ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា យុវជនម្នាក់ត្រូវបានសមត្ថកិច្ចឃាត់ខ្លួនបញ្ជូនទៅចាត់ការតាមផ្លូវច្បាប់ ក្រោយពីនាំក្មេងស្រីវ័យ១៤ឆ្នាំម្នាក់ចេញបាត់ពីផ្ទះអស់មួយថ្ងៃមួយយប់ ។ សេចក្តីរាយការណ៍បានឱ្យដឹងថា ក្មេងស្រីដែលបាត់ខ្លួន អាយុ១៤ឆ្នាំ មុខរបរសិស្ស…
ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា យុវជនម្នាក់ត្រូវបានសមត្ថកិច្ចឃាត់ខ្លួនបញ្ជូនទៅចាត់ការតាមផ្លូវច្បាប់ ក្រោយពីនាំក្មេងស្រីវ័យ១៤ឆ្នាំម្នាក់ចេញបាត់ពីផ្ទះអស់មួយថ្ងៃមួយយប់ ។
សេចក្តីរាយការណ៍បានឱ្យដឹងថា ក្មេងស្រីដែលបាត់ខ្លួន អាយុ១៤ឆ្នាំ មុខរបរសិស្ស មានទីលំនៅ ក្រុងសែនមនោរម្យ ខេត្តមណ្ឌលគិរី មានឪពុកអាយុ៤១ ឆ្នាំ មុខរបរកសិករ និងម្ដាយអាយុ៣៨ឆ្នាំ មុខរបរកសិករទីកន្លែងកំណើត។ ចំណែកយុវជនដែលនាំក្មេងស្រីរងគ្រោះទៅឈ្មោះ ស្វាង សាវ៉ាត់ អាយុ១៩ឆ្នាំ ជាកម្មករធ្វើការជាមួយនឹងឪពុកក្មេងស្រី។
សមត្ថកិច្ចបានឲ្យដឹងថា កាលយប់ពីថ្ងៃទី១២ មិថុនា ២០២០ កម្លាំងប៉ុស្តិ៍ស្ពានមានជ័យ បានទទួលពាក្យបណ្តឹងពីប្រជាពលរដ្ឋរស់នៅភូមិចំការតែ ក្នុងករណីបាត់ខ្លួនកូនស្រីវ័យជំទង់ម្នាក់តាំងពីម៉ោង៨និង៣០នាទីយប់ ថ្ងៃទី១១ មិថុនា រកមិនឃើញសោះ ដោយសង្ស័យថា មានមនុស្សនាំទៅ។
សមត្ថកិច្ចបន្តថា ក្រោយទទួលពាក្យបណ្តឹងនេះ កម្លាំងប៉ុស្តិ៍ស្ពានមានជ័យ សហការជាមួយកម្លាំអធិការក្រុង និងស្នងការដ្ឋានខេត្ត បើកការស្រាវជ្រាវរុករកអស់រយៈពេលជិត២០ម៉ោង ក៏កំណត់សន្និដ្ឋានថា ក្មេងស្រីត្រូវកម្មករដែលធ្វើការជាមួយឪពុកនាងជាអ្នកនាំទៅ។
សមត្ថកិច្ចបន្តទៀតថា ក្មេងស្រីដែលបាត់ខ្លួនពីផ្ទះកាលពីថ្ងៃទី១១ តាមបណ្តឹងឪពុកម្តាយនោះ បានរកឃើញ និងត្រឡប់មកផ្ទះវិញហើយ កាលពីថ្ងៃទី១៣ ខែមិថុនា ដោយនាងបានរត់តាមប្រុសស្នេហ៍ឈ្មោះ ស្វាង សាវ៉ាត់ ជាកម្មករធ្វើការជាមួយនឹងឪពុកក្មេងស្រីដែលបាត់ខ្លួន ។
ក្រោយពេលរកឃើញកូនហើយ ឪពុកម្តាយក្មេងស្រីកើតទុកមិនសុខចិត្តបានប្តឹងសមត្ថកិច្ចឲ្យចាត់ការតាមច្បាប់ពីបទ «លួងលោមអនីតិជនរួមភេទ»។ ករណីនេះផ្នែកជំនាញបាននិងកំពុងចាត់ការតាមនីតិវិធី ដើម្បីកសាងសំណុំរឿងហើយ។
គួរបញ្ជាក់ថា នៅថ្ងៃទី១១ ខែមិថុនា ឆ្នាំ២០២០ ម៉ោង៨និង៣០នាទីយប់ មានករណីបាត់ក្មេងស្រីអាយុ១៤ឆ្នាំម្នាក់ មុខរបរជាសិស្ស ហើយឪពុកម្តាយបានដើររកគ្រប់ទីកន្លែងតែមិនឃើញនោះទេ ធ្វើឱ្យឪពុកម្តាយរងគ្រោះសង្ស័យថាគេនាំទៅ ក៏ប្តឹងសមត្ថកិច្ចតែម្តង។ (កែសម្រួលដោយ ៖ បុប្ផា)
ចែករំលែកព័តមាននេះ