កូវីដ-១៩ ៖ កូវីដ១៩ បានបន្តគំរាមកំហែងប្រទេសកម្ពុជា ជាមួយនឹងការរកឃើញមនុស្ស ពីរនាក់ថ្មីទៀត ដែលនាំចូលមេរោគនេះមកពីប្រទេសឥណ្ឌូនេស៊ីដោយតម្រូវឲ្យកម្ពុជាបង្កើនការប្រយ័ត្នគ្រប់ពេល។ កម្ពុជាត្រូវបានចាត់ទុកថា ជាប្រទេសមួយជោគជ័យនៅក្នុងការប្រឆាំងកូវីដ-១៩ រហូតមកដល់ពេលនេះ ដោយសារតែការព្យាបាលជាស្ទើរទាំងអស់ និងគ្មានអ្នកស្លាប់ដោយ សារមេរោគដ៏សាហាវនេះឡើយ រហូតមកដល់ពេលនេះ។
ប៉ុន្តែការវិវត្តរយៈពេលក្រោយនេះ ទំនងជាចង្អុលបង្ហាញថា កម្ពុជានៅតែប្រឈមមុខខ្ពស់នឹងការរាលដាលមេរោគកូវីដ-១៩ ដែលបានឆ្លងដល់មនុស្សជិត៨លាននាក់ និងសម្លាប់មនុស្សជាងបួនសែននាក់ក្នុងពិភពលោក។ ខណៈដែលកូវីដ-១៩ នៅប្រទេសខ្លះក្នុងពិភពលោក បានថមថយ ប្រទេសមួយចំនួនទៀតកំពុងតែរងការវាយប្រហារយ៉ាងខ្លាំងដូចជាប្រទេសឥណ្ឌាជាដើម។
ចំណែកប្រទេសកម្ពុជាយើង ស្ថានភាពកូវីដ-១៩ នៅតែមិនអាចទស្សន៍ទាយបាន ចំពោះអនាគត បើទោះបីជារហូតមកដល់ពេលនេះកម្ពុជាបានធ្វើការងារ បានយ៉ាងល្អនៅក្នុងការទប់ស្កាត់មេរោគដ៏សាហាវនេះក្តី។ ការប្រឈមមុខខ្លាំង គឺការនាំចូលជំងឺកូវីដ-១៩ មកពីខាងក្រៅ ខណៈដែលការធ្វើដំណើរតាមយន្តហោះ មកកម្ពុជាហាក់ដូចជាកម្រើកឡើងវិញ។ ក្រសួងសុខាភិបាលបានឲ្យដឹងនៅថ្ងៃទី១៤ ខែមិថុនា ឆ្នាំ២០២០ថា ខ្លួន បានរកឃើញអ្នកឆ្លងជំងឺកូវីដ-១៩ ចំនួន២ថ្មីបន្ថែមទៀត។
បុរសដែលឆ្លងជំងឺកូវីដ-១៩ ជាជនជាតិខ្មែរមានអាយុ ២៩ឆ្នាំ និងបុរសជនជាតិខ្មែរមាន អាយុ២២ឆ្នាំ មានអាសយដ្ឋាននៅខេត្តកំពង់ចាមទាំងពីរនាក់។ ទាំងពីរនាក់នេះ បានធ្វើដំណើរ ពីប្រទេសឥណ្ឌូនេស៊ីតាមជើងហោះហើរត្រង់មកកាន់ប្រទេសកម្ពុជានៅថ្ងៃទី១២ ខែមិថុនា ឆ្នាំ២០២០ ហើយបច្ចុប្បន្នអ្នកទាំងពីរត្រូវបានដាក់ ឲ្យសម្រាកព្យាបាល នៅមន្ទីរ ពេទ្យមិត្តភាពខ្មែរ-សូវៀត រួចហើយ។ ការរកឃើញករណីនាំចូលពីរនាក់ថ្មីនេះគឺកើតមានបន្ទាប់ពី កន្លងកម្ពុជាបានរកឃើញ ករណីនាំចូលពីប្រទេសបារាំង និងថៃផងដែរ។
ដោយពិនិត្យទៅលើការរកឃើញទាំងនេះ ការនាំចូល កូវីដ-១៩ ពីក្រៅប្រទេស គឺជាបញ្ហា ប្រឈមមួយដែលគំរាមកំហែងដល់កម្ពុជាគ្រប់ពេលវេលា ហើយតម្រូវឲ្យកម្ពុជា ចាត់វិធានការយ៉ាងម៉ឺងម៉ាត់ដើម្បីទប់ស្កាត់ឲ្យបានមានប្រសិទ្ធិភាពចំពោះការនាំចូលកូវីដ-១៩ ពីក្រៅប្រទេស៕ ដោយ ៖ សហការី
ចែករំលែកព័តមាននេះ