ខេត្តសៀមរាប ៖ ទោះបីមានបញ្ហាជំងឺកូវីដ១៩ក្តី តែដំណើរការសាងសង់ព្រលានយន្តហោះអន្តរជាតិថ្មីខេត្តសៀមរាបបានដំណើរទៅមុខដោយរលូន ។ ការសាងសង់ក្រុមហ៊ុនមានកិច្ចសហការយ៉ាងជិតស្និតជាមួយក្រុមការងារបច្ចេកទេសរបស់រដ្ឋលេខាធិការដ្ឋានអាកាសចរណ៍ស៊ីវិល និងក្រុមហ៊ុនសាងសង់ ដោយផ្តោតសំខាន់ទៅនឹងការបំពាក់ឧបករណ៍បច្ចេកទេស និងរចនាបទអាកាសយានដ្ឋាន ។
ក្នុងដំណើរចុះទៅពិនិត្យការសាងសង់ព្រលានយន្តហោះថ្មីនេះ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល សង្ឃឹមថា ព្រលានយន្តហោះនេះបញ្ចប់តាមគម្រោង ។
អាកាសយានដ្ឋានអន្តរជាតិសៀមរាបអង្គរថ្មី (AIAI) បានផ្តើមចាប់សាងសង់កាលពីថ្ងៃទី១៥ ខែមិនា ឆ្នាំ២០២០ និងគ្រោងបញ្ចប់ការសាងសង់ឱ្យរួចរាល់ជាស្ថាពរនៅថ្ងៃទី១៤ ខែមិនា ឆ្នាំ២០២៣ ដោយប្រើពេលវេលាទាំងអស់៣៦ ខែ ។
អាកាសយានដ្ឋានអន្តរជាតិធំនៅលើទឹកដីអង្គរនេះ វិនិយោគដោយក្រុមហ៊ុនប្រទេសចិន ក្នុងទីតាំងនៅឃុំតាយ៉ែក ស្រុកសូទ្រនិគម ខេត្តសៀមរាប គឺស្ថិតនៅខាងកើតទីរួមខេត្តសៀមរាប ។ ព្រលានយន្តហោះអន្តរជាតិសៀមរាបថ្មីនេះនឹងចំណាយទុនវិនិយោគប្រមាណ ៩០០ លានដុល្លារ សាងសង់លើផ្ទៃដីប្រមាណ ៧០០ ហិកតា រួមជាមួយនឹងផ្ទៃដីនៃតំបន់សេដ្ឋកិច្ចពិសេសចំនួន១០០០ហិកតាទៀត ។
អាកាសយានដ្ឋានអន្តរជាតិថ្មីនៅសៀមរាបនេះសាងសង់ឡើង ដើម្បីឆ្លើយតបទៅនឹងកំណើនភ្ញៀវទេសចរបរទេសដែលមកទស្សនាអង្គវត្តកើនឡើងជាលំដាប់ និងដើម្បីបញ្ចៀសផលប៉ះពាល់ដល់ប្រាសាទអង្គវត្តពីការហោះហើរផងដែរ ។
តាមរយៈព្រលានយន្តថ្មី សៀមរាបមានលទ្ធភាពទទួលការហោះហើរដោយត្រង់ពីគ្រប់ជ្រុងនៃពិភព លោក ។
លោក លូ វី (Lu Wei) ប្រធានក្រុមប្រឹក្សាភិបាល ក្រុមហ៊ុន សាងសង់អាកាសយានដ្ឋានអន្តរជាតិសៀមរាបអង្គរក្នុងជំនួបជាមួយលោក លោក ម៉ៅ ហាវណ្ណាល់ កាលពីពាក់កណ្តាល ខែឧសភា មុននេះ ក៏បានអះអាងគម្រោងសាងសង់នេះនឹងបញ្ចប់តាមការគ្រោងទុកក្នុងរយៈពេលសាងសង់ ៣៦ ខែនោះ ៕
ចែករំលែកព័តមាននេះ