រាជធានីភ្នំពេញ ៖ ជាមួយនឹងការប្ដេជ្ញាចិត្តឈរកំពូលតារាងមេដាយក្នុងពេលធ្វើម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣១ ឆ្នាំ២០២១ នាទីក្រុងហាណូយឲ្យបាននោះ វៀតណាមមិនបានរំសាយកីឡាករ កីឡាការិនីរបស់ខ្លួនពីជំរំហ្វឹកហាត់ឡើយ ទោះបីមេរោគផ្លូវដង្ហើមប្រភេទថ្មី(កូវីដ-១៩)កំពុងតែរាតត្បាតទូទាំងពិភពលោកក៏ដោយ ។
ឆ្នាំ២០២១វៀតណាមនឹងបង្ហាញអំនួតអត្តពលិករបស់ខ្លួនដែលកំពុងតែមានការប្រែប្រួលរីកចម្រើនកាន់តែខ្លាំងពិសេសលើប្រភេទកីឡាបាល់ទាត់ ។ កាលពីឆ្នាំ២០០៣វៀតណាមធ្លាប់ធ្វើជាម្ចាស់ផ្ទះព្រឹត្តិការណ៍ប្រកួតកីឡាស៊ីហ្គេមម្ដងហើយដែលកាលនោះប្រភេទកីឡាបាល់ទាត់ថៃប្រជែងបានតំណែងជើងឯកចំពោះម្ចាស់ផ្ទះវៀតណាមបានត្រឹមជើងឯករងប៉ុណ្ណោះ ។
ឆ្នាំ២០០៣ វៀតណាមបានដាក់កីឡាចំនួន៣២ប្រភេទដែលមានចំនួន៤៤២វិញ្ញាសាឲ្យប្រកួត តែសម្រាប់ស៊ីហ្គេមឆ្នាំ២០២១ខាងមុខនេះ វៀតណាមគ្រោងដាក់កីឡាចំនួនពី៣៦ទៅ៤០ប្រភេទឲ្យប្រកួត ជាមួយក្ដីរំពឹងទុកជាមុនថាពានបាល់ទាត់ស៊ីហ្គេមគឺម្ចាស់ផ្ទះជាអ្នកលើកវិញហើយ ។ ប្រភេទកីឡាបាល់ទាត់នេះកាលពីឆ្នាំ២០០៣វៀតណាមស្ថិតក្នុងពូលជាមួយថៃ ឥណ្ឌូណេស៊ី និងឡាវ ។ លេងក្នុងពូលក្រុមទាំង២នេះ(វៀតណាម និងថៃ)ប្រកួតស្មើគ្នា១ទល់១ តែក្នុងជំនួបផ្ដាច់ព្រ័ត្រថៃឈ្នះវៀតណាម២ទល់១ហើយក្លាយជាក្រុមជើងឯក ឯវៀតណាមបានត្រឹមជើងឯករងប៉ុណ្ណោះ ។
ចំពោះប្រទេសម៉ាឡេស៊ីបានចំណាត់ថ្នាក់លេខ៣ក្នុងខណៈដែលក្រុមប្រទេសមីយ៉ាន់ម៉ាបានចំណាត់ថ្នាក់លេខ៤ ។សម្រាប់លើកនេះវៀតណាមរំពឹងថា ប្រវត្តិសាស្ត្រនឹងប្រែប្រួលព្រោះវៀតណាមត្រៀមខ្លួនរង់ចាំការមកដល់នៃព្រឹត្តិការណ៍បានយ៉ាងល្អ ។ សូម្បីតែសព្វថ្ងៃនេះក៏វៀតណាមពុំបានរំសាយពីការហ្វឹកហាត់ដែរ ។
ស៊ីហ្គេមឆ្នាំ២០២១ វៀតណាមនឹងធ្វើពិធីបើកនៅថ្ងៃទី២១ វិច្ឆិកា និងបិទនៅថ្ងៃទី២ ធ្នូ ។ ទាំងពិធីបើកទាំងពិធីបិទនឹងធ្វើនៅពហុកីឡដ្ឋានMY Binh Stadium Station ៕ (កែសម្រួលដោយ ៖ បុប្ផា)
ចែករំលែកព័តមាននេះ