ផ្ទុះការឆ្លងវីរុសកូវីដ១៩ ចិនពង្រឹងការត្រួតពិនិត្យលើសាច់ និងត្រីសាលម៉ុន
ប្រទេសចិន ៖ ប្រទេសចិន កាលពីថ្ងៃទី១៥ មិថុនា បានពង្រឹងការត្រួតពិនិត្យ លើសាច់ និងបណ្ដាផលិតផលសមុទ្រ បន្ទាប់ពីការសង្ស័យលើការឆ្លងវីរុស COVID-19…
ប្រទេសចិន ៖ ប្រទេសចិន កាលពីថ្ងៃទី១៥ មិថុនា បានពង្រឹងការត្រួតពិនិត្យ លើសាច់ និងបណ្ដាផលិតផលសមុទ្រ បន្ទាប់ពីការសង្ស័យលើការឆ្លងវីរុស COVID-19 ក្នុងផ្សារលក់ស្បៀងដ៏ធំមួយ នៃក្រុងប៉េកាំង ដែលអាចក្លាយជាប្រភពនៃរលកឆ្លងថ្មី។
បន្ទាប់ពី២ខែ ពុំមានអ្នកឆ្លងណាម្នាក់ អ្នកឆ្លងវីរុសថ្មី៧៩នាក់ ត្រូវបានរាយការណ៍ ក្នុងរដ្ឋធានីចិនរយៈពេល២៤ម៉ោងចុងក្រោយនេះ ភាគច្រើនទាក់ទិននឹងផ្សារស៊ីនហ្វាឌី ជាផ្សារបោះដុំដ៏ធំមួយ នៃបណ្ដាផលិតផលស្បៀងនៅអាស៊ី ដោយមានឃ្លាំងនានា និងទីតាំងលក់ដែលលាតសន្ធឹង លើផ្ទៃដីដ៏ធំប៉ុនទីលានបាល់ទាត់១៦០។
ការរកឃើញក្នុងផ្សារនេះនូវដានវីរុស លើជ្រុញកាប់សាច់ត្រីសាលម៉ុនមួយ នាំឲ្យគេមានការភ័យខ្លាចដល់លទ្ធភាពនៃការចម្លង របស់បណ្ដាផលិតផលស្បៀង។ តាមផ្សារទំនើបធំៗនៅចិន គេបានដកយកចេញបណ្ដាផលិតផលពីត្រីសាម៉ុន និងផ្អាកការនាំចូលត្រីសាលម៉ុនអឺរ៉ុប។
សម្រាប់ពេលនេះអាជ្ញាធរចិន គូសបញ្ជាក់ថា បានយកគំរូពីបណ្ដាផលិតផលស្បៀង ដែលដាក់លក់នៅតាមទីផ្សារនានានៃក្រុងប៉េកាំង ទៅធ្វើតេស្តតែលទ្ធផលអវិជ្ជមាន។ ទោះបីយ៉ាងនេះក្ដីខេត្តកង់តុង ហ៊ឺណាន់ ហ៊ឺប៉ី និងហ៊ូណាន់ ព្រមទាំងក្រុងទៀនជីញ ក៏សម្រេចពង្រឹងការត្រួតពិនិត្យ។
ការត្រួតពិនិត្យម៉ឺងម៉ាត់ក្នុងបណ្ដាកំពង់ផែនឹងអាចនាំឲ្យមានការខ្វះនិងការយឹតយ៉ាវ ក្នុងការផ្ដល់និងអាចឲ្យតម្លៃស្បៀងឡើងថ្លៃខ្ពស់។ ចិនជាប្រទេស ទិញសាច់ធំជាងគេលើពិភពលោក ជាមួយការនាំចូលសាច់ប្រមាណជា ជិត៤លានតោនចាប់តាំងពីដើមឆ្នាំនេះមក៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ