រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី១១ ខែមិថុនា ឆ្នាំ២០២០ បានប្រកាសសាលក្រមសម្រេចផ្ដន្ទាទោសស្ត្រី២នាក់ដែលជាប់ពាក់ព័ន្ធនឹងករណីកេងប្រវ័ញ្ចលើពលកម្មកុមារ ដោយដឹកក្មេងដើរសុំទានតាមភ្លើងស្តុប ដាក់ពន្ធនាគារម្នាក់ៗ៣ខែ តែទោសនេះត្រូវបានឲ្យអនុវត្តទណ្ឌកម្មក្នុងពន្ធនាគារត្រឹម១៦ថ្ងៃ…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី១១ ខែមិថុនា ឆ្នាំ២០២០ បានប្រកាសសាលក្រមសម្រេចផ្ដន្ទាទោសស្ត្រី២នាក់ដែលជាប់ពាក់ព័ន្ធនឹងករណីកេងប្រវ័ញ្ចលើពលកម្មកុមារ ដោយដឹកក្មេងដើរសុំទានតាមភ្លើងស្តុប ដាក់ពន្ធនាគារម្នាក់ៗ៣ខែ តែទោសនេះត្រូវបានឲ្យអនុវត្តទណ្ឌកម្មក្នុងពន្ធនាគារត្រឹម១៦ថ្ងៃ សល់ប៉ុន្មានព្យួរទាំងអស់ ។ ស្ត្រីទាំង២នាក់នេះ ម្នាក់ឈ្មោះ ឆែ ធឿនអាយុ៥៨ឆ្នាំ និងម្នាក់ទៀតឈ្មោះ នួន ទូច អាយុ២៨ឆ្នាំ ទាំង២នាក់ស្នាក់នៅក្នុងភូមិអន្ទង់៤សង្កាត់គោករកា ខណ្ឌព្រែកព្នៅ។
សូមរំឭកថា កាលពីរសៀលថ្ខែទី២៨ ខែឧសភា ឆ្នាំ២០២០ កម្លាំងនគរបាលការិយាល័យប្រឆាំងការជួញដូរមនុស្សនិងការពារអនីតិជនរាជធានីភ្នំពេញ បានចុះអនុវត្តតាមចំណារអនុញ្ញាតឲ្យបង្ក្រាបជាក់ស្តែងរបស់លោក ម៉ុត ដារ៉ា ព្រះរាជអាជ្ញារងអមសាលាដំបូងរាជធានីភ្នំពេញ លើករណីកេងប្រវ័ញ្ចពលកម្មកុមារ ក្នុងរូបភាពបង្ខំឲ្យក្មេងដើរសុំទានតាមភ្លើងស្តុប និងឈានដល់ការឃាត់ខ្លួនស្ត្រីមេខ្យល់២នាក់ និងសង្គ្រោះកុមាររងគ្រោះ៦នាក់ ។
វរសេនីយ៍ឯក កែវ ធា នាយការិយាល័យនគរបាលប្រឆាំងការជួញដូរមនុស្សនិងការពារអនីតិជនរាជធានីភ្នំពេញ បានឲ្យដឹងថា ស្ត្រីជាមេខ្យល់ទាំង២នាក់ ត្រូវបានកសាងសំណុំរឿងបញ្ជូនទៅសាលាដំបូងភ្នំពេញ ហើយចៅក្រមស៊ើបសួរសម្រេចឃុំខ្លួនពួកគេដាក់ពន្ធនាគារជាបណ្ដោះអាសន្ន ។ ចំណែកកុមារទាំង៦នាក់ ប្រគល់ឲ្យទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញយកទៅគ្រប់គ្រង ។លោក កែវ ធា ឲ្យដឹងទៀតថា កុមារចំនួន៦នាក់ដែលត្រូវបានសង្គ្រោះនេះមានកុមារី៣នាក់ ក្នុងនោះមានទារកចំនួន២នាក់ ដែលជាករណីកេងប្រវ័ញ្ចពលកម្មលើកុមារក្នុងរូបភាពដើរសុំទាន នៅផ្សារបឹងឈូក សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ក្រោយពីជាប់ឃុំអស់រយៈពេល១៥ថ្ងៃ សាលាដំបូងបានលើកយកសំណុំរឿងនេះមកបើកសវនាការជំនុំជម្រះទោស និងក្រោយពេលបញ្ចប់សវនាការចៅក្រមជំនុំជម្រះបានសម្រេចផ្ដន្ទាទោសលើជនជាប់ចោទដាក់ពន្ធនាគារកំណត់ម្នាក់ៗ៣ខែ តែឲ្យអនុវត្តក្នុងពន្ធនាគារត្រឹម១៦ថ្ងៃប៉ុណ្ណោះ ពោលគឺជនត្រូវចោទនឹងរួចពីពន្ធនាគារនៅថ្ងៃសុក្រទី១២ ខែមិថុនា ៕
ចែករំលែកព័តមាននេះ