រាជធានីភ្នំពេញ ៖ ក្រោយពីមានការចុះផ្សាយនៅតាមបណ្ដាញសារព័ត៌មាននានា អំពីអ្នកភូមិទៅបេះត្រកួន ក៏ប្រទះឃើញម៉ូតូ១គ្រឿងនៅក្នុងត្រពាំងទឹក ហើយត្រូវគេសង្ស័យថា មានជនមិនស្គាល់មុខយកទៅប្លុងចោលនោះ រហូតមកដល់ព្រឹកថ្ងៃទី១២ ខែមិថុនា ឆ្នាំ២០២០នេះ…
រាជធានីភ្នំពេញ ៖ ក្រោយពីមានការចុះផ្សាយនៅតាមបណ្ដាញសារព័ត៌មាននានា អំពីអ្នកភូមិទៅបេះត្រកួន ក៏ប្រទះឃើញម៉ូតូ១គ្រឿងនៅក្នុងត្រពាំងទឹក ហើយត្រូវគេសង្ស័យថា មានជនមិនស្គាល់មុខយកទៅប្លុងចោលនោះ រហូតមកដល់ព្រឹកថ្ងៃទី១២ ខែមិថុនា ឆ្នាំ២០២០នេះ ម្ចាស់ម៉ូតូបានធ្វើដំណើរទៅកាន់ប៉ុស្តិ៍នគរបាលត្រពាំងក្រសាំង នៃអធិការដ្ឋាននគរបាលខណ្ឌពោធិ៍សែនជ័យ ដើម្បីទទួលយកម៉ូតូនោះត្រឡប់ទៅវិញហើយ។ ចំពោះមូលហេតុគឺមកពីបុរសរូបនេះស្រវឹងរហូតបាត់ការចងចាំក៏ជិះម៉ូតូធ្លាក់ទឹកត្រពាំង ប៉ុន្តែសមណាងល្អគាត់ឡើងរួចផុតពីទឹកវិញ លុះស្វាស្រាមិនដឹងថាម៉ូតូទីណានោះទេ ។ ១២ថ្ងៃក្រោយមកទើបព័ត៌មានផ្សាយករណីប្រទះឃើញទើបគាត់ស្គាល់ថា ជាម៉ូតូរបស់ខ្លួន ទើបទៅសុំយកម៉ូតូមកវិញ ?
បើតាមបុរសខាងលើ បានប្រាប់ឲ្យដឹងថា គាត់ឈ្មោះខាន់ ម៉ៅ រស់នៅឃុំបឹងត្រាញ់ខាងត្បូង ស្រុកសំរោង ខេត្តតាកែវ អាស័យដ្ឋានបច្ចុប្បន្នភូមិដំណាក់រវាង ឃុំពពេល ស្រុកត្រាំកក់ ខេត្តតាកែវ។ ហើយរហូតមដល់ពេលនេះគាត់មានអាយុ៣៥ឆ្នាំហើយ មានមុខរបរជាកម្មកររោងចក្រកាត់ដេរ សព្វថ្ងៃស្នាក់នៅផ្ទះជួលក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ។
បុរសខាងលើបន្តថា ចំណែកម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ1GL-2825 គឺជាកម្មសិទ្ធិរបស់គាត់ ហើយពុំមែនត្រូវចោរលួចនោះទេ គឺមកពីគាត់ស្រវឹងជិះធ្លាក់ទៅក្នុងទឹកត្រពាំង រួចវង្វេងបាត់រយៈពេល១២ថ្ងៃកន្លងមកហើយ។
បុរសនេះបានបន្តទៀតថា កាលពីម៉ោង៤និង៣០នាទីល្ងាច ថ្ងៃទី៣០ ខែឧសភា គាត់បានជិះម៉ូតូចាកចេញពីផ្ទះជួលនៅក្នុងភូមិអង្គ ឆ្ពោះទៅកាន់ផ្ទះមិត្តភក្ដិនៅក្នុងផ្សារអង្គ ស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ដើម្បីចូលរួមផឹកស៊ីនៅទីនោះ។រហូតដល់ម៉ោង៩យប់ថ្ងៃដដែល ទើបឈប់ រួចក៏បែកផ្លូវគ្នាទៅផ្ទះរៀងៗខ្លួន ខណៈនោះគាត់ស្រវឹងខ្លាំង និងជិះម៉ូតូត្រឡប់ទៅផ្ទះវិញ ប៉ុន្តែព្រោះតែស្រវឹងខ្លាំងពេក រកផ្លូវទៅផ្ទះអត់ឃើញក៏ចេះតែជិះៗទៅ ដោយជិះតាមផ្លូវខ្លះ និងកាត់វាលស្រែខ្លះ រហូតដល់ធ្លាក់ចូលទៅក្នុងទឹកត្រពាំងដោយមិនដឹងខ្លួនតែម្តង។
ប្រភពដដែលបន្តទៀតថា បន្ទាប់មកគាត់ស្រវាឡើងគោករួចផុតពីគ្រោះថ្នាក់ ហើយដោយមិនអាចយកម៉ូតូឡើងពីក្នុងទឹករួចគាត់ក៏ដើរចេញ ហើយក៏ចេះតែដើរៗទៅទាំងវង្វេងផ្លូវដីចម្ងាយរាប់គីឡូម៉ែត្រ លុះរហូតយប់កាន់តែជ្រៅទើបទៅដល់វត្តពោធិ៍វ័ន ស្ថិតនៅក្នុងភូមិផ្លាំង សង្កាត់ស្នោរ ខណ្ឌកំបូល ក៏ត្រូវបានសន្តិសុខយាមបុរីផ្ទះល្វែងនៅជិតនោះ ឃាត់មិនឲ្យបន្តដំណើរទៅមុខទៀត។ បន្ទាប់មកសន្តិសុខ បានដឹកគាត់ទៅកាន់សាលាសង្កាត់ស្នោរ ហើយគាត់បានដេកនៅទីនោះអស់១យប់ លុះដល់ព្រឹកឡើងថ្ងៃទី៣១ ខែឧសភា ទើបហៅម៉ូតូឌុបជិះត្រឡបទៅកាន់ផ្ទះជួលនៅក្នុងភូមិអង្គ សង្កាត់ចោមចៅទី៣វិញ។
បុរសម្ចាស់ម៉ូតូប្រាប់ទៀតថា ក្រោយពេលទៅដល់ផ្ទះជួលវិញ គាត់នឹកគិតរកកន្លែងដែលជិះម៉ូតូធ្លាក់ទឹក បណ្ដាលឲ្យបាត់ម៉ូតូនោះម្ដងហើយម្ដងទៀតរាល់ថ្ងៃដែរ ប៉ុន្តទោះជាខំរកនឹកយ៉ាងណាក៏នឹកមិនឃើញសោះ ហើយក៏គ្មានសង្ឃឹមថា នឹងបានឃើញម៉ូតូវិញដែរ។ លុះដល់ថ្ងៃទី១១ ខែមិថុនា គឺរយៈពេល១២ថ្ងៃគត់ ស្រាប់តែគាត់ឃើញបណ្ដាញព័ត៌មាននានាចុះផ្សាយអំពីការប្រទះឃើញម៉ូតូ១គ្រឿងនៅក្នុងទឹកត្រពាំង ហើយនៅក្រោមកែបមានអត្តសញ្ញាណប័ណ្ណ និងកាតគ្រីម៉ូតូឈ្មោះគាត់ និងឈ្មោះក្រុមហ៊ុនបង់រំលស់ផងនោះទើបស្គាល់ថា គឺជាមូតូរបស់គាត់ លុះរហូតដល់ព្រឹកថ្ងៃទី១២ ខែមិថុនា ទើបគាត់ធ្វើដំណើរទៅកាន់ប៉ុស្តិ៍នគរបាលចោមចៅទី៣ ដើម្បីសុំយកម៉ូតូត្រឡប់ទៅវិញ។
សូមរំលឹកផងដែរថា កាលពីម៉ោង៨ព្រឹក ថ្ងៃទី១១ ខែមិថុនា ឆ្នាំ២០២០ មានអ្នកភូមិបានប្រទះឃើញម៉ូតូ១គ្រឿងខាងលើ នៅក្នុងទឹកត្រពាំង ស្ថិតក្នុងភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ ខណៈដែលពួកគាត់ទៅបេះត្រកួន រួចក៏រាយការណ៍ជូននគរបាលឲ្យចុះទៅយកមករក្សាទុកនៅប៉ុស្តិ៍ត្រពាំងក្រសាំង ហើយមុនដំបូងត្រូវគេសង្ស័យថា ត្រូវជនមិនស្គាល់មុខលួចយកទៅទម្លាក់ចោលទីនោះ ប៉ុន្តែអ្វីដែលប្លែក គឺម៉ូតូមានកូនសោរ និងមានកូនកាបូបដាក់កាតគ្រី និងអត្តសញ្ញាណប័ណ្ណ ព្រមទាំងឯកសារផ្សេងទៀតរបស់ម្ចាស់ទុកក្រោមកែបទៀត។
ពេលនោះនគរបាលបានចុះរាវក្នុងទឹក និងពិនិត្យជុំវិញកន្លែងកើតហេតុ ក្រែងមានមនុស្សត្រូវបាត់បង់ជីវិតនៅទីនោះ ប៉ុន្តែក្រោយពីរាវសព្វកន្លែងគ្មានទេ ទើបនាំយកម៉ូតូទៅរក្សាទុក ហើយរហូតពេលនេះ ទើបរកឃើញម្ចាស់ទៅទទួលយកវិញ គឺបុរសខាងលើនេះតែម្តង។
គួររំលឹកទៀតថា ៖ ប្រទះឃើញម៉ូតូមួយគ្រឿងក្នុងទឹកត្រពាំង នៅខណ្ឌពោធិសែនជ័យ ៕ (កែសម្រួលដោយ ៖ បុប្ផា)
ចែករំលែកព័តមាននេះ