ប្រទេសចិន ៖ រដ្ឋាភិបាលក្រុងប៉េកាំង បានសម្រេចផ្អាកព្រឹត្តិការណ៍កីឡាទាំងអស់ បន្ទាប់ពីមានករណីឆ្លងកូវីដ-១៩ថ្មី ត្រូវបានរាយការណ៍នៅក្នុងទីក្រុងនេះ។ នៅក្នុងសេចក្តីជូនដំណឹងជាសាធារណៈមួយកាលពីថ្ងៃសុក្រ របស់មជ្ឈមណ្ឌលរដ្ឋបាលការប្រកួតកីឡាក្រុងប៉េកាំងបានឱ្យដឹងថា «ដោយសារតែការផ្លាស់ប្តូរស្ថានភាពនៃការការពារ និងការរីករាលដាលនៃវីរុសកូវីដ-១៩…
ប្រទេសចិន ៖ រដ្ឋាភិបាលក្រុងប៉េកាំង បានសម្រេចផ្អាកព្រឹត្តិការណ៍កីឡាទាំងអស់ បន្ទាប់ពីមានករណីឆ្លងកូវីដ-១៩ថ្មី ត្រូវបានរាយការណ៍នៅក្នុងទីក្រុងនេះ។
នៅក្នុងសេចក្តីជូនដំណឹងជាសាធារណៈមួយកាលពីថ្ងៃសុក្រ របស់មជ្ឈមណ្ឌលរដ្ឋបាលការប្រកួតកីឡាក្រុងប៉េកាំងបានឱ្យដឹងថា «ដោយសារតែការផ្លាស់ប្តូរស្ថានភាពនៃការការពារ និងការរីករាលដាលនៃវីរុសកូវីដ-១៩ នៅទីក្រុងប៉េកាំង ព្រឹត្តិការណ៍កីឡាគ្រប់ប្រភេទទាំងអស់ នឹងត្រូវបានផ្អាកចាប់ថ្ងៃជូនដំណឹងតទៅ ដើម្បីកាត់បន្ថយហានិភ័យផ្សេងៗ ដែលអាចនឹងកើតមានដោយសារការប្រមូលផ្តុំ និងដើម្បីធានានូវសុខភាព និងសុវត្ថិភាពរបស់ប្រជាជន»។
យោងតាមកាសែត The Straits Times របស់សិង្ហបុរីបានរាយការណ៍ថា មាន ៤៤ ករណីឆ្លងថ្មី ត្រូវបានរកឃើញចេញពីផ្សារបោះដុំអាហារធំៗ ដែលបម្រើដល់ទីក្រុងប៉េកាំងផ្ទាល់ ។
ដោយឡែកសារព័ត៌មាន Channel News Asia ក៏បានឲ្យដឹងផងដែរថា វិស័យទេសចរណ៍នៅក្នុងទីក្រុងនេះត្រូវបានផ្អាកទាំងស្រុង ខណៈតំបន់ចំនួន ១១ ក្នុងក្រុងក៏ត្រូវបានបិទទ្វារជាបណ្តោះអាសន្នផងដែរ។
ក្នុងចំណោមព្រឹត្តិការណ៍កីឡា ដែលរងផលប៉ះពាល់ ក្នុងនោះក្រុមបាល់ទាត់ Beijing Sinobo Guoan លេងនៅក្របខណ្ឌកំពូលចិន Chinese Super ដែលមានមូលដ្ឋានក្នុងទីក្រុងប៉េកាំង បានសម្រេចលុបចោលការប្រកួតមិត្តភាព ដែលបានគ្រោងទុកជាមួយក្រុម Hebei China Fortune និង Shandong Luneng ។
យោងសារព័ត៌មាន China Daily បានរាយការណ៍ថា ក្រុម Beijing Sinobo Guoan ទើបតែវិលត្រឡប់ចូលទីក្រុងវិញ កាលពីថ្ងៃទី៨ ខែមិថុនា បន្ទាប់ពីបានបោះជំរុំហ្វឹកហាត់រយៈពេលមួយខែនៅខេត្ត Hebei ។ ខណៈលោក Bruno Genesio ដែលជាគ្រូបង្វឹកក្រុមនេះ នៅតែជាប់គាំងក្នុងប្រទេសកំណើត (បារាំង) ដោយសារការរឹតត្បិតការធ្វើដំណើរ ហើយបច្ចុប្បន្នលោកបានធ្វើការតាមរយៈវីដេអូ (videoconference) ដើម្បីទាក់ទងជាមួយកីឡាករ និងជំនួយការរបស់ខ្លួន៕ (ដកស្រង់ចេញពី Sportbusiness)
ចែករំលែកព័តមាននេះ