេត្តចាត់ការបន្តតាមនីតិវិធី ៕
ចែករំលែកព័តមាននេះ