ទីក្រុងឡុងដ៍ ៖ ការិយាល័យស្ថិតិជាតិ (ONS) បាននិយាយថា ការធ្លាក់ចុះនេះជាប្រវត្តិសាស្ត្រហើយ ដែលបានប៉ះពាល់ស្ទើរតែគ្រប់វិស័យនៃសកម្មភាពសេដ្ឋកិច្ច ហើយការធ្លាក់ចុះនៅពេលនេះ គឺធំជាង៣ដង បើធៀបនឹងការធ្លាក់ចុះសេដ្ឋកិច្ចទាំងមូល ក្នុងឆ្នាំ២០០៨ ដល់២០០៩ នេះបើយោងតាម BBC ។
ប៉ុន្តែក្រុមអ្នកវិភាគ បាននិយាយថា ខែមេសា ទំនងជាខែអាក្រក់បំផុត ព្រោះរដ្ឋាភិបាលបានចាប់ផ្តើមបន្ធូរបន្ថយកុំឲ្យធ្លាក់ចុះបន្ត នៅក្នុងខែឧសភា ។
ONS ក៏បានចេញផ្សាយតួលេខ សម្រាប់រយៈពេល៣ខែ ចាប់ពីខែកុម្ភៈ ដល់ខែមេសា ដែលបង្ហាញពីការធ្លាក់ចុះ១០,៤% បើប្រៀបធៀប នឹងរយៈពេល ៣ខែមុន ។
ព័ត៌មានអំពីការធ្លាក់ចុះនេះ បានកើតឡើង ខណៈដែលកម្មករអង់គ្លេសជិត៩លាននាក់ កំពុងទទួលបានប្រាក់ឈ្នួលរបស់ពួកគេ ពីរដ្ឋាភិបាល ខណៈដែលចំនួនប្រជាជន ដែលអះអាងថា ទទួលបានអត្ថប្រយោជន៍ពីភាពអត់ការងារធ្វើ ពី៨៥៦.៥០០នាក់ ដល់២,១លាននាក់នៅក្នុងខែមេសា ។
ទោះយ៉ាងណា ONS បានអោយដឹងដែរថា ការធ្លាក់ចុះ GDP ក្នុងខែមេសា គឺធំបំផុត ដែលចក្រភពអង់គ្លេសមិនធ្លាប់មានទេ ។
លោក Jonathan Athow ជាអ្នកស្ថិតិជាតិ បានមានប្រសាសន៍ថា “សេដ្ឋកិច្ចអង់គ្លេសធ្លាក់ចុះ២០,៤% គឺធំជាង៣ដង បើប្រៀបធៀបទៅនឹងខែមុន និងធំជាង១០ដង មុនពេលដែល Covid-19 ចាប់ផ្ដើមរាតត្បាតនៅខែកុម្ភៈ” ។ ព្រោះថា កាលពីខែមេសា សេដ្ឋកិច្ចមានទំហំតូចជាងខែកុម្ភៈ ប្រហែល២៥ភាគរយ ។
លោកបានបន្តថា ស្ទើរតែគ្រប់វិស័យនៃសេដ្ឋកិច្ច ត្រូវរងប៉ះពាល់ ទាំងបណ្ដាហាង ការអប់រំសុខភាព និងការលក់រថយន្ត សូម្បីជាងកាត់ដេរ និងអ្នកសាងសង់ផ្ទះ ក៏រងផលប៉ះពាល់យ៉ាងធ្ងន់ធ្ងរដែរ ។ ទោះបីយ៉ាងណា លោកJonathan Athow បានប្រាប់ BBC នៅថ្ងៃនេះថា “វាទំនងជាខែមេសា ជាចំណុចដែលទាបបំផុត” ៕
ចែករំលែកព័តមាននេះ