សាលាបឋមសិក្សាជនបទចំនួន១៥សាលា ត្រូវបំពាក់ប្រព័ន្ធអប់រំតាមបែបឌីជីថល (អេឡិចត្រូនិក) ដែលផ្តល់ដោយអង្គការឆាលហ្វានកម្ពុជា (ChildFund Cambodia) ។ គម្រោងសាកល្បងនេះនឹងផ្តល់លទ្ធភាពដល់សាលាគោលដៅតាមជនបទ អាចប្រើប្រាស់ធនធានអប់រំបែបឌីជីថលសម្រាប់ការអប់រំពីចម្ងាយ ។…
សាលាបឋមសិក្សាជនបទចំនួន១៥សាលា ត្រូវបំពាក់ប្រព័ន្ធអប់រំតាមបែបឌីជីថល (អេឡិចត្រូនិក) ដែលផ្តល់ដោយអង្គការឆាលហ្វានកម្ពុជា (ChildFund Cambodia) ។
គម្រោងសាកល្បងនេះនឹងផ្តល់លទ្ធភាពដល់សាលាគោលដៅតាមជនបទ អាចប្រើប្រាស់ធនធានអប់រំបែបឌីជីថលសម្រាប់ការអប់រំពីចម្ងាយ ។ «បច្ចេកវិទ្យាថ្មីនេះនឹងផ្ដល់ឱកាសឱ្យកុមារជនបទបានស្វែងយល់ពីប្រព័ន្ធអប់រំបែបឌីជីថល និងជួយពង្រឹងសមត្ថភាពគ្រូបង្រៀនក្នុងការតាមដាន និងវាយតម្លៃសមត្ថភាពរបស់សិស្ស» នេះបើតាមការបញ្ជាក់របស់ក្រសួងអប់រំយុវជន និងកីឡា ។
នាយកដ្ឋានបច្ចេកវិទ្យាព័ត៌មាននៃក្រសួងអប់រំ យុវជន និងកីឡាបានចុះកិច្ចព្រមព្រៀងជាមួយអង្គការឆាលហ្វានកម្ពុជា (ChildFund Cambodia) កាលពីថ្ងៃទី១១ មិថុនា ដើម្បីទទួលផលពីគម្រោងសាកល្បងនេះ តាមរយៈការបំពាក់ប្រព័ន្ធមាតិកាឌីជីថល (Content Server)នេះ ។
គម្រោងនេះនឹងត្រូវសាកល្បងតាមសាលាបឋមសិក្សាក្នុងស្រុកស្វាយជ្រំ និងស្រុករមាសហែក ខេត្តស្វាយរៀង ចាប់ពីថ្ងៃទី០១ ខែមិថុនា រហូតដល់ថ្ងៃទី៣០ ខែកញ្ញា ឆ្នាំ២០២០ ។
គម្រោងនេះនឹងផ្តោតលើសិស្សពីថ្នាក់ទី១ ដល់ទី ៦ ហើយវិធានការកិច្ចការពារកុមារទាំងឡាយ នឹងត្រូវបានដាក់បញ្ចូល ដើម្បីធានាថា សិស្សរៀនសូត្រដោយគ្មានការភ័យខ្លាច ។ ក្រសួងអប់រំយុវជ និងកីឡាបានបញ្ជាក់ថា គម្រោងនេះនឹងផ្តល់លទ្ធភាពដល់សាលាគោលដៅតាមជនបទអាចប្រើប្រាស់ធនធានអប់រំបែបឌីជីថលដោយដោះស្រាយបញ្ហាពុំមានប្រព័ន្ធអ៊ីនធឺណិត សម្រាប់ការអប់រំពីចម្ងាយ ។
បច្ចេកវិទ្យាថ្មីនេះនឹងផ្ដល់ឱកាសឱ្យកុមារជនបទ បានស្វែងយល់ពីប្រព័ន្ធអប់រំបែបឌីជីថល និងជួយពង្រឹងសមត្ថភាពគ្រូបង្រៀនក្នុងការតាមដាន និងវាយតម្លៃសមត្ថភាពរបស់សិស្ស ។ កម្មវិធីនេះ មិនត្រឹមតែធានាថា កុមារអាចបន្តការសិក្សាក្នុងស្ថានភាពនៃការរីករាលដាលនៃជំងឺកូវីត១៩ ប៉ុណ្ណោះទេ តែជាការជួយឱ្យសាលាតាមជនបទត្រៀមខ្លួនសម្រាប់ការវិវឌ្ឍនាពេលអនាគត ផងដែរ៕
ចែករំលែកព័តមាននេះ