រាជធានីភ្នំពេញ ៖ ក្រោយពីតំណាងអយ្យការបើកការស៊ើបសួរអស់រយៈពេល៣ថ្ងៃ គឺនៅថ្ងៃទី១៤ ខែមិថុនា ឆ្នាំ២០២០ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនពាណិជ្ជកររកស៊ីទិញ-លក់ម៉ូតូនៅម្តុំអតីតរោងភាពយន្តគិរីរម្យ ចំនួន៥នាក់ ដាក់ពន្ធនាគារជាបណ្តោះអាសន្ន ពីបទ.ក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែង ។
ជនសង្ស័យមាន ១-ឈ្មោះ យូ ប៊ុនម៉េង ភេទប្រុស អាយុ៦៣ឆ្នាំ មុខរបរជាអ្នករត់ឯកសារ(ពន្ធគយ) ស្នាក់នៅផ្ទះជួល ផ្លូវបេតុង ភូមិទ្រា២ សង្កាត់ស្ទឹងមានជ័យ ខណ្ឌមានជ័យ ។ ២-ឈ្មោះ ហេង រិទ្ធី ភេទប្រុស អាយុ៣១ឆ្នាំ មុខរបរជាមន្ត្រីលេខាធិការដ្នានសាលាខណ្ឌកំបូល ស្នាក់នៅផ្ទះជួល ផ្លូវបេតុង សង្កាត់អូបែកក្អម ខណ្ឌសែនសុខ ។
៣-ឈ្មោះ ប៉ែន ធឿន ភេទប្រុស អាយុ៤៤ឆ្នាំ មុខរបរជាប្រធានការិយាល័យសាធារណៈ នឹងដឹកជញ្ជូនខណ្ឌ៧មករា ស្នាក់នៅផ្ទះគ្មានលេខ ផ្លូវបេតុង ភូមិកន្ទោក សង្កាត់កន្ទោក ខណ្ឌកំបូល និង៤-ឈ្មោះ អ៊ំ ឆៃយ៉ា ភេទប្រុស អាយុ២៧ឆ្នាំ មុខរបរជាមន្ត្រីជាប់កិច្ចសន្យា ស្នាក់នៅផ្ទះជួល ភូមិត្រពាំងឈូក សង្កាត់ទឹកថ្លា ខណ្ឌសែនសុខ និងម្នាក់ទៀតអត់ស្គាល់ឈ្មោះ ។ ក្នុងនោះដែរ ក៏មានមនុស្សមួយចំនួនកំពុងគេចខ្លួន ។
ទាក់ទិននឹងការឃុំខ្លួនមនុស្ស៥នាក់ និងតាមចាប់ខ្លួនបក្សពួកមួយចំនួនទៀតនោះ ប្រភពព័ត៌មានត្រូវបានគេដឹងថា កាលពីថ្ងៃទី១២ ខែមិថុនា កម្លាំងសមត្ថកិច្ចជំនាញការិយាល័យព្រហ្មទណ្ឌ នៃទីបញ្ជាការដ្ឋានកងរាជវុធហត្ថរាជធានីភ្នំពេញ បានធ្វើការឃាត់ជនសង្ស័យជាបន្តបន្ទាប់ចំនួន៥នាក់ តាមដីកាបញ្ជាឲ្យចូលខ្លួនរបស់ស្ថាប័នអយ្យការអមសាលាដំបូងរាជធានីភ្នំពេញ ពាក់ព័ន្ធករណីក្លែងឯកសារសាធារណៈ និងប្រើប្រាស់ឯកសារសាធារណៈក្លែង ក្រោមរូបភាពទិញ-លក់ម៉ូតូគេចវេសមិនបានបំពេញកាតព្វកិច្ចបង់ពន្ធជូនរដ្ឋ ដោយយោងតាមពាក្យបណ្តឹងរបស់អគ្គនាយកដ្ឋានគយ និងរដ្ឋករកម្ពុជា ។
ក្រោយពេលឃាត់ខ្លួនមនុស្សទាំង៥នាក់ សមត្ថកិច្ចកងរាជអាវុធហត្ថ បានបញ្ជូនជនសង្ស័យទៅអមសាលាដំបូងរាជធានីភ្នំពេញ ដូច្នោះពេលនោះ ស្ថិតនៅក្នុងដំណាក់កាលស្ថាប័នអយ្យការ បានបើកការស៊ើបសួរអស់រយៈពេល៣ថ្ងៃទើបធ្វើការចោទប្រកាន់ជាផ្លូវការ និងបានចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួន ពួកគេដាក់ពន្ធនាគារជាបណ្តោះអាសន្ន ។
ពាក់ព័ន្ធបទល្មើសខាងលើនេះ ត្រូវបានប្រភពព័ត៌មានបង្ហើបឲ្យដឹងទៀតថា ជនសង្ស័យបានឃុបឃិតគ្នាមានលក្ខណៈជាប្រព័ន្ធ នាំចូលម៉ូតូគេចពន្ធ និងទិញលក់ម៉ូតូដែលគ្មានបង់ពន្ធប្រមាណ៣៥៤ គ្រឿង រយៈពេលជាង១ឆ្នាំមកហើយ ដែលនោះជាការធ្វើឱ្យបាត់បង់ចំណូលរបស់រដ្ឋ ។
ប្រភពព័ត៌មានបន្តថា ហេតុអីបានជាម៉ូតូអត់ពន្ធយកទៅធ្វើស្លាកលេខបាន? ចម្លើយមិនក្បោះក្បាយថា ជនសង្ស័យមួយក្រុមនេះ មានជំនាញក្លែងឯកសារ ក្លែងពន្ធនាំចូល ដើម្បីបិទបាំងរដ្ឋបាលគយ ធ្វើស្លាកលេខម៉ូតូលក់ចេញទិញ-ចូលយ៉ាងស្ទាត់ជំនាញ ។ ករណីខាងលើនេះ កោះសន្តិភាពមិនធ្វើអត្ថាធិបាយឲ្យវែងឆ្ងាយទេ ដើម្បីទុកពេលឲ្យសមត្ថកិច្ច រួមទាំងស្ថាប័នតុលាការធ្វើកិច្ចការងារបន្ត ៕ (កែសម្រួលដោយ ៖ បុប្ផា)
ចែករំលែកព័តមាននេះ