រាជធានីភ្នំពេញ ៖ សមាគមខ្មែរកម្ពុជាក្រោមទាមទារឲ្យអាជ្ញាធរវៀតណាមដោះលែងពលរដ្ឋខ្មែរកម្ពុជាក្រោម និងបញ្ឈប់ការគំរាមកំហែង ។ ការទាមទារនេះ ខណៈលោក សឺន យឿង ប្រធានសមាគមខ្មែរកម្ពុជាក្រោម…
រាជធានីភ្នំពេញ ៖ សមាគមខ្មែរកម្ពុជាក្រោមទាមទារឲ្យអាជ្ញាធរវៀតណាមដោះលែងពលរដ្ឋខ្មែរកម្ពុជាក្រោម និងបញ្ឈប់ការគំរាមកំហែង ។ ការទាមទារនេះ ខណៈលោក សឺន យឿង ប្រធានសមាគមខ្មែរកម្ពុជាក្រោម សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍បានធ្វើសន្និសីទកាសែត ស្តីពីការរឹតត្បិតសិទ្ធិបញ្ចេញមតិ និងសិទ្ធិកាន់កាប់ដីធ្លី នៅទីស្នាក់ការសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ នៅសហគមន៍បុរីព្រៃនគរ ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ កាលពីថ្មីៗនេះ ។
លោក សឺន យឿង ប្រធានសមាគមខ្មែរកម្ពុជាក្រោម បានថ្លែងថា ថ្មីៗនេះនៅវៀតណាម (ទឹកដីខ្មែរកម្ពុជាក្រោម) មានបញ្ហាកើតឡើងជាបន្តបន្ទាប់ ដូចជា នៅខេត្តក្រមួនស អាជ្ញាធរវៀតណាមបានចូលចាប់ខ្លួនប្រជាពលរដ្ឋខ្មែរកម្ពុជាក្រោមចំនួន ៦នាក់ (មួយគ្រួសារ) កាលពីថ្ងៃទី៧ ខែមិថុនា ឆ្នាំ២០២០។ ការរំលោភសិទ្ធិមនុស្សខ្មែរកម្ពុជាក្រោមនៅវៀតណាមកើតឡើងជាបន្តបន្ទាប់ ។ ហើយការធ្វើសន្និសីទកាសែតនេះ គឺដើម្បីឲ្យអង្គការជាតិ និងអន្តរជាតិ ទាំងក្នុង និងក្រៅប្រទេសបានដឹងអំពីករណីខ្មែរកម្ពុជារងការរំលោភបំពានពីអាជ្ញាធរវៀតណាម ។
ចំណែកលោក សឺន ជុំជួន អគ្គលេខាធិការសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានលើកឡើងថា ដោយសារតែមានការតវ៉ាទាមទារដីស្រែរបស់ប្រជាពលរដ្ឋខ្មែរកម្ពុជាក្រោម អាជ្ញាធរវៀតណាមបានហាមឃាត់ និងបានកើតមានអំពើហិង្សាមកខ្មែរក្រោមរងរបួសប្រមាណ១០នាក់ ។ កាលពីថ្ងៃទី៧ ខែមិថុនា ឆ្នាំ២០២០ អាជ្ញាធរវៀតណាមបានចាប់ខ្លួនប្រជាពលរដ្ឋខ្មែរក្រោមមួយគ្រួសារមានគ្នាចំនួន៦នាក់ ។ ក្រៅពីនេះក៏មានការរឹតបន្តឹងសិទ្ធិសេរីភាពបញ្ចេញមតិរបស់ប្រជាពលរដ្ឋខ្មែរកម្ពុជាក្រោម តាមរយៈបណ្តាញសង្គមហ្វេសប៊ុក។
លោក សឺន ជុំជួន បានបន្តថា ទង្វើរបស់អាជ្ញាធរវៀតណាមមកលើខ្មែរកម្ពុជាក្រោម គឺជាការរំលោភសិទ្ធិមនុស្សយ៉ាងធ្ងន់ធ្ងរ និងរំលោភសិទ្ធិសេរីភាពបញ្ចេញមតិ ។ ហើយស្នើឲ្យមានការដោះលែងអ្នកដែលត្រូវបានចាប់ខ្លួន ។ ជាមួយគ្នានេះ អង្គការ សមាគមខ្មែរកម្ពុជាក្រោម បានទាមទារឲ្យអាជ្ញាធរវៀតណាមដោះលែងលោក ហ្វិន វ៉ានឌាប និងក្រុមគ្រួសារឲ្យមានសេរីភាពជាបន្ទាន់ដោយឥតលក្ខខណ្ឌ ។ បញ្ឈប់ការគំរាមកំហែង ឬចាប់ខ្លួនគ្រួសារខ្មែរក្រោមដែលពាក់ព័ន្ធដីស្រែ ៣០០០ហិកតា នៅភូមិ-ឃុំ ប៉ប្រក់ ស្រុកព្រៃម៉េង ខេត្តក្រមួនសរ ។
សូមឲ្យស្ថាប័នមានសមត្ថកិច្ចរបស់វៀតណាមគ្រប់លំដាប់ថ្នាក់ សហការគ្នាស្វែងរកដំណោះស្រាយ ដើម្បីផ្តល់យុត្តិធម៌ជូនប្រជាកសិករដោយកុំមានភាពរើសអើង ។ បញ្ឈប់ការគំរាមកំហែងលើពលរដ្ឋខ្មែរកម្ពុជាក្រោមដែលបានបញ្ចេញមតិតាមប្រព័ន្ធសង្គម ៕
ចែករំលែកព័តមាននេះ