រាជធានីភ្នំពេញ ៖ ប្រមុខរាជរដ្ឋាភិបាល សម្តេចតេជោ ហ៊ុន សែន បានបន្តក្រើនរំលឹកពលរដ្ឋឲ្យបន្តយកចិត្តទុកដាក់ចូលរួមទប់ស្កាត់ការឆ្លងរាលដាលជំងឺកូវីដ-១៩ នៅទូទាំងប្រទេស បើទោះបីចំនួនអ្នកឆ្លងក្នុងប្រទេសមានចំនួនតិចតួចហើយអ្នកកំពុងសម្រាកព្យាបាលជំងឺក្នុងមន្ទីរពេទ្យមានតែម្នាក់ក្តី ។…
រាជធានីភ្នំពេញ ៖ ប្រមុខរាជរដ្ឋាភិបាល សម្តេចតេជោ ហ៊ុន សែន បានបន្តក្រើនរំលឹកពលរដ្ឋឲ្យបន្តយកចិត្តទុកដាក់ចូលរួមទប់ស្កាត់ការឆ្លងរាលដាលជំងឺកូវីដ-១៩ នៅទូទាំងប្រទេស បើទោះបីចំនួនអ្នកឆ្លងក្នុងប្រទេសមានចំនួនតិចតួចហើយអ្នកកំពុងសម្រាកព្យាបាលជំងឺក្នុងមន្ទីរពេទ្យមានតែម្នាក់ក្តី ។ សម្តេចនាយករដ្ឋមន្ត្រីបានអំពាវនាកុំឲ្យពលរដ្ឋ កុំគិតខ្លី និងធ្វេសប្រហែស ប្រថុយខ្លួននឹងជំងឺឆ្លងរាតត្បាតកូវីដ-១៩អោយសោះ។
នៅចុងសប្តាហ៍នេះ តាមរយៈទំព័របណ្តាញទំនាក់ទំនងសង្គម Facebook ផ្ទាល់ខ្លួន សម្តេចហ៊ុន សែន បានលើកឡើងថា «សូមបងប្អូនប្រជាពលរដ្ឋបន្តយកចិត្តទុកដាក់ ចូលរួមទប់ស្កាត់ការឆ្លងរាលដាលជំងឺកូវីដ-១៩ នៅទូទាំងប្រទេស បើទោះបីចំនួនអ្នកឆ្លងក្នុងប្រទេសយើងមានចំនួនតិចតួចក៏ដោយ។ ជំងឺកូវីដ-១៩ គឺនៅតែជំងឺឆ្លងរាតត្បាតដ៏សាហាវបំផុតដែលមកទល់ពេលនេះ ចំនួនអ្នកឆ្លងរោគលើពិភពលោកបានកើនឡើងគួរអោយបាមរម្ភខ្លាំងណាស់ រីឯថ្នាំព្យាបាលក៏អត់ទាន់មានដែរ» ។
គិតត្រឹមព្រឹកថ្ងៃទី១៣ មិថុនា នេះ កម្ពុជានៅតែមានករណីកូវីដ១៩ វិជ្ជមាន១២៦នាក់ដដែល ដោយក្នុងនោះអ្នកជាសះស្បើយ មានចំនួន១២៥នាក់ នៅតែម្នាក់គត់ដែលកំពុងសម្រាកក្នុងមន្ទីរពេទ្យ។ ទាំងយ៉ាងនេះ ក្តីទាំងថ្នាក់ដឹកនាំ ទាំងមន្ត្រីជំនាញនៅតែទទួចឲ្យពលរដ្ឋបន្តការពារខ្លួន កុំឲ្យជំងឺនេះរាតត្បាតដល់សហគមន៍ ឬរលកទី២កើតមាននោះ ។
នាយកដ្ឋានប្រយុទ្ធជំងឺឆ្លងនៃក្រសួងសុខាភិបាលបានបញ្ជាក់ថា សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ព្រោះប្រទេសជិតខាងយើងនិងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ ។ យើងត្រូវបន្តអនុវត្តគម្លាតសង្គមបន្តទៀត ដូចជាពន្យាការរៀបអាពាហ៌ពិពាហ៌ ពិធីជប់លៀង ការចាក់ធុងបាសរាំនោះឡើយ។
សម្តេចតេជោ ហ៊ុន សែន បានក្រើនរំលឹកដល់ពលរដ្ឋថា «សូមបងប្អូនប្រជាពលរដ្ឋប្រើម៉ាសពាក់ការពារ ហើយឧស្សាហ៍ដុសសម្អាតលាងដៃជាមួយសាប៊ូ អាល់កុលឬចឹល។ កុំទៅកន្លែងដែលមានការប្រមូលផ្តុំមនុស្សច្រើនបើគ្មានការចាំបាច់។ បើដឹងថា ខ្លួនឯងសុខភាពល្អហើយ សូមកុំទៅចម្លងរោគពីគេមកចូលផ្ទះ។ មិនត្រូវធ្វេសប្រហែស ឬមើលស្រាលលើជំងឺឆ្លងរលាកផ្លូវដង្ហើមកូវីដ-១៩ឡើយ ព្រោះបើឆ្លងហើយ គឺឆ្លងរាតត្បាតលឿនសាហាវខ្លាំងណាស់» ។
ប្រមុខរាជរដ្ឋាភិបាលបានឲ្យដឹងថា អង្គការសុខភាពពិភពលោក (WHO)នៅថ្ងៃនេះ បានបញ្ជាក់ថាមានប្រទេស២១៦ មានអ្នកឆ្លងរោគកូវីដ-១៩ ដែលចំនួនអ្នកកើតជំងឺនេះ បានកើនឡើង ជិត៧,៥លាននាក់ ហើយអ្នកស្លាប់ឡើងដល់ជាង៤ម៉ឺននាក់ ។ សម្តេចបានអំពាវនាវថា «សូមបងប្អូនប្រជាពលរដ្ឋកុំគិតខ្លី ធ្វេសប្រហែស ឬប្រថុយខ្លួននឹងជំងឺឆ្លងរាតត្បាតកូវីដ-១៩ អោយសោះ ទោះបីរស់នៅទីក្រុងឬនៅតាមជនបទស្រុកស្រែចម្ការ គឺត្រូវតែប្រុងប្រយ័ត្នទាំងអស់គ្នាជាប់ជានិច្ច» ។
ចែករំលែកព័តមាននេះ