រាជធានីភ្នំពេញ ៖ លោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី៩ ខែមិថុនា ឆ្នាំ២០២០ បានសម្រេចធ្វើការចោទប្រកាន់បុរសម្នាក់ជាជាងការសក់ ពាក់ពន្ធពីបទ«រំលោភសេពសន្ថវៈ» ។ ក្រោយតំណាងអយ្យការធ្វើការចោទប្រកាន់ជាផ្លូវ ហើយសំណុំរឿងនោះ និងបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
ជាជនសង្ស័យខាងលើឈ្មោះ អ៊ុក តុលា ហៅកូឡា ភេទប្រុស អាយុ៣១ឆ្នាំ មុខរបរជាងកាត់សក់ មានទីលំនៅក្នុងខណ្ឌឬស្សីកែវ រាជធានីភ្នំពេញ ។ ចំណែកនារីដែលថាជាជនរងគ្រោះអាយុ១៧ឆ្នាំ ។
អង្គហេតុខាងលើដែលផ្តើមឡើងបណ្តាលឲ្យមានការឃាត់ខ្លួនជនសង្ស័យ ត្រូវបានសមត្ថកិច្ចបង្ហើបឲ្យដឹងថា ជនសង្ស័យ និងនារីរងគ្រោះជាមនុស្សស្នាល់គ្នាឬចាត់ទុកដូចជាសង្សាទៅហើយ ។ នៅពីថ្ងៃទី៥ ខែមិថុនា ជនសង្ស័យ និងជនរងគ្រោះ រួមមានមិត្តភក្តិជាងកាត់ម្នាក់ទៀត បានបបួលគ្នាផឹកស៊ី បណ្តាលឲ្យជនរងគ្រោះស្រវឹងទន់ខ្លួន ហើយដោយឃើញជនរងគ្រោះមានស្ថានភាពស្រវឹងដូច្នោះ ជនសង្ស័យល្បួងលួងលោមនាងឱ្យញ៉ាំគ្រឿងស្រវឹងរហូតដល់សន្លប់តែម្តង ។
សមត្ថកិច្ចបង្ហើបបន្តថា លុះពេលនារីរងគ្រោះស្រវឹងលែងដឹងខ្លួនហើយ ជាងកាត់សក់រួមនេះ រួមជាមួយមិត្តភក្តិបានកៀងនាងចូលទៅក្នុងផ្ទះសំណាក់ ដើម្បីចាប់បំពានសេពសន្ថវៈ ប៉ុន្តែពេលនោះម្ចាស់ផ្ទះសំណាក់មិនព្រមជួលបន្ទប់ឲ្យនោះទេ ខណៈឃើញក្រុមយុវជនស្រវឹងដាបទាំងអស់គ្នាបែបនេះ ។
សមត្ថកិច្ចបង្ហើបទៀតថា បន្ទាប់ពីម្ចាស់ផ្ទះសំណាក់គេមិនជួលបន្ទប់ឲ្យនោះ ជនសង្ស័យបានដឹកជនរងគ្រោះស្រវឹងមិនដឹងខ្លួនចេញទៅបាត់ទៅ ។ នេះបើតាមការឆែកមើលកាមេរ៉ាសុវត្ថិភាព ដែលសាច់ញាតិនារីរងគ្រោះបង្ហាញប្រាប់សមត្ថកិច្ច ។
សូមបញ្ជាក់ថា នៅថ្ងៃទី៥ ខែមិថុនា ឆ្នាំ២០២០ នោះ គឺមានការភ្ញាក់ផ្អើលយ៉ាងខ្លាំងមួយ ដោយមានការឡោមពទ្ធចាប់ខ្លួនបុរសម្នាក់ឈ្មោះ អ៊ុក តុលា ជាជាងកាត់សក់ ដែលរងនូវការចោទប្រកាន់ពីបទ «រំលោភសេពសន្ថវៈ» លើនារីអាយុ១៧ឆ្នាំម្នាក់ នៅក្នុងផ្ទះសំណាក់យីហោ MOTO ស្ថិតក្នុងសង្កាត់បឹងកក់ទី១ ខណ្ឌទួលគោក ។
ជនសង្ស័យត្រូវបានកម្លាំងសមត្ថកិច្ចនាំទៅសាកសួរនៅអធិការដ្ឋាននគរបាលខណ្ឌឬស្សីកែវ ដោយសារករណីនេះដំបូងឡើយកើតនៅទីនោះ ចំណែកនារីរងគ្រោះត្រូវបានសាច់ញាតិ និងក្រុមគ្រួសារនាំចេញទៅបាត់ដែរ ប៉ុន្តែក្រោយមកក្រុមគ្រួសារជនរងគ្រោះបានទៅដាក់ពាក្យបណ្តឹងប្តឹងជាងកាត់សក់នោះ ។
បច្ចុប្បន្ននេះ ជនសង្ស័យពាក់ព័ន្ធសំណុំរឿងនេះ ត្រូវបានសមត្ថកិច្ចនគរបាលខណ្ឌឬស្សីកែវ បញ្ជូនទៅកាន់សាលាដំបូងរាជធានីភ្នំពេញ នៅថ្ងៃទី៦ ខែមិថុនា ដែលតំណាងអយ្យការបានបើកការស៊ើបសួររហូតដល់ទីបញ្ចប់ នឹងសម្រេចឃុំខ្លួនដាក់ពន្ធនាគារជាបណ្តោះអាសន្នតែម្តង ៕
ចែករំលែកព័តមាននេះ