ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា យោធាម្នាក់ ក្រោយពីធ្លាក់ខ្លួនឈឺមួយរយៈ រហូតដល់ទទួលមរណភាពជាមួយនឹងភាពក្រៀមក្រំ ព្រោះមានតែកូនប្រុសស្រី៣នាក់ ហើយការធ្វើបុណ្យអាស្រ័យលើអ្នកស្រុកជួយជ្រុមជ្រែង សូម្បីថ្លៃមឈូស៣០ម៉ឺនរៀល ក៏ត្រូវរង់ចាំប្រមូលពីអ្នកភូមិចូលបច្ច័យឲ្យគេដែរ…
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា យោធាម្នាក់ ក្រោយពីធ្លាក់ខ្លួនឈឺមួយរយៈ រហូតដល់ទទួលមរណភាពជាមួយនឹងភាពក្រៀមក្រំ ព្រោះមានតែកូនប្រុសស្រី៣នាក់ ហើយការធ្វើបុណ្យអាស្រ័យលើអ្នកស្រុកជួយជ្រុមជ្រែង សូម្បីថ្លៃមឈូស៣០ម៉ឺនរៀល ក៏ត្រូវរង់ចាំប្រមូលពីអ្នកភូមិចូលបច្ច័យឲ្យគេដែរ ។ ហេតុការណ៍នេះ កើតឡើងនៅភូមិ-សង្កាត់ប៉ោយប៉ែត ក្រុងប៉ោយប៉ែត កាលពីថ្ងៃទី១៥ ខែមិថុនា ឆ្នាំ២០២0។
សេចក្តីរាយការណ៍បន្តថា ជនរងគ្រោះខាងលើឈ្មោះ ផៃ សុខឿន ភេទប្រុស អាយុ៥២ឆ្នាំ ស្នាក់នៅចំណុចកើតហេតុ ជាយោធាមានឋានន្តរស័ក្តិព្រិន្ទបាលឯក បំរើការងារនៅវរ៣៩៤ កងពលតូចអន្តរាគមន៍លេខ៩ នៃកងពលធំលេខ៣ ឈរជើងនៅបន្ទាត់ព្រំដែនស្រុកជាំក្សាន្ត ខេត្តព្រះវិហារ។
សេចក្តីរាយការណ៍បន្តថា យោធាខាងលើ បានទទួលមរណភាពដោយសារតែជំងឺសួតនៅមន្ទីរពេទ្យបង្អែក ក្រុងប៉ោយប៉ែត នាព្រឹកថ្ងៃទី១៥ មិថុនា ២០២០ ហើយត្រូវបានកូនៗដឹកយកទៅធ្វើបុណ្យក្នុងភូមិ-សង្កាត់ខាងលើ។
ពិធីបុណ្យសពនេះ មើលទៅហាក់ដូចសង្វេគណាស់ ព្រោះមានអ្នកចូលរួមប្រហែល១០នាក់ប៉ុណ្ណោះ ហើយចង្ក្រាន ចាន ឆ្នាំង ឬទីតាំងចុងភៅ មានត្រឹមកូនគ្រែតូចមួយ អ្នកស្រុកនាំគ្នាចិតបន្លែ និងដាំស្ល មានបាយ២កូនឆ្នាំងតូច សម្ល១កូនឆ្នាំប៉ុណ្ណោះ។ មិនត្រឹមតែប៉ុណ្ណោះ សូម្បីថ្លៃមឈូស៣០ម៉ឺនរៀលដែលយកចេញពីវត្តបាលិលេយ្យ ក៏កូនៗគ្មានប្រាក់ឲ្យគេគ្រប់ដែរ។
អ្នកស្រុក ក៏ដូចជាកូនៗជនរងគ្រោះ និយាយថា ថ្លៃមឈូសពេលគេដឹកដល់រោងបុណ្យប្រមូលប្រាក់ពីធុងដែលគេចូលបច្ច័យបានតែ២៧ម៉ឺនរៀល ចំណែគអ្នកដឹកមឈូសមិនទទួលយក ដោយប្រាប់ថា ចាំគ្រប់សិននឹងយកជាក្រោយ។
កូនៗសពជនរងគ្រោះនិយាយថា ដោយសារមួយរយៈនេះ ថៃបិទព្រំដែនសម័យកូវីដ១៩ ធ្វើឲ្យពួកគេគ្មានការងារធ្វើ ម្យ៉ាងស្របពេលមើលថែឪពុកឈឺរយៈពេល៣ខែ ទើបជួបរឿងខ្វះខាតជីវភាពគ្រួសារ។
ទោះជាយ៉ាងណា សពយោធាខាងលើ ត្រូវបានកម្លាំងអង្គភាពរបស់គាត់ មិនទុកឲ្យនៅឯកោនោះទេ បានយករថយន្តអង្គភាពមកដឹកពីក្រុងប៉ោយប៉ែត ទៅធ្វើបុណ្យបន្តនៅបន្ទាយ ឯស្រុកជាំក្សាន្ត ខេត្តព្រះវិហារទាំងយប់។
ជួបសម្ភាសន៍ផ្ទាល់លោកអនុសេនីយ៍ត្រី ខៀវ ចន្ធូ ដែលបានដឹកនាំកម្លាំងមកទទួលសពជនរងគ្រោះ បានប្រាប់កោះសន្តិភាពថា ជនរងគ្រោះជាកម្លាំងយោធាបំរើការងារនៅវរ៣៩៤ កងពលតូចអន្តរាគមន៍លេខ៩ ជាមួយលោកមែន។
លោកអនុសេនីយ៍ត្រីបន្តថា ជនរងគ្រោះបានធ្លាក់ខ្លួនឈឺមួយរយៈធំ តែកាលនៅព្យាបាលក្នុងអង្គភាពថ្នាក់ដឹកនាំក្នុងកងពល ក៏ដូចជាវរៈតែងតែជួបសួរសុខទុក្ខ និងនាំយកថវិការជួយឧបត្ថម្ភជាបន្តបន្ទាប់។ លុះជនរងគ្រោះធ្វើដំណើរមកលេងកូនៗនៅក្រុងប៉ោយប៉ែត ស្រាប់តែទទួលព័ត៌មានអកុសលថា ទទួលមរណភាពហើយ ។
ក្រោយទទួលព័ត៌មានថា ជនរងគ្រោះបាត់បង់ជីវិត ហើយថាកូនៗសុទ្ធតែមានជីវភាពខ្វះខាត ថ្នាក់ដឹកនាំក្នុងកងពលក៏ដូចជាវរៈក៏បានចាត់លោកដឹកនាំកម្លាំងមកទទួលសពជនរងគ្រោះទៅធ្វើបុណ្យឲ្យបានត្រឹមត្រូវនៅក្នុងអង្គភាព ពោលគឺឲ្យសាកសមនឹងគុណតម្លៃដែលជនរងគ្រោះបានតស៊ូបំរើជាតិមាតុភូមិជាយូរមកហើយ។
ពាក់ព័ន្ធនឹងតម្លៃមឈូស៣០ម៉ឺរៀលដែលអ្នកស្រុករអ៊ូរទាំថា ថ្លៃកប់ពពកនេះ បុរសឈ្មោះម៉ាន ដែលជាអ្នកបូជាសពនៅវត្តបាលិលេយ្យ ប្រាប់កោះសន្តិភាពថា ខណៈទៅទទួលថ្លៃមឈូសថា ៣០ម៉ឺនរៀលហ្នឹងថោកហើយ ។ ហើយថែមទាំងនិយាយថា មឈូស១គេលក់ថ្លៃ៤០ ឬ៤៥ ឬ៥០ម៉ឺនរៀល តែលោកថា មិនមែនមឈូសរបស់លោកទេ ពោលគឺគ្រាន់តែដឹកពីពីវត្តឲ្យគេនឹងទទួលបានថ្លៃដឹក២ឬ៣ម៉ឺនរៀលតែប៉ុណ្ណោះ៕ (កែសម្រួលដោយ ៖ បុប្ផា)
ចែករំលែកព័តមាននេះ