រាជធានីភ្នំពេញ ៖ រថយន្តបែនដឹកដីមួយគ្រឿងបានក្រឡាប់បះជើងរងការខូចខាតយ៉ាងដំណំ ប៉ុន្តែមិនបានបណ្ដាលឲ្យអ្នកបើកបររងរបួស ឬបាត់បង់ជីវិតនោះឡើយ បន្ទាប់ពីត្រូវរថភ្លើង១ខ្សែបុក ខណៈពេលរថយន្តនេះកំពុងបើកដឹកដីឆ្លងកាត់ផ្លូវដែក ហើយវាក់អើមិនបានឃើញរថភ្លើងមកដល់ ។ ចំណែកអ្នកស្រុកក៏បានប្រាប់ផងដែរថា…
រាជធានីភ្នំពេញ ៖ រថយន្តបែនដឹកដីមួយគ្រឿងបានក្រឡាប់បះជើងរងការខូចខាតយ៉ាងដំណំ ប៉ុន្តែមិនបានបណ្ដាលឲ្យអ្នកបើកបររងរបួស ឬបាត់បង់ជីវិតនោះឡើយ បន្ទាប់ពីត្រូវរថភ្លើង១ខ្សែបុក ខណៈពេលរថយន្តនេះកំពុងបើកដឹកដីឆ្លងកាត់ផ្លូវដែក ហើយវាក់អើមិនបានឃើញរថភ្លើងមកដល់ ។ ចំណែកអ្នកស្រុកក៏បានប្រាប់ផងដែរថា រថភ្លើងបានចុចសុីផ្លេរតាំងពីនៅឆ្ងាយមកម៉្លេះ ប៉ុន្តែអ្នកបើកបររថយន្តអត់ឮ និងអត់ឈប់ នៅតែបន្តបើកឆ្លងកាត់ ម្យ៉ាងទៀតទីនោះគ្មានដាក់បារ៉ាស់ហាមឃាត់ផងនោះ ទើបត្រូវរថភ្លើងបុករថយន្ត បណ្ដាលឲ្យក្រឡាប់តែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង៨ព្រឹកថ្ងៃទី១២ ខែមិថុនា ឆ្នាំ២០២០ នៅតាមផ្លូវលំ ត្រង់ចំណុចផ្លូវដែកឆ្លងកាត់រាជធានីភ្នំពេញ-ខេត្តបាត់ដំបង ស្ថិតនៅក្នុងភូមិតាពូង សង្កាត់ស្នោរ ខណ្ឌកំបូល រាជធានីភ្នំពេញ។
រថយន្តដឹកដីមួយគ្រឿងដែលក្រឡាប់ព្រោះត្រូវរថភ្លើងបុកខាងលើនេះ ម៉ាកហុីយ៉ាន់ដាយ ពណ៌ខៀវ ពាក់ស្លាកលេ ភ្នំពេញ ៣B-៦៧១២ បើកបរដោយបុរសមិនស្គាល់ឈ្មោះម្នាក់ គ្រាន់តែដឹងថា រស់នៅក្នុងភូមិកណ្ដាល ឃុំឆក់ឈើនាង ស្រុកអង្គស្នួល ខេត្តកណ្ដាល និងមិនមានរងគ្រោះថ្នាក់ឡើយ។
តាមប្រភពពីអ្នកភូមិបាននិយាយថា មុនពេលកើតហេតុ គេឃើញរថយន្តមួយគ្រឿងនេះមានដឹកដីបើកចេញពីរណ្ដៅដីមួយកន្លែងនៅក្នុងសង្កាត់ឪឡោក ខណ្ឌកំបូល ដោយបើកបរធ្វើដំណើរក្នុងទិសដៅពីត្បូងទៅជើង ខណៈនោះក៏មានរថយន្តបែនដឹកដីផ្សេងទៀតបើកជាហូរហែបន្តកន្ទុយគ្នាទៅមកតាមផ្លូវនោះដែរ។
តាមប្រភពដដែលបានបន្តថា ស្របពេលនោះក៏មានរថភ្លើង១ខ្សែធ្វើដំណើរក្នុងទិសដៅពីលិចទៅកើត ពីខេត្តបាត់ដំបងចូលរាជធានីភ្នំពេញ ហើយរថភ្លើងបានចុចសុីផ្លេរច្រើនដងផងដែរ លុះពេលមកដល់ត្រង់ចំណុចផ្លូវរថភ្លើងឆ្លងកាត់ អ្នកបើកបររថយន្តអត់បានឮ និងអត់បានឃើញរថភ្លើង ទើបអត់ឈប់ នៅតែបន្តបើកឆ្លងកាត់ផ្លូវដែក ហើយខណៈរថយន្តឆ្លងជិតផុតទៅហើយ ស្រាប់តែត្រូវរថភ្លើងបុកចំចំហៀងពីក្រោយខាងឆ្វេង បណ្ដាលឲ្យក្រឡាប់តែម្ដង។
ប្រភពដដែលបានបន្តទៀតថា ពេលនោះពួកគាត់នឹកស្មានថា អ្នកបើកបររថយន្តត្រូវបាត់បង់ជីវិតបាត់ទៅហើយ លុះពេលរថភ្លើងទៅផុត ក៏នាំគ្នារត់ទៅមើល ឃើញបុរសអ្នកបើកបររថយន្តបើកទ្វារខាងស្ដាំលូនចេញពីក្នុងរថយន្តដោយសុវត្ថិភាព ហើយរថយន្តនោះបានរងការខូចខាតយ៉ាងដំណំ ។ ចំណែករថភ្លើងមិនបានឈប់ទេ ក៏បើកបន្តដំណើរចូលទៅក្នុងរាជធានីភ្នំពេញបាត់ស្រមោល រីឯគ្រោះថ្នាក់នេះកើតឡើងដោយសារតែត្រង់ចំណុចកើតហេតុនេះគ្មានបារ៉ាស់សម្រាប់ហាមឃាត់ពេលមានរថភ្លើងមកដល់។ មិនតែប៉ុណ្ណោះ នៅតំបន់នោះមានឧប្បត្តិហេតុបែបនេះកើតឡើងជាបន្តបន្ទាប់មកហើយ ហើយខាងរថយន្តរងគ្រោះខូចខាតខ្ទេចខ្ទី ហើយត្រូវចេញសំណងទៅឲ្យខាងរថភ្លើងថែមទៀតផង។
ក្រោយពេលកើតហេតុ បុរសជាអ្នកបើកបររថយន្តមានការភិតភ័យ និងបានចាកចេញពីកន្លែងកើតហេតុបាត់ ចំណែកនគរបាលប៉ុស្តិ៍ស្នោរបានចុះទៅសម្រួលមិនឲ្យមានការកកស្ទះចរាចរណ៍ និងរាយការណ៍ជូននគរបាលចរាចរណ៍នៃអធិការដ្ឋាននគរបាលខណ្ឌកំបូល ចុះទៅនាំយករថយន្តខាងលើទៅរក្សាទុករង់ចាំធ្វើការដោះស្រាយនៅពេលក្រោយទៀត ៕ (កែសម្រួលដោយ ៖ ធីតា)
ចែករំលែកព័តមាននេះ