ខេត្តព្រះសីហនុ ៖ ស្នងការដ្ឋាននគរបាលខេត្តព្រះសីហនុ បានចេញសេចក្តីបំភ្លឺតបទៅបណ្តាញសង្គមហ្វេសប៊ុក ចំពោះករណីបានបង្ហោះថា មានមន្ត្រីនគរបាលខេត្តព្រះសីហនុម្នាក់ ទំនងជាបែកថ្នាំ ហើយយកឯកសណ្ឋានរបស់ខ្លួន ទៅបោះចោលនៅការ៉ាស់សាំង សូគីមិច ក្រុងព្រះសីហនុ កាលពីពេលថ្មីៗនេះ..។
សូមបញ្ជាក់ថា កាលពីព្រឹកថ្ងៃទី១១ ខែមិថុនា ឆ្នាំ២០២០ មានគណនេយ្យហ្វេសប៊ុកឈ្មោះ Chum Phearum បានបង្ហោះរៀបរាប់ថា ៖ «មានករណីភ្ញាក់ផ្អើលនឹងមន្ត្រីនគរបាលខេត្តព្រះសីហនុម្នាក់ ដែលទំនងជាបែកថ្នាំបានយកខោអាវនគរបាលរបស់ខ្លួនមកបោះចោលនៅការ៉ាស់សាំង sokimex និង Tela ស្ថិតក្នុងសង្កាត់៣ ខេត្ត-ក្រុងព្រះសីហនុ រួចឡើងឡានក្រុងចេញទៅបាត់»។
ករណីនេះ ស្នងការដ្ឋាននគរបាលខេត្តព្រះសីហនុ បានបំភ្លឺថា អតីតមន្ត្រីនគរបាលរូបនេះ ត្រូវបានលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានដាក់បទបញ្ជាឲ្យការិយាល័យបុគ្គលិក ធ្វើការណែនាំជាច្រើនដងរួចមកហើយ និងបានធ្វើការបណ្តេញចេញពីក្របខ័ណ្ឌនគរបាលជាតិ នៃស្នងការដ្ឋាននគរបាលខេត្តព្រះសីហនុរួចហើយផងដែរ។
ូចបានជំរាបជូនខាងលើនេះ ស្នងការដ្ឋាននគរបាលខេត្តព្រះសីហនុ សូមជូនព័ត៌មានដល់សាធារណជនទូទៅ ឲ្យបានជ្រាបជាដំណឹង និងកុំឲ្យមានមន្ទិលសង្ស័យតទៅទៀត។
សូមបញ្ជាក់ថា នៅលើឯកសណ្ឋាន ឬហោប៉ៅអាវប៉ូលិសនោះ គេឃើញមានឈ្មោះ ស វាសនា អត្តលេខ ៦៨០៤១ ពាក់សក្តិ២ ហើយក៏មានសក្តិ៣ ថ្មី១ទៀត ដែលទំនងជាត្រៀមឡើងសក្តិផងក៏មិនដឹង..?
តាមប្រភពពីមន្ត្រីនគរបាលខេត្តព្រះសីហនុ បានឲ្យដឹងថា ម្ចាស់ឯកសណ្ឋាននេះ គឺពិតជាមន្ត្រីនគរបាលពិតមែន ហើយធ្លាប់បំរើការងារនៅការិយាល័យអគ្គិភ័យ ។
មន្ត្រីដដែលបន្តថា មន្ត្រីនគរបាលខាងលើនេះ ក៏ធ្លាប់ត្រូវបាននគរបាលសង្កាត់លេខ៣ ចាប់ខ្លួនម្តងដែរ ពីបទចែកចាយ និងរក្សាទុកគ្រឿងញៀន ៕ (កែសម្រួលដោយ ៖ បុប្ផា)
ចែករំលែកព័តមាននេះ