រាជធានីភ្នំពេញ ៖ ទន្ទឹមនឹងកសិផលជាច្រើនប្រភេទក្នុងខេត្តនាំចេញទៅកាន់ទីផ្សារប្រទេសជិតខាងមានការពិបាក ឬកកស្ទះដោយសាររបាំងបច្ចេកទេសនៃការនាំចូល ។ ថ្មីៗនេះកម្ពុជាក៏ទទួលបានការឆ្លើយតប ឬចម្លើយជាបឋម ពីភាគចិនថាសំណើរនាំចេញមៀនប៉ៃលិនបាននិងកំពុងពិនិត្យលើឯកសារនេះ។ នៅក្នុងជួបសំណេះសំណាល និងពិភាក្សាការងារជាមួយសហគមន៍មៀនប៉ៃលិន…
រាជធានីភ្នំពេញ ៖ ទន្ទឹមនឹងកសិផលជាច្រើនប្រភេទក្នុងខេត្តនាំចេញទៅកាន់ទីផ្សារប្រទេសជិតខាងមានការពិបាក ឬកកស្ទះដោយសាររបាំងបច្ចេកទេសនៃការនាំចូល ។ ថ្មីៗនេះកម្ពុជាក៏ទទួលបានការឆ្លើយតប ឬចម្លើយជាបឋម ពីភាគចិនថាសំណើរនាំចេញមៀនប៉ៃលិនបាននិងកំពុងពិនិត្យលើឯកសារនេះ។
នៅក្នុងជួបសំណេះសំណាល និងពិភាក្សាការងារជាមួយសហគមន៍មៀនប៉ៃលិន ដើម្បីស្វែងរកដំណោះស្រាយលើបញ្ហាទីផ្សារដែលសហគមន៍បាននិងកំពុងជួបប្រទះ នៅថ្ងៃទី១៤ មិថុនានេះ លោក ផាន់ ចាន់ធុល អភិបាលនៃគណអភិបាលខេត្តប៉ៃលិនមានប្រសាសន៍ថា កសិផលជាច្រើនប្រភេទដែលខេត្តប៉ៃលិនមានលទ្ធភាពផលិតបានមាន ពោតក្រហម ដំឡូងមី សណ្តែកសៀង មៀនប៉ៃលិន មៀនក្រអូប ស្វាយ ក្រូចពោធិសាត់ សាវម៉ាវ ទុរេន ខ្នុរ ទៀប ត្របែក និងកៅស៊ូ លើផ្ទៃដីសរុប ៦៩.២៤៦ហិកតា។
លោក ផាន់ ចាន់ធុល មានប្រសាសន៍ថា « ការនាំចេញកសិផលរបស់ខេត្តទៅកាន់ទីផ្សារថៃ មានដំឡូងមី ពោត ក្រហម និងមៀនប៉ៃលិន កំពុងកកស្ទះដោយសាររបាំងបច្ចេកទេសនៃប្រទេសនាំចូល ហើយទន្ទឹមនិងនេះបច្ចុប្បន្នខេត្ត ក៏ដូចជាវិនិយោគិនខ្វះទុនសម្រាប់សាងសង់រោងចក្រកែច្នៃជាផលិតផលសម្រេច រោងសម្ងួត វេចខ្ចប់ និងឃ្លាំងស្តុក ដែលកិច្ចការនេះទាមទារការវិនិយោគដើម្បីជួយជំរុញកសិផលរបស់ខេត្តមានទីផ្សារទាំងផលិតផលស្រស់ និងកែច្នៃ»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទបានលើកឡើងថា ក្រសួងដែលមានអគ្គនាយកដ្ឋានកសិកម្មជាសេនាទិការកំពុងពុះពារ ជំរុញ និងចរចារជាមួយភាគីចិនយ៉ាងយកចិត្តទុកដាក់ និងស៊ីជម្រៅទាំងការងារបច្ចេកទេស និងលក្ខខណ្ឌតម្រូវភូតគាមអនាម័យ សំខាន់ៗដែលភាគីនាំចេញ (កម្ពុជា) ត្រូវបំពេញឱ្យខាងតែបាន។
លោករដ្ឋមន្ត្រីវេង សាខុន គូសបញ្ជាក់ថា«ថ្មីៗនេះ ក្រសួងបានទទួលចម្លើយបឋមពីភាគីចិនថាករណីសំណើនាំចេញមៀនប៉ៃលិន ភាគីចិនបាននិងកំពុងពិនិត្យលើឯកសារសំណើនេះតាំងពីខែមិថុនា ឆ្នាំ២០១៩ ហើយសង្ឃឹមថាឯកសារសំណើនេះនឹងត្រូវបានអនុម័តក្រោយពេលពិធីសារនាំចេញស្វាយស្រស់កម្ពុជា ដែលបានផ្លាស់ប្តូររវាងភាគីទាំងពីរកាលពីសប្តាហ៍មុនអនុវត្តបានរលូនជាមុនសិន»។
ដើម្បីបំពេញលក្ខខណ្ឌតម្រូវរបស់ភាគីចិន លោករដ្ឋមន្ត្រី បានបង្ហាញទៅដល់ប្រជាពលរដ្ឋដែលជាសមាជិកសហគមន៍មៀនប៉ៃលិនដោយសង្ខេបអំពីការងារបច្ចេកទេសរួមមានការងារដាំដុះ ថែរក្សា ការពារសត្វចង្រៃ ការប្រើជី និងថ្នាំពុលកសិកម្មសម្រាប់កម្ចាត់សត្វល្អិត បច្ចេកទេសក្រោយពេលប្រមូលផល ជាពិសេសការអនុវត្តកសិកម្មល្អ នៅនឹងចម្ការផ្ទាល់ និងការអនុវត្តកន្លែងកែច្នៃល្អ ។
តាមរបាយការណ៍របស់លោកប្រធានសហគមន៍មៀនខេត្តប៉ៃលិនបានឲ្យដឹងថា បច្ចុប្បន្នមៀនប៉ៃលិនមានផ្ទៃដីដាំដុះសរុបទូទាំងខេត្តប្រមាណជា ៣.២៥០ ហិកតាបានផ្តល់ទិន្នផលបានជាង ៣២. ៥០០តោនក្នុងមួយឆ្នាំ ដែលផលិតកម្មមួយនេះបានបង្កើតការងារជូនប្រជាជននៅមូលដ្ឋានបានរាប់ពាន់ នាក់។ ក្រៅពីលក់មៀនស្រស់ សហគមន៍ក៏មានរៀបចំខ្សែរច្រវាក់ផលិតកម្មកែច្នៃជាលក្ខណតូច និងមធ្យម។
លោកបន្តថាបច្ចុប្បន្ននេះ សហគមន៍បាននិងកំពុងជួបប្រទះបញ្ហាសំខាន់ៗដែលសហគមន៍បានស្នើសុំដល់លោករដ្ឋមន្ត្រី និងស្ថាប័នពាក់ព័ន្ធមេត្តាជួយអន្តរាគមន៍ដោះស្រាយឱ្យបានទាន់ពេលវេលា និងមានប្រសិទ្ធភាព ក្នុងនោះមាន ៖ ទី១-ការលំបាកក្នុងការនាំចេញផលិតផលមៀនប៉ៃលិនកម្ពុជាទៅកាន់ទីផ្សារបរទេស ។ ទី២-នីតិវិធីក្នុងការចុះបញ្ជីចម្ការមៀនឱ្យស្របតាមគោលការណ៍នៃការអនុវត្តកសិកម្មល្អ និង
ទី៣-នីតិវិធីស្នើសុំបញ្ជាក់គុណភាព ISO។
បើយោងតាមរបាយការណ៍របស់អគ្គនាយកដ្ឋានកសិកម្មបានបញ្ជាក់ថា« នៅឆ្នាំ២០១៩ នៅទូទាំងប្រទេសផ្ទៃដីដាំមៀនប៉ៃលិនមានចំនួន ៨. ៩២៥ហិកតា ៕
ចែករំលែកព័តមាននេះ