រាជធានីភ្នំពេញ ៖ សាលាដំបូរាជធានីភ្នំពេញ នារសៀលថ្ងៃទី១១ ខែមិថុនា ឆ្នាំ២០២០ បានប្រកាសសាលក្រមសម្រេចផ្ដន្ទាទោសស្ត្រី២នាក់ ដែលជាប់ពាក់ពន្ធកេងប្រវ័ញ្ចលើពលកម្មកុមារ (ដឹកក្មេងដើរសុំទានតាមភ្លើងស្តុប) ដាក់ពន្ធនាគារម្នាក់៣ខែ តែទោសនេះត្រូវបានឲ្យអនុវត្តទណ្ឌកម្ម ក្នុងពន្ធនាគារត្រឹម១៦ថ្ងៃ សល់ប៉ុន្មានព្យួរទាំងអស់។ ជនជាប់ចោទម្នាក់ឈ្មោះ ឆែ ធឿន ភេទស្រី អាយុ៥៨ឆ្នាំ ស្នាក់នៅភូមិអន្ទុង៤ សង្កាត់គោករការ ខណ្ឌព្រែកព្នៅ រាជធានីភ្នំពេញ និងមុខរបរមិនពិតប្រាកដ។
និងម្នាក់ឈ្មោះ នួន ទូច ភេទស្រី អាយុ២៨ឆ្នាំ ស្នាក់នៅភូមិអន្ទុង៤ សង្កាត់គោករការ ខណ្ឌព្រែកព្នៅ រាជធានីភ្នំពេញ។ សូមរំលឹកថា កាលពីរសៀលថ្ងៃទី២៨ ខែឧសភា ឆ្នាំ២០២០ កម្លាំងសមត្ថកិច្ចជំនាញនគរបាលការិយាល័យប្រឆាំងការជួញដូរមនុស្ស និងការពារអនីតិជន រាជធានីភ្នំពេញ បានចុះអនុវត្តតាមចំណារអនុញ្ញាតឲ្យបង្ក្រាបជាក់ស្តែង របស់លោក ម៉ុត ដារ៉ា ព្រះរាជអាជ្ញារងអមសាលាដំបូងរាជធានីភ្នំពេញ លើករណីកេងប្រវ័ញ្ចពលកម្ម កុមារ ក្នុងរូបភាពបង្ខំឲ្យក្មេងដើរសុំទានតាមភ្លើងស្តុប ឈានដល់ការឃាត់ខ្លួនមេខ្យល់២នាក់ និងសង្គ្រោះកុមាររងគ្រោះ៦នាក់។
លោកវរៈសេនីយ៍ឯក កែវ ធា ប្រធានការិយាល័យប្រឆាំងការ ជួញដូរមនុស្ស និងការពារអនីតិជនរាជធានីភ្នំពេញ បានឲ្យដឹងថា ជនសង្ស័យ២នាក់ និងត្រូវកសាងសំណុំរឿងបញ្ជូនទៅកាន់សាលាដំបូងភ្នំពេញ ទើបនៅថ្ងៃទី២៨ ខែឧសភា ចៅក្រមស៊ើបសួរសម្រេចឃុំខ្លួនពួកគេដាក់ពន្ធនាគារបណ្ដោះអាសន្ន។ ចំណែកជនរងគ្រោះត្រូវបាន ប្រគល់ឲ្យទៅមន្ទីរសង្គមកិច្ចយកទៅគ្រប់គ្រង។
លោក កែវ ធា បន្តថា ករណីខាងលើនេះសមត្ថកិច្ច យើងបានសង្គ្រោះកុមាររងគ្រោះចំនួន៦នាក់(ស្រី៣នាក់) ក្នុងនោះមានទារកចំនួន២នាក់ប្រុស ដែលជាករណីកេងប្រវ័ញ្ចពលកម្មលើកុមារ (ក្នុងរូបភាពដើរសុំទាន) នៅចំណុចក្នុងផ្សារបឹងឈូក សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។ ក្រោយជាប់ឃុំឃាំងអស់រយៈពេល១៥ថ្ងៃ តុលាការបានលើកយកសំណុំរឿងនេះមកបើកសវនាការជំនុំជម្រះទោស និងក្រោយពេលបញ្ចប់ សវនាការភ្លាម ចៅក្រមជំនុំជម្រះបានសម្រេចផ្ដន្ទាទោសលើជនជាប់ចោទ ដាក់ពន្ធនាគារកំណត់ ម្នាក់៣ខែ និងឲ្យអនុវត្តក្នុងឃុំត្រឹម១៦ថ្ងៃប៉ុណ្ណោះ ពោលគឺជនត្រូវចោទនឹងរួចពីពន្ធនាគារ នៅថ្ងៃសុក្រស្អែកទី១២នេះ៕ ដោយ ៖ ឃឹម ប៊ុនណាក់
ចែករំលែកព័តមាននេះ