រាជធានីភ្នំពេញ ៖ ក្នុងសប្ដាហ៍ទី១ នៃខែមិថុនា ឆ្នាំ២០២០នេះ ភ្ញៀវទេសចរក្នុងស្រុកចំនួន១៥៧,៩៤២ នាក់ បានចេញដើរទស្សនានៅតាមរមណីយដ្ឋានទេសចរណ៍ សហគមន៍ទេសចរណ៍-អេកូទេសចរណ៍នៅទូទាំងប្រទេសក្នុងកំណើន ២៤.២០ភាគរយធៀបនឹងសប្តាហ៍មុន ។ នេះបើយោងតាមលោក ថោង ខុន រដ្ឋមន្ត្រី ក្រសួងទេសចរណ៍ដែលបានបញ្ជាក់ប្រាប់នៅយប់ថ្ងៃទី១១ ខែមិថុនានេះ ។
លោករដ្ឋមន្ត្រីបានថ្លែងថា «ស្ថានភាពទេសចរណ៍ផ្ទៃក្នុងនាសប្តាហ៍ទី១ នៃខែមិថុនា (០១-០៧) មានភ្ញៀវទេសចរផ្ទៃក្នុងដែលបានចេញដើរទស្សនានៅតាមរមណីយដ្ឋានទេសចរណ៍ សហគមន៍ទេសចរណ៍-អេកូទេសចរណ៍នៅទូទាំងប្រទេស មានចំនួន ១៥៧,៩៤២ នាក់ កើនឡើង ២៤.២០ភាគរយធៀបនឹងសប្តាហ៍មុន» ។ លោករដ្ឋមន្ត្រីបញ្ចាក់ថា ក្នុងចំណោមភ្ញៀវទេសចរក្នុងស្រុកទាំងនេះភ្ញៀវជាតិមានចំនួន ១៥៤,២៨៦នាក់ កើនឡើង ២៤.០៧ភាគរយ ចំណែកភ្ញៀវបរទេសក្នុងប្រទេសវិញមានចំនួន ៣,៦៥៦ នាក់ កើនឡើង ៣០.៤៣ភាគរយ ។
ជាការកត់សម្គាល់ ក្នុងសប្តាហ៍កន្លងមកនេះភ្ញៀវទេសចរផ្ទៃក្នុងបានហក់ឡើងខ្ពស់ជាងសប្តាហ៍មុនៗ ពិ សេសខេត្តតំបន់ឆ្នេរនៅតែជាគោលដៅទេសចរណ៍យ៉ាងសំខាន់ដែលបានទាក់ទាញភ្ញៀវទេសចរផ្ទៃក្នុងច្រើន (ជាង៥០ភាគរយនៃទេសចរផ្ទៃក្នុងសរុប) ។
រីឯខេត្តបាត់ដំបងឃើញថា កើនឡើងជាង១៣ភាគរយ នៃភ្ញៀវទេសចរផ្ទៃក្នុងសរុប ។ ខេត្តសៀមរាបបានបង្ហាញសញ្ញានៃការងើបឡើងខ្លះបើទោះបីជាចំនួនភ្ញៀវទេសចរនៅមិនទាន់មានចំនួនច្រើនវិញនៅឡើយ ខណៈដែលសណ្ឋាគារ និងផ្ទះសំណាក់មួយចំនួនបានបើកដំណើរការអាជីវកម្មឡើងវិញ ។
លោករដ្ឋមន្ត្រីបានបន្តទៀតថា ភ្ញៀវទេសចរជាតិយ៉ាងច្រើនគួរសមបានទៅកម្សាន្តនៅតំបន់អង្គរ ពិសេសជាលក្ខណៈក្រុមគ្រួសារ និងការជិះកង់កម្សាន្តជាក្រុមៗ ។
បើទោះជាយ៉ាងនេះក្តីលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានលើកឡើងថា «ក្រុមហ៊ុនទេសចរណ៍ក្នុងស្រុកមួយចំនួនក្នុងប្រទេសកម្ពុជាបានក៏កំពុងតែរៀបចំដំណើរកម្សាន្តជាលក្ខណៈគ្រួសារ ឬជាគ្រុមនេះដែរ ។ ដោយក្រុមហ៊ុនគិតថា ដើម្បីអាចជួយខាងក្រុមហ៊ុនបានខ្លះ ។ ហើយឥឡូវមានប្រមាណ២ភាគរយកន្លះនៃក្រុមហ៊ុនទេសចរណ៍ក្នុងស្រុកបានដាក់ជាកញ្ចប់ទស្សនកិច្ចនាតំបន់នានាក្នុងស្រុក ដើម្បីឱ្យអ្នកដែលចង់ធ្វើដំណើរកំសាន្ត ដែលចូលចិត្តដើរជាគ្រុម ឬគ្រួសារបានទិញកញ្ចប់ទស្សនកិច្ចនេះ ។ នេះជាការសាកល្បង នូវកញ្ជប់ទស្សនកិច្ច ប៉ុន្តែជាលទ្ធិផល បានតិចតួចណាស់»។
លោកស្រីបានបន្តទៀតថា កញ្ជប់ទស្សនកិច្ចជាគ្រុមនេះមិនទទួលបានការគាំទ្រច្រើនទេ ដោយប្រជាជនកម្ពុជាចូលចិត្តដើរជាលក្ខណៈគ្រួសារ ឬចំណាយថវិកាខ្លួនឯង ។ ពួកគាត់មិនទទួលយក កញ្ចប់ទស្សនកិច្ចជាគ្រុមនេះទេ ដូចនេះលោកស្រី សង្ឃឹមថា ប្រជាជនកម្ពុជានឹងជួយគាំទ្រ នូវកម្មវិធីកញ្ចប់ទស្សនកិច្ច ពីក្រុមហ៊ុនទេសចរណ៍ក្នុងស្រុកផងដែរ៕
ចែករំលែកព័តមាននេះ