រាជធានីភ្នំពេញ ៖ បន្ទាប់ពីរង់ចាំអស់រយៈពេលជិតបីខែរួចមក ទីបំផុតកីឡាករ តាញ់ មករា បានរកឃើញដៃគូដណ្តើមខ្សែក្រវាត់ពិតប្រាកដឃើញហើយគឺ ឃីម បូរ៉ា បន្ទាប់ពីប្រកួតឈ្នះ ឈុត សេរីវ៉ាន់ថង ។ កីឡាករទាំងពីរនឹងត្រូវជួបគ្នានៅលើសង្វៀនទូរទស្សន៍ស៊ីអិនស៊ី នាវេលាម៉ោង៨ និង៣០នាទីព្រឹក ថ្ងៃទី១៣ មិថុនា ក្នុងវគ្គផ្ដាច់ព្រ័ត្រដណ្ដើមខ្សែក្រវាត់និងប្រាក់រង្វាន់៦ពាន់ដុល្លារដែលកីឡាករគ្រប់រូបប្រាថ្នាចង់បាន។
គួររំលឹកថា កាលពីថ្ងៃទី២៩ ខែមករា ឆ្នាំ២០២០ តាញ់ មករា បានផ្តួលកីឡាករ បាង កាយ៉ាក ឲ្យបោះបង់ការប្រកួតក្នុងទឹកទី២ដណ្តើមបានពានរង្វាន់កម្ពុជាសង្វៀនគុនខ្មែររដូវកាលទី៣ក្រុមទី១ ដោយកូនសិស្សរបស់លោកគ្រូ ធន់ សុភា រូបនេះត្រូវចំណាយពេលជាច្រើនខែដើម្បីរង់ចាំជើងឯកក្រុមទី២ ដោយរំពឹងថា អាចនឹងបានជួបដៃគូចាស់ ឈុត សេរីវ៉ាន់ថង តែផ្ទុយមកវិញគឺ ឃីម បូរ៉ា ទៅវិញទេ។
បន្ទាប់ពីយកឈ្នះឈុត សេរីវ៉ាន់ថង កីឡាករដែលមានដើមកំណើតមកពីខេត្តកំពង់ឆ្នាំង ឃីម បូរ៉ា បាននិយាយឲ្យដឹងថា តាមពិតរូបគេចង់ជួបឈុត សេរីវ៉ាន់ថង ខ្លាំងជាង តែប៉ះឃីម បូរ៉ា ក៏មិនអីដែរព្រោះអ្នកទាំង២មានសមត្ថភាពប្រហាក់ប្រហែលគ្នា ។ លើកនេះរូបគេមានការជឿជាក់ខ្លាំង ថាអាចដណ្តើមខ្សែក្រវាត់ពីឃីម បូរ៉ា បាន ដោយហេតុផលមិនចង់ខកចិត្តម្តងហើយម្តងទៀត ព្រោះកន្លងមករូបគេធ្លាប់ឈ្នះតែពានរង្វាន់ ដោយមិនធ្លាប់ឈ្នះខ្សែក្រវាត់ម្តងណាឡើយ ។
ចំណែកឯ ឃីម បូរ៉ា ក៏ដូចគ្នា ពោលគឺគេក៏មិនធ្លាប់ឈ្នះខ្សែក្រវាត់ដូចគ្នា ទើបមានការលើកឡើងថា ជំនួបរវាងកីឡាករជើងខ្លាំងទាំងពីរលើកនេះពិតជាធ្វើឱ្យសង្វៀនទូរទស្សន៍ស៊ីអិនស៊ីកក្រើកខ្លាំងមិនខាន។
លោក ម៉ា ស៊ីថេត អ្នកគ្រប់គ្រងកម្មវិធីប្រដាល់ប្រចាំសង្វៀនទូរទស្សន៍ស៊ីអិនស៊ីបានលើកឡើងថា សម្រាប់ការប្រកួតរវាងឃីម បូរ៉ា និងតាញ់ មករា លើកនេះ អាជ្ញាកណ្ដាលនិងចៅក្រមត្រូវតែមានការប្រុងប្រយ័ត្នឱ្យបានខ្ពស់បំផុត ជាពិសេសក្នុងការកាត់ក្ដីនិងការផ្ដល់ពិន្ទុធ្វើយ៉ាងណាឱ្យមានភាពសុក្រឹតនិងយុត្តិធម៌បំផុត ដើម្បីចៀសវាងនូវការរិះគន់ពីមហាជនទូទៅ និងកីឡាករបាក់ទឹកចិត្ត ។ ទោះបីយ៉ាងណា អ្នកចាញ់លើកនេះទទួលបាន៣ពាន់ដុល្លារដែរ ប៉ុន្តែម្នាក់ៗសុទ្ធតែចង់ឈ្នះដាច់ខាតដូចគ្នាដើម្បីក្លាយជាម្ចាស់ខ្សែក្រវាត់ជើងឯកនិងទឹកប្រាក់៦ពាន់ដុល្លារ ៕ (កែសម្រួលដោយ ៖ បុប្ផា)
ចែករំលែកព័តមាននេះ