ខេត្តបន្ទាយមានជ័យ ៖ មន្ត្រីកាំកុងត្រូលអះអាងថា អ្នកដែលស្លាប់ដោយស្រាថ្នាំចិនសែ តាំងគួយបានឡើងដល់៧នាក់ហើយក្នុងនោះមានស្រីម្នាក់ ។ ចំណែកអ្នកកំពុងសង្គ្រោះស្ថិតក្នុងមន្ទីរពេទ្យមានជាង២០នាក់ទៀត។ ជាមួយគ្នានេះ រដ្ឋបាលខេត្តក៏បានចេញសេចក្តីជូនដំណឹងឱ្យប្រជាពលរដ្ឋឈប់ទិញនិងលក់ស្រាតាំងគួយនេះ និងបានណែនាំឱ្យប្រមូលទំនិញស្រានេះដើម្បីរក្សាទុកនៅថ្ងៃទី១១…
ខេត្តបន្ទាយមានជ័យ ៖ មន្ត្រីកាំកុងត្រូលអះអាងថា អ្នកដែលស្លាប់ដោយស្រាថ្នាំចិនសែ តាំងគួយបានឡើងដល់៧នាក់ហើយក្នុងនោះមានស្រីម្នាក់ ។ ចំណែកអ្នកកំពុងសង្គ្រោះស្ថិតក្នុងមន្ទីរពេទ្យមានជាង២០នាក់ទៀត។ ជាមួយគ្នានេះ រដ្ឋបាលខេត្តក៏បានចេញសេចក្តីជូនដំណឹងឱ្យប្រជាពលរដ្ឋឈប់ទិញនិងលក់ស្រាតាំងគួយនេះ និងបានណែនាំឱ្យប្រមូលទំនិញស្រានេះដើម្បីរក្សាទុកនៅថ្ងៃទី១១ ខែមិថុនា ឆ្នាំ២០២០ នៅតាមស្រុក-ក្រុងក្នុងខេត្តបន្ទាយមានជ័យ ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យ បានប្រាប់នៅរសៀលថ្ងៃទី១១ ខែមិថុនា ឆ្នាំ២០២០ថា រហូតដល់ថ្ងៃនេះមន្ត្រីសាខាកាំកុងត្រូលខេត្តបន្ទាយមានជ័យ បានចុះពិនិត្យស្រាវជ្រាវទើបដឹងថា មានអ្នកស្លាប់ដោយករណីសង្ស័យពុលស្រាថ្នាំចិនសែ(យីហោតាំងគួយ)មានចំនួន៧នាក់ ក្នុងនោះ៥នាក់ស្លាប់នៅមន្ទីរពេទ្យ និង២នាក់ស្លាប់នៅផ្ទះ ។ តាមការស្រាវជ្រាវបញ្ជាក់ថា នៅស្រុកម៉ាឡៃស្លាប់ចំនួន២នាក់ ស្រុកមង្គលបុរីស្លាប់២នាក់ ក្រុងប៉ោយប៉ែតស្លាប់៣នាក់ ក្នុងនោះមានស្ត្រីម្នាក់ និងមានបុរសជនជាតិថៃម្នាក់បានប្រពន្ធខ្មែរនៅក្រុងប៉ោយប៉ែត ។
លោកបានបញ្ជាក់ថា ក្រោយមានករណីស្លាប់សង្ស័យពុលស្រាថ្នាំចិនសែ តាំងគួយនេះមន្ត្រីសាខាកាំកុងត្រូលខេត្តបន្ទាយមានជ័យ បានសហការជាមួយមន្ត្រីជំនាញ និងអាជ្ញាធរមានសមត្ថកិច្ចបានចុះផ្សព្វផ្សាយ និងពិនិត្យនៅផ្សារម៉ាឡៃ ស្រុកម៉ាឡៃ កាលពីថ្ងៃទី១០ ខែមិថុនា ឆ្នាំ២០២០ និងបន្តចុះនៅក្រុងប៉ោយប៉ែតនៅថ្ងៃទី១១ ខែមិថុនា ឆ្នាំ២០២០ ពិនិត្យតាមផ្សារនិងតាមតូបក្នុងមូលដ្ឋានដើម្បីណែនាំហើយបើរកឃើញត្រូវប្រមូលស្រាថ្នាំ ដែលសង្ស័យពុលយកទៅរក្សាទុក ។
លោក ហឹល រ៉ាយ៉ា អភិបាលក្រុងសិរីសោភ័ណបានដឹកនាំកម្លាំងចុះពិនិត្យតាមទីផ្សារនិងការតាំងលក់តាមផ្ទះ ត្រូវប្រមូលបានមួយចំនួន ហើយនិងណែនាំឱ្យបញ្ឈប់លក់ស្រាថ្នាំចិនសែយីហោតាំគួយនេះ ។លោក ឃូរ ពៅ អភិបាលស្រុកព្រះនេត្រព្រះ បានចុះណែនាំដល់អាជីវករលក់នៅផ្សារជប់វ៉ារី ស្រុកព្រះនេត្រព្រះផ្សព្វផ្សាយបានដឹង និងបញ្ឈប់ការដាក់តាំងលក់នៅស្រុកម៉ាឡៃ មង្គលបុរី និងក្រុងប៉ោយប៉ែត ។
សមត្ថកិច្ចចម្រុះចុះឡោមព័ទ្ធនិងឆែកឆេរទីតាំងផលិតនិងចែកចាយស្រាថ្នាំចិនសែតាំងគួយ
រាជធានីភ្នំពេញ ៖ ទីតាំងចែកចាយ និង ផលិត ស្រាចិនសែតាំងគួយ ដែលបង្កឱ្យពុលស្លាប់មនុស្សជាបន្តបន្ទាប់ជាច្រើននាក់នៅស្រុក ម៉ាឡៃ និងក្រុងប៉ោយប៉ែត ខេត្តបន្ទាយមានជ័យ កាលពីប៉ុន្មានថ្ងៃមុននេះ ត្រូវបានសមត្ថកិច្ច ចម្រុះ ចុះឡោមព័ទ្ធឆែកឆេរទីតាំងផលិតមួយកន្លែងនៅរាជធានីភ្នំពេញ ។ ការចុះឆែកឆេរទីតាំងផលិត និងចែកចាយស្រាថ្នាំចិនសែនេះ បានធ្វើឡើងនៅថ្ងៃទី១១ មិថុនា ឆ្នាំ២០២០ នៅចំណុច ផ្ទះមួយកន្លែង ស្ថិតនៅភូមិបាក់ខែងលើ សង្កាត់បាក់ខែង ខណ្ឌជ្រោយចង្វា ។
ប្រតិបត្តិការនេះ ដឹកនាំដោយលោក ង៉ែត ចេក អគ្គនាយករងនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម និងមានការចូលរួមសហការពីនគរបាល និងអាជ្ញាធរមូលដ្ឋានផងដែរ ។តាមព័ត៌មានឱ្យដឹងថា សមត្ថកិច្ចចម្រុះបានធ្វើការឡោមព័ទ្ធទីតាំងនោះតាំងពីព្រឹក តែ ទំនងជាម្ចាស់ដឹងខ្លួនមុន បានចាក់សោហើយគេចបាត់ ទើបសមត្ថកិច្ចពន្យារពេលរង់ចាំ ។ ទោះបីមិនទាន់បានចូលឆែកឆេរកន្លែងផលិតក៏មន្ត្រីជំនាញរកឃើញសម្បកស្រាថ្នាំនិងធុងផលិតស្រាត្រូវបានម្ចាស់បោះបង់ចោលក្នុងព្រៃ និងកៀនរបងដីឡូត៍ខាងជើងផ្លូវជាតិលេខ៦ ។
តាមមន្ត្រីជំនាញបានឱ្យដឹងថា បើតាមការស្រាវជ្រាវខ្លះៗ គឺអ្នកផលិតស្រានេះច្រើនឆ្នាំមកហើយ មិនដែលមានបញ្ហាអ្វីនោះទេ គឺផលិតពីអាល់កុលតាមបច្ចេកទេស ។ ចំណែកការបង្កឱ្យមានការសង្ស័យពុលស្លាប់នេះ គេត្រូវយកស្រាថ្នាំដែលផលិតចុងក្រោយ មកធ្វើពិសោធន៍ តែមិនទាន់ដឹងពីលទ្ធផល ។ បញ្ហានេះមន្ត្រីជំនាញមានការសង្ស័យថាម្ចាស់អ្នកផលិតស្រាបានយកអាល់កុលក្លែងក្លាយធ្វើពីមេតាណុលយកមកផលិតស្រា ទើបជាហេតុធ្វើឱ្យពុល ។ តាមការស្រាវជ្រាវដំបូងៗគឺអ្នកផលិតតែងបានទិញអាល់កុលពីក្រុមហ៊ុនSKD ដែលជាអាល់កុលមានស្តង់ដា តែអាចដោយសារអាល់កុលថ្លៃក៍ងាកទៅទិញអាល់កុលកន្លែងផ្សេងដែលផលិតអាល់កុលក្លែងក្លាយធ្វើពីមេតាណុលអាចជាហេតុបណ្តាលឱ្យពុលតែម្តង ។
តាមព័ត៌មានបានឱ្យដឹងថា ម្ខាស់សិប្បកម្មផលិតស្រា ឈ្មោះ ខ្វៅ សុវណ្ណ អាយុប្រមាណ៧០ឆ្នាំ និងប្រពន្ធឈ្មោះ ងន ចាគា អាយុ៦០ឆ្នាំ បានចាក់សោបិទផ្ទះ និងមានការបំផ្លាញវត្តុតាងហើយគេចខ្លួនបាត់រយៈពេល២ថ្ងៃមកហើយ ក្រោយពីល្បីស្រារបស់ខ្លួនធ្វើឱ្យអ្នកផឹកពុលស្លាប់ ។ បន្ទាប់ពីធ្វើការឡោមព័ទ្ធរហូតដល់ម៉ោង៤និង៥០នាទីរសៀល សមត្ថកិច្ចមិនបានឆែកឆេរនោះទេ ដោយពន្យារពេលគឺគ្រាន់តែដកហូតសម្បកដបនិងធុងផលិតចំណុះប្រមាណ១ពាន់លីត្រដែលម្ចាស់យកទៅប្លុងចោលក្រោយផ្ទុះ ។
យ៉ាងតិចពលរដ្ឋខ្មែរស្លាប់ដោយសារពុលស្រាមានដល់៥៦នាក់រយៈពេល៥ឆ្នាំចុងក្រោយ
នាយកដ្ឋានប្រយុទ្ធជំងីឆ្លងរបស់ក្រសួងសុខាភិបាលកម្ពុជា បានកត់ត្រាពីចំនួនអ្នកពុលស្រានៅក្នុងប្រទេសកម្ពុជាពីឆ្នាំ២០១៥ មកថាមានអ្នកស្លាប់ចំនួន៥៦នាក់។ ចំនួននេះគឺរាប់បញ្ចូលករណីពុលស្រាដែលកំពុងកើតមាននៅខេត្តបន្ទាយមានជ័យពេលនេះផងដែរ ។ បើតាមនាយកដ្ឋានប្រយុទ្ធជំងឺឆ្លង CDC កាលពីឆ្នាំ២០១៥ មានករណីពុលស្រានៅច្រើនខេត្ត គឺខេត្តត្បូងឃ្មុំ ខេត្តក្រចេះ និងខេត្តមណ្ឌលគីរី ចំនួន២៨៤ករណី ក្នុងនោះស្លាប់៣៣នាក់ ។
នៅក្នុងឆ្នាំ២០១៦ ករណីពុលស្រាមានចំនួន៩២ករណី ស្លាប់១៥នាក់ កើតឡើងនៅក្នុងខេត្តកំពង់ឆ្នាំង ។ លុះមកដល់ឆ្នាំ២០១៧ ពលរដ្ឋពុលស្រាមាន១៣ករណី នៅក្នុងខេត្តមណ្ឌគិរី ដែលបណ្តាលឲ្យពលរដ្ឋ២នាក់ស្លាប់បាត់បង់ជីវិត ។ ចំណែកនៅឆ្នាំ២០១៨ ចំនួនករណីពុលស្រាមានរហូតដល់២០៣ករណី ពលរដ្ឋស្លាប់៩នាក់ នៅខេត្តក្រចេះ និងខេត្តកំពត ។ ឆ្នាំ២០១៩មិនមានករណីពុលស្រាកត់ត្រាដោយក្រសួងសុខាភិបាលទេ តែនៅថ្ងៃទី៧មិថុនា ឆ្នាំ២០២០ នៅខេត្តបន្ទាយមានជ័យមានករណីពុលស្រាសចំនួន២៧នាក់ ហើយរហូតមកដល់ពេលនេះមានអ្នកស្លាប់ចំនួន៦នាក់ ។
នាយកដ្ឋានប្រយុទ្ធជំងឺឆ្លងបានបញ្ជាក់ថា ក្រសួងសុខាភិបាល បានបញ្ជូនអ្នកជំងឺមកព្យាបាលនៅមន្ទីរពេទ្យនិងកំពុងទទួលបានការយកចិត្តទុកព្យាបាលពីគ្រូពេទ្យជំនាញ ហើយបញ្ហានេះ បានផ្តល់ពិគ្រោះបច្ចេកទេសជាមួយគ្រូពេទ្យជំនាញថ្នាក់ជាតិ ។ នាយកដ្ឋានជំនាញបានដាស់តឿនដល់ប្រជាពលរដ្ឋឲ្យមានការប្រុងប្រយ័ត្នក្នុងការទិញស្រាមកទទួលទាន ត្រូវរកប្រភពស្រាច្បាស់លាស់ មានការត្រួតពិនិត្យត្រឹមត្រូវពីមន្ត្រីជំនាញ និងពិសារក្នុងកម្រិតតិចបំផុត ជាពិសេសក្នុងកំឡុងពេលកំពុងមានការផ្ទុះឡើងនៃជំងឺកូវីដ-១៩ ។
មន្ត្រីសុខាភិបាលបញ្ជាក់ថា ការទទួលស្រាមិនត្រឹមអាចបណ្តាលឲ្យពុលស្រាប៉ះពាល់សុខភាពនោះទេ ស្រាអាចឲ្យមនុស្សធ្វេសប្រហែសនិងងាយឆ្លងជំងឺកូវីដ-១៩ទៀតផង ។ កន្លងមកក្រៅពីករណីពុលស្រានេះ ពលរដ្ឋកម្ពុជាបានស្លាប់បាត់បង់ជីវិតដោយសារអាហារជាច្រើនករណីផ្សេងទៀត ដូចជាពុលនំបញ្ចុក ពុលត្រីក្រពត ពុលបន្លែ ពុលអាហារផ្អាប់ដូចជាផ្អក ម៉ាំល្ហុង មិនស្អាតជាដើម ៕
ចែករំលែកព័តមាននេះ