រាជធានីភ្នំពេញ ៖ ស្ត្រីចំណាស់ម្នាក់មានជំងឺគីសក្នុងស្បូន ហើយបានឱ្យប្អូនស្រី២នាក់ទៀតជូនទៅកាន់មន្ទីរពេទ្យ ដោយជិះម៉ូតូ១គ្រឿងឌុបគ្នា៣នាក់ ដោយស្ត្រីរូបនោះជិះក្រោយគេ ខណៈពេលកំពុងជិះម៉ូតូឆ្លងផ្លូវស្រាប់តែមានរថយន្តបែនដឹកថ្ម ពណ៌ត្រេអុី បើកបរក្នុងល្បឿនលឿនមកដល់កៀរម៉ូតូពីក្រោយ បណ្ដាលឲ្យដួលខ្ទាតស្ត្រីរូបនោះចូលក្រោមកង់កិនក្បាលនិងមួកការពារសុវត្ថិភាពធ្លាយខួរបាត់បង់ជីវិតភ្លាមៗនៅនឹងកន្លែងគួរឲ្យសង្វេគបំផុត ចំណែកប្អូនស្រីទាំង២នាក់រួចផុតពីគ្រោះថ្នាក់ ចំណែករថយន្តបង្កហេតុបានបើកគេចបាត់ស្រមោល។
ហេតុការណ៍ខាងលើនេះបានកើតឡើងកាលពីវេលាម៉ោង៧ព្រឹកថ្ងៃទី១៤ ខែមិថុនា ឆ្នាំ២០២០ នៅលើកំណាត់មហាវិថីឈ្នះឈ្នះ ត្រង់ចំណុចខ្លោងទ្វារវត្តពោធិ៍វ័ន ស្ថិតនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះម្នាក់ដែលបាត់បង់ជីវិតខាងលើនោះឈ្មោះ នៅ ញ៉េន អាយុ៥៩ឆ្នាំ មានទីលំនៅក្នុងភូមិត្រពាំងសុព័រ ឃុំឆក់ឈើនាង ស្រុកអង្គស្នួល ខេត្តកណ្ដាល ។ ចំណែករថយន្តបែនដឹកថ្មមួយគ្រឿង ពណ៌ត្រេអុី មិនចាំស្លាកលេខឡើយ។
តាមប្រភពពីក្រុមគ្រួសារបានឲ្យដឹងថា មុនពេលកើតហេតុ ស្ត្រីរងគ្រោះរួមនឹងប្អូនស្រី២នាក់ទៀតបានជិះម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ធុនសេ១២៥ ស៊េរីឆ្នាំ២០១៩ ពាក់ស្លាកលេខ ភ្នំពេញ 1HK-3468 ឌុបគ្នា៣នាក់ដើម្បីទៅកាន់មន្ទីរពេទ្យពិនិត្យនិងព្យាបាល ព្រោះស្ត្រីរងគ្រោះមានជំងឺគីសក្នុងស្បូន ពេលនោះប្អូនស្រីម្នាក់ជាអ្នកឌុប ម្នាក់ទៀតជាអ្នកជិះកណ្ដាល រីឯស្ត្រីរងគ្រោះបានជិះពីក្រោយប្អូនស្រីទាំង២នាក់ ហើយក៏ជួបគ្រោះអកុសលបែបនេះតែម្ដង ។ ពាក់ព័ន្ធនឹងករណីនេះ ពួកគាត់បានស្នើសុំឲ្យនគរបាលជួយធ្វើការស្រាវជ្រាវរករថយន្តបង្កនោះចាត់ការតាមច្បាប់ ដើម្បីផ្ដល់យុត្តិធម៌ជូនព្រលឹងជនរងគ្រោះផងដែរ។
តាមប្រភពពីអ្នកភូមិបាននិយាយថា មុនពេលកើតហេតុ ពួកគាត់បានឃើញជនរងគ្រោះរួមនឹងប្អូនស្រី២នាក់ទៀតជិះម៉ូតូឌុបគ្នាធ្វើដំណើរក្នុងទិសដៅពីលិចទៅកើតតាមផ្លូវបេតុងវត្តពោធិ៍វ័ន លុះពេលទៅដល់មហាវិថីឈ្នះឈ្នះ ក៏បានឆ្លងផ្លូវ រួចបត់ឆ្វេងដៃឆ្ពោះទៅទិសខាងជើងវិញ។
តាមប្រភពដដែលបានបន្តថា ស្របពេលនោះមានរថយន្តបែនដឹកថ្មមួយគ្រឿងខាងលើបានបើកបរក្នុងល្បឿនយ៉ាងលឿនក្នុងទិសដៅពីត្បូងទៅជើងមកដល់ ដោយឃើញស្ត្រីទាំង៣នាក់កំពុងជិះម៉ូតូហើយ រថយន្តនោះមិនព្រមបន្ថយល្បឿនទេ ទើបជ្រុលទៅកៀរម៉ូតូពីក្រោយ បណ្ដាលឲ្យដួលនិងខ្ទាតស្ត្រីរងគ្រោះដែលជិះក្រោយគេខ្ទាតចូលក្រោមរថយន្តកិនបែកក្បាល ព្រមទាំងបែកមួកការពារសុវត្ថិភាពធ្លាយខួរបាត់បង់ជីវិតភ្លាមៗនៅនឹងកន្លែង។
តាមប្រភពដដែលបានបន្តទៀតថា ក្រោយពេលកើតហេតុ រថយន្តបង្កបានជាន់ហ្គាររោទិ៍ម៉ាសុីនបន្ថែមល្បឿនលាន់យ៉ាងកក្រើកគេចបាត់ស្រមោល ខណៈដែលស្ត្រីជាប្អូនទាំង២នាក់រវល់តែយំសោកនិងមើលសពបងស្រី ដោយមិនបានដេញតាមនោះ ។ បន្ទាប់មកនគរបាលប៉ុស្តិ៍សំរោងក្រោមបានចុះទៅសម្រួលចរាចរណ៍មិនឲ្យមានការកកស្ទះនិងបានរាយការណ៍ជូននគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញធ្វើការវាស់វែងនិងចាត់ការបន្ត៕
ចែករំលែកព័តមាននេះ