រាជធានីភ្នំពេញ ៖ សន្តិសុខរោងចក្រកាត់ដេរម្នាក់ត្រូវសមត្ថកិច្ចឃាត់ខ្លួនកាលពីថ្ងៃទី១១ ខែមិថុនា ឆ្នាំ២០២០ បន្ទាប់ពីជនសង្ស័យបានធ្វើសកម្មភាពចាប់បង្ខំសេពសន្ថវៈលើកម្មការីម្នាក់បានសម្រេចក្នុងបន្ទប់ទឹក នៅរោងចក្រកាត់ដេរមួយកន្លែង ស្ថិតក្នុងខណ្ឌសែនសុខ រាជធានីភ្នំពេញ ។…
រាជធានីភ្នំពេញ ៖ សន្តិសុខរោងចក្រកាត់ដេរម្នាក់ត្រូវសមត្ថកិច្ចឃាត់ខ្លួនកាលពីថ្ងៃទី១១ ខែមិថុនា ឆ្នាំ២០២០ បន្ទាប់ពីជនសង្ស័យបានធ្វើសកម្មភាពចាប់បង្ខំសេពសន្ថវៈលើកម្មការីម្នាក់បានសម្រេចក្នុងបន្ទប់ទឹក នៅរោងចក្រកាត់ដេរមួយកន្លែង ស្ថិតក្នុងខណ្ឌសែនសុខ រាជធានីភ្នំពេញ ។
ជនសង្ស័យឈ្មោះ ឈុន ហាវ ភេទប្រុស អាយុ២០ឆ្នាំ មុខរបរជាសន្តិសុខឯកជន ស្នាក់នៅក្នុងរោងចក្រ មានស្រុកកំណើតភូមិកំពង់លាវ ឃុំពងទឹក ស្រុកដំណាក់ចង្អើរ ខេត្តកែប ។ ចំណែកនារីរងគ្រោះមានអាយុ១៨ឆ្នាំ មុខរបរកម្មការនីរោងចក្រ ។
បើតាមសម្តីនារីរងគ្រោះរៀបរាប់ប្រាប់សមត្ថកិច្ចថា មុនពេលកើតហេតុ នាងបានចូលធ្វើការក្នុងរោងចក្រដូចធម្មតា ប៉ុន្តែនៅវេលាម៉ោង១១ថ្ងៃដដែលនោះនាងបានដើរចូល ទៅបន្ទប់ទឹក ក្នុងគោលបំណងបត់ជើងតូច ។ លុះពេលចូលដល់ក្នុងបន្ទប់ទឹក ស្រាប់តែលេចមុខជនសង្ស័យដើរទៅជាមួយដែរ ឃើញដូច្នោះ នាងបម្រុងស្ទុះចេញមកក្រៅដែរ ប៉ុន្តែត្រូវបានជនសង្ស័យរុញចូលក្នុងបន្ទប់ទឹកវិញ រួចចាក់គន្លឹះ ទ្វារ ហើយបានធ្វើសកម្មភាពចាប់បង្ខំសេពសន្ថវៈលើរូបនាងរហូតបានសម្រេច ។
តាមប្រភពដដែលបានបន្តថា ក្រោយពេលកើតហេតុ ភ្លាមៗនាងបានសម្រេចចិត្តទៅរាយការណ៍ប្រាប់អ្នកទទួលខុសត្រូវខាងរោងចក្រ ដើម្បីឲ្យបានដឹងអំពីទង្វើដ៏អាក្រក់របស់សន្តិសុខម្នាក់នោះ រួចហើយបានទៅប្តឹងសមត្ថកិច្ចនគរបាលប៉ុស្តិ៍រដ្ឋបាលមូលដ្ឋានឲ្យចុះទៅជួយអន្តរាគមន៍ឃាត់ខ្លួនជនសង្ស័យ ដើម្បីនាំយកទៅចាត់ការតាមផ្លូវច្បាប់តែម្តង ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពចាប់បង្ខំសេពសន្ថវៈលើនារីរងគ្រោះនៅក្នុងបន្ទប់ទឹកប្រាកដមែន (មូលហេតុមកពីខ្លួនលួចស្រឡាញ់នាងយូហើយ) ។
ជនសង្ស័យបានសារភាពដោយមិនលាក់លៀមទៀតថា ខ្លួនជាសន្តិសុខយាមប្រចាំការនៅមុខរោងចក្រ ចំណែកនារីរងគ្រោះនាងជាកម្មការិនីកាត់ដេរ នៅពេលនាងដើរចេញចូលធ្វើការកាត់មុខខ្លួនជារៀងរាល់ថ្ងៃ និងតែងតែបោះពាក្យសម្តីលេបខាយឌឺដងដាក់គ្នា ធ្វើឲ្យខ្លួនមានចិត្តប្រតិព័ទ្ធ គ្រាន់តែមិនហ៊ានហាស្តីពោលពាក្យថាសុំស្រឡាញ់នាងនោះទេ ។
ជនសង្ស័យបានឆ្លើយសារភាពបន្តថា ការព្យាយាមលួចសម្លឹងមើលឃើញសម្រស់នាងរាល់ថ្ងៃ ធ្វើឲ្យអារម្មរបស់ខ្លួនទប់លែងបាន លុះមានឱកាសល្អ ខណៈពេលដែលនាងដើរចូលក្នុងបន្ទប់ទឹក ខ្លួនក៏សម្រេចចិត្តដើរទៅតាមក្រោយ ហើយចាប់បង្ខំសេពសន្ថវៈរហូតបានសម្រេច ទើបចេញពីបន្ទប់ទឹកទៅកន្លែងយាមវិញ ស្រាប់តែមិនបានប៉ុន្មានម៉ោងផង ត្រូវនារីរងគ្រោះប្តឹងសមត្ថកិច្ចឲ្យចាប់ខ្លួនតែម្តងទៅ ។
ក្រោយពេលឃាត់ខ្លួនជនសង្ស័យ ដោយយោងទៅលើពាក្យបណ្តឹងរបស់នារីរងគ្រោះ និងស្តាប់ចម្លើយសារភាពជាក់ស្តែង ពាក់ព័ន្ធបទល្មើសដូចការចោទប្រកាន់នោះមែន សមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ