ករណីពុលស្រានៅក្នុងប្រទេសកម្ពុជា ត្រូវបានរដ្ឋមន្ត្រីក្រសួងសុខាភិបាល បញ្ជាក់ថា បណ្ដាលមកពីមានសារធាតុមេតាណុល ក្នុងស្រាលើសកម្រិត។
សារធាតុមេតាណុល អាចបណ្ដាលឱ្យប៉ះពាល់សុខភាពរហូតដល់បាត់បង់ជីវិត ចំពោះអ្នកហូបស្រាទាំងនោះ។ នេះជាការបញ្ជាក់របស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៅថ្ងៃទី១៣មិថុនា ឆ្នាំ២០២០។ការចេញមុខមកបញ្ជាក់របស់លោករដ្ឋមន្ត្រីក្រសួងសុខាភិបាលពេលនេះ ស្របពេលនៅខេត្តបន្ទាយមានជ័យមានករណីពុលស្រាលើពលរដ្ឋចំនួន ៤៣នាក់ ក្នុងនោះមានស្រី៣នាក់ ដែលបណ្តាលឲ្យមនុស្ស ៧នាក់បានស្លាប់បាត់ជីវិត។
បើគេពិនិត្យករណីពុលស្រានេះ ថយក្រោយវិញ កម្ពុជាមានករណីពុលស្រាច្រើនហើយយ៉ាងតិចពលរដ្ឋខ្មែរ៥៦នាក់បានស្លាប់បាត់បង់ជីវិតដោយសារពុលស្រានេះ។
នាយកដ្ឋានប្រយុទ្ធជំងឺឆ្លង CDC របស់ក្រសួងសុខាភិបាលថា កាលពីឆ្នាំ២០១៥ មានករណីពុលស្រានៅ ខេត្ត គឺខេត្តត្បូងឃ្មុំ ក្រចេះ និងមណ្ឌលគីរី ចំនួន២៨៤ ករណី បណ្តាលមនុស្ស ៣៣ នាក់បានស្លាប់។
ឆ្នាំ ២០១៦ ករណីពុលស្រាមានចំនួន ៩២ ករណី ហើយពលរដ្ឋ ១៥ នាក់ បានស្លាប់ គឺកើតឡើងនៅក្នុងខេត្តកំពង់ឆ្នាំង។ឆ្នាំ ២០១៧ ពលរដ្ឋពុលស្រាមាន ១៣ករណី នៅក្នុងខេត្ត មណ្ឌគិរី ដែលបណ្តាលឲ្យពលរដ្ឋ ២នាក់ស្លាប់បាត់បង់ជីវិត។ ចំណែកនៅឆ្នាំ ២០១៨ ចំនួនករណីពុលស្រាមានរហូតដល់២០៣ករណី ពលរដ្ឋស្លាប់៩នាក់ នៅខេត្តក្រចេះ និងខេត្តកំពត។
នៅពេលនេះ លោករដ្ឋមន្ត្រីក្រសួងសុខាភិបាល បានដាក់ចេញនូវវិធាន៦ចំនុចដើម្បីទប់ស្កាត់ករណីនេះ។ លោកបានស្នើដល់អភិបាលខេត្តទូទាំងប្រទេស ធ្វើការផ្សព្វផ្សាយណែនាំអប់រំ យ៉ាងណាឱ្យប្រជាជនមានការយល់ដឹង និងមានការចូលរួមក្នុងការទប់ស្កាត់បញ្ហាពុលស្រា។
កាត់បន្ថយ ឬជៀសវាងការបរិភោគស្រា នៅក្នុងពិធីបុណ្យផ្សេងៗក្នុងមូលដ្ឋានរបស់ខ្លួន។ តម្រង់ទិសទៅរកការកាត់បន្ថយនូវហានិភ័យ គឺត្រូវឱ្យអ្នកហូបស្រាយល់ដឹងពីគ្រោះថ្នាក់ និងផលវិបាកដែលបណ្ដាលមកពីគ្រឿងស្រវឹង ដូចជាការប៉ះពាល់ដល់សេដ្ឋកិច្ចគ្រួសារ សេដ្ឋកិច្ចជាតិ កេរ្តិ៍ឈ្មោះ និងអាយុជីវិត។
ចំនុចទី៤លោករដ្ឋមន្ត្រី ស្នើដល់សមត្ថកិច្ច ចុះពិនិត្យ និងរៀបចំខ្សែសង្វាក់ផលិតកម្មស្រា ឱ្យបានត្រឹមត្រូវ និងគោរពតាមក្បួនច្បាប់ គោលការណ៍អនុវត្តអនាម័យល្អ។បង្កើតយន្តការឆ្លើយតប និងត្រួតពិនិត្យខ្សែចង្វាក់ផលិតកម្ម និងការចែកបាយស្រាឱ្យ បានទាន់ពេលវេលា និងទៀងទាត់ប្រកបដោយប្រសិទ្ធភាព និងត្រូវមានការចូលរួមសហការ និងទំនាក់ទំនងល្អរវាងផ្នែកពាក់ព័ន្ធទាំងអស់ ជាដើម៕ អ សួស្តី
ចែករំលែកព័តមាននេះ