ខេត្តបន្ទាយមានជ័យ ៖ មន្ត្រីគយ និងរដ្ឋាករក្រសួងសហការជាមួយមន្ត្រីពេទ្យសត្វ បានឃាត់រថយន្តដឹកមាន់រស់ខុសច្បាប់បាន៨៤០ក្បាល និងរថយន្តដឹកគ្រឿងក្នុងជ្រូកទំងន់២.១០០គីឡូក្រាម និងត្រូវបានយកទៅដុតចោលកាលពីថ្មីៗនេះ នៅចំណុចសង្កាត់កមពង់ស្វាយក្រុងសិរីសោភ័ណ។ លោក ហ៊ុយ…
ខេត្តបន្ទាយមានជ័យ ៖ មន្ត្រីគយ និងរដ្ឋាករក្រសួងសហការជាមួយមន្ត្រីពេទ្យសត្វ បានឃាត់រថយន្តដឹកមាន់រស់ខុសច្បាប់បាន៨៤០ក្បាល និងរថយន្តដឹកគ្រឿងក្នុងជ្រូកទំងន់២.១០០គីឡូក្រាម និងត្រូវបានយកទៅដុតចោលកាលពីថ្មីៗនេះ នៅចំណុចសង្កាត់កមពង់ស្វាយក្រុងសិរីសោភ័ណ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យបានប្រាប់ថា មុនពេលឃាត់រថយន្ត២គ្រឿងខាងលើនេះ គឺមន្ត្រីគយ និងរដ្ឋាករការិយាល័យ បានស្រាវជ្រាវបង្ក្រាបអំពើរត់ពន្ធតំបន់៥ ដោយបានស្រាវជ្រាវកំណត់មុខសញ្ញា ហើយក៏ឃាត់រថយន្តជាបន្តបន្ទាប់បានចំនួន២គ្រឿង ក្នុងនោះមាន១គ្រឿងម៉ាកហ៊ីយ៉ាន់ដាយកូរ៉េ ពាក់ស្លាក់លេខពោធិ៍សាត់ 3A.0905 ដែលដឹកមាន់រស់ចំនួន១២០តាកា ស្មើនឹងមាន់រស់ចំនួន៨៤០ក្បាល និងរថយន្តមួយគ្រឿងទៀតម៉ាក់នីស្សាន់ ពាក់ស្លាកលេខស្វាយរៀង 2A.3523 ដែលដឹកគ្រឿងក្នុងជ្រូកចំនួន៣៥កេស ស្មើនឹង២.១០០គីឡូក្រាម។
លោកបានបញ្ជាក់ថា ក្រោយពេលដែលឃាត់បានហើយ រថយន្តទាំង២គ្រឿងដែលដឹកមាន់រស់ និងគ្រឿងក្នុងជ្រូក បាននាំយកទៅការិយាល័យផលិតកម្ម និងបសុព្យាបាលខេត្ត ដើម្បីយកមាន់រស់ទៅពិនិត្យរយៈពេល២ទៅ៣ថ្ងៃ បើគ្មានជំងឺទេ មន្ត្រីជំនាញត្រូវធ្វើឯកសារផាកវិន័យតាមច្បាប់ ហើយធ្វើកិច្ចសន្យាឱ្យបញ្ឈប់សកម្មភាពនាំចូលមាន់ដោយខុសច្បាប់ ទៀត ។
ចំណែករថយន្តគ្រឿងក្នុងជ្រូកវិញ គឺបានដឹកដោយគ្មានច្បាប់ និងខុសលក្ខណៈបច្ចេកទេសទៀត ថែមទាំងគ្រឿងក្នុងជ្រូកទាំងនោះមានធុំក្លិនស្អុយផងនោះ ក៏ត្រូវបានសមត្ថកិច្ចយកទៅដុតកំទេចចោលនៅចំណុចសង្កាត់កំពង់ស្វាយ ក្រុងសិរីសោភ័ណផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ