រាជធានីភ្នំពេញ ៖ ស្ត្រីម្នាក់មានផ្ទៃពោះ៨ខែបាននាំកូនប្រុសតូចអាយុ៥ឆ្នាំម្នាក់ធ្វើដំណើរទៅកាន់ប៉ុស្តិ៍នគរបាលចោមចៅទី៣ នៃខណ្ឌពោធិ៍សែនជ័យ កាលពីវេលាម៉ោង១១និង២៥ព្រឹកថ្ងៃទី១១ ខែមិថុនា ឆ្នាំ២០២០ ដើម្បីដាក់ពាក្យប្ដឹងឲ្យនគរបាលជួយអន្តរាគមន៍ដោយបានចោទប្រកាន់បុរសជាប្ដីថា បានធ្វើសកម្មភាពឆបោកលុយពីនាងជិត៧០០ដុល្លារដែលត្រៀមបម្រុងទុកសម្រាប់សម្រាលកូន រួមទាំងម៉ូតូកង់បី១គ្រឿងផងរត់ចោលនាងនិងកូនប្រុសខាងលើព្រមទាំងកូននៅក្នុងផ្ទៃ ដោយទៅរស់នៅជាមួយស្រីថ្មីបាត់ស្រមោលគ្មានអាល័យសូម្បីបន្តិចសោះ។
ស្ត្រីខាងលើឈ្មោះនាក់ ពៅមុនី អាយុ៣១ឆ្នាំ មានទីលំនៅក្នុងភូមិព្រៃតុំ ឃុំព្រៃឃ្មុំស្រុកទឹកឈូរ ខេត្តកំពត ចំណែកប្ដីឈ្មោះអុល បញ្ញា អាយុ៣២ឆ្នាំ មុខរបររត់ម៉ូតូកង់បី នៅក្នុងរាជធានីភ្នំពេញ ហើយកន្លងមកច្រើននៅម្តុំភូមិព្រៃទា សង្កាត់ចោមចៅទី៣ ប៉ុន្តែក្រោយពីមានស្រីថ្មីមក មិនដឹងថាទៅស្នាក់នៅកន្លែងណាឡើយ បុរសជាប្តីមានស្រុកកំណើត នៅក្នុងភូមិតាកឹង ឃុំព្រៃធំ ស្រុកកំពង់រោទិ៍ ខេត្តស្វាយរៀង ។
ស្ត្រីខាងលើបាននិយាយថា នាងនិងប្ដីបានរៀបការត្រឹមត្រូវតាមផ្លូវច្បាប់ មិនមែនរត់តាមគ្នាឬគ្រាន់តែសែនព្រេនដើម្បីតែគម្រប់កិច្ចឡើយ ហើយក៏បានរស់នៅជាមួយគ្នាជាប្តីប្រពន្ធរយៈពេលជិត១២ឆ្នាំកន្លងមកហើយ មិនតែប៉ុណ្ណោះចំណងដៃអាពាហ៍ពិពាហ៍ គឺទទួលបានកូនប្រុសម្នាក់អាយុ៥ឆ្នាំ និងកូនម្នាក់ទៀតនៅក្នុងផ្ទៃ៨ខែទៅហើយ។
ស្ត្រីខាងលើបានបន្តថា បន្ទាប់ពីរៀបការរួច នាងនិងប្ដីស្រឡាញ់គ្នាណាស់មានសុភមង្គលណាស់ ហើយបានខិតខំនាំគ្នារកសុីខ្លាំងណាស់ តែហាក់មិនសូវកាក់កបទេ ទើបក្រោយមកបានសម្រេចចិត្តនាំចាកចេញពីស្រុកកំណើតនៅឯខេត្តកំពត មកស្នាក់នៅផ្ទះជួលនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ពេលនោះប្ដីនាងបានរត់ម៉ូតូកង់បីដឹកម៉ូយនៅក្នុងរាជធានីភ្នំពេញ ឯនាងនៅផ្ទះមើលកូន មិនអាចចេញទៅរកសុីបានទេ ព្រោះកូនក៏នៅតូច ម្យ៉ាងកំពុងពរពោះកូននៅក្នុងផ្ទៃទៀតផង។
ស្ត្រីខាងលើបានបន្តទៀតថា រហូតដល់ខែមិនា ឆ្នាំ២០២០ នាងបានវិលទៅរស់នៅជាមួយឪពុកម្ដាយនៅឯស្រុកកំណើត ក្នុងខេត្តកំពតវិញ ដោយទុកឲ្យប្តីស្នាក់នៅរកសុីនៅរាជធានីភ្នំពេញម្នាក់ឯង ហើយក៏មិនបានគិតថា គ្រួសារមានភាពរង្គោះរង្គើរបែបនេះទេ ។ ខណៈនាងទៅបាត់ ស្រាប់តែប្តីលួចមានស្រីក្មេងអាយុតិចជាងនាង៣ទៅ៤ឆ្នាំ ហើយរឿងនេះនាងក៏បានសង្ស័យយូរមកហើយដែរ គឺតាំងពីមិនទាន់ត្រឡប់ទៅស្រុកមកម៉្លេះ ។ ព្រោះពេលនោះលោកប្ដីតែងតែបាត់មិនសូវមកផ្ទះទេ ហើយបើពេលណាមកដល់ផ្ទះម្ដងៗវិញគឺតែងតែរករឿងនាង ដោយគ្មានមូលហេតុ ខុសប្លែកពីពេលមុនៗ លុះក្រោយពីតាមសង្កេតមើលយូរទៅ ទើបនាងបានដឹងរឿងប្ដីមានស្រីច្បាស់ ហើយនាងបានអង្វរសុំកុំឲ្យប្ដីធ្វើបែបនេះអី សូមអាណិតដល់រូបនាងនិងកូនប្រុសព្រមទាំងកូននៅក្នុងផ្ទៃផង ប៉ុន្តែប្ដីមិនបានស្ដាប់ឡើយ។
ស្ត្រីខាងលើបានបន្តទៀតថា លុះក្រោយមកទៀត បុរសជាប្តីបានធ្វើដំណើរទៅតាមនាងដល់ផ្ទះនៅឯខេត្តកំពត នៅពេលបានជួបនាងហើយបាននិយាយលួងលោមនាងថា «បងឈប់មានស្រីចោលអូននិងកូនទៀតហើយ គឺស្រឡាញ់តែអូនដែលជាប្រពន្ធប៉ុណ្ណោះ » ។ បន្ទាប់មកបានលួងលោមសុំខ្ចីលុយពីនាងចំនួន៦៥០ដុល្លារ ដោយប្រាប់ថា យកទៅលស់យកម៉ូតូកង់បីដែលបានដាក់បញ្ចាំគេនៅភ្នំពេញ ដោយប្តីប្រាប់ថា ជួបបញ្ហាគ្មានលុយសម្រាប់ដោះស្រាយ ទើបបញ្ចាំកង់បីហា ប៉ុន្តែមិនបានប្រាប់ថា មានបញ្ហាអ្វីនោះទេ។
ស្ត្រីខាងលើបានរៀបរាប់បន្តទៀតថា ដោយសារតែជឿជាក់ប្ដីខ្លាំងពេក ទើបនាងក៏ព្រមឲ្យលុយចំនួន៦៥០ដុល្លារទៅប្ដី ដើម្បីយកទៅលស់ម៉ូតូកង់បីទាំងការអាណិតអាសូរប្ដីយ៉ាងខ្លាំងថែមទៀតផង ចំណែកប្ដីវិញ បន្ទាប់ពីបានលុយដល់ដៃក៏បានចាកចេញត្រឡប់មកភ្នំពេញវិញបាត់ ។ ហើយរឿងដែលនាងនឹកស្មានមិនដល់នោះគឺក្រោយពេលប្ដីចាកចេញមកភ្នំពេញ លុះពេលនាងខលសួរសុខទុក្ខចង់ដឹងថាប្ដីដល់ភ្នំពេញហើយឬនៅ ប៉ុន្តែទូរស័ព្ទខលអត់ចូលសោះ ដែលជាហេតុធ្វើឲ្យនាងមានការព្រួយបារម្ភខ្លាំងណាស់ ព្រោះខ្លាចប្ដីមានគ្រោះថ្នាក់កើតឡើងជាយថាហេតុ ហើយក៏បានសម្រេចចិត្តនាំកូនប្រុសធ្វើដំណើរចាកចេញពីស្រុកកំណើតមកតាមរកប្ដីនៅភ្នំពេញ ។
ស្ត្រីខាងលើបានរៀបរាប់បន្តទៀតថា លុះពេលនាងទៅដល់កន្លែងដែលប្ដីធ្លាប់ស្នាក់នៅនិងចតកង់បីរាល់ថ្ងៃ ទើបធ្វើឲ្យនាងភ្ញាក់ខ្លួន ហើយដឹងថាប្ដីឆបោកយកលុយរត់តាមស្រីថ្មី ព្រមទាំងបិទទូរស័ព្ទចោលលែងឲ្យនាងទាក់ទងបាន ព្រោះអ្នកធ្លាប់ស្គាល់បានប្រាប់នាងថា មួយរយៈពេលយូរដែរ ហើយមិនដែលឃើញប្ដីនាងរត់ម៉ូតូកង់បីទេ ហើយក៏អត់ដឹងថានៅទីណាដែរ។
ស្ត្រីខាងលើបានរៀបរាប់បន្តទៀតថា ពេលនេះគ្មានជម្រើសអ្វីផ្សេងក្រៅតែពីរត់រកសុំឲ្យនគរបាលជួយអន្តរាគមន៍នោះទេ បន្ទាប់មកនាងបាននាំកូនប្រុសធ្វើដំណើរទៅកាន់ប៉ុស្តិ៍ចោមចៅទី៣ ដើម្បីដាក់ពាក្យប្ដឹងសុំឲ្យនគរបាលជួយស្រាវជ្រាវរកប្ដីនាងឲ្យចូលខ្លួនដើម្បីដោះស្រាយគ្នា ព្រោះពេលនេះនាងត្រូវទទួលបន្ទុកចិញ្ចឹមកូនផង និងកំពុងមានផ្ទៃពោះ៨ខែថែមទៀតហើយគ្មានប្រាក់ដើម្បីសម្រាលកូនទេ ប្រាក់ដែលត្រៀមទុកពេលសម្រាលកូន ត្រូវប្ដីបោកយកទៅផ្គាប់ចិត្តស្រីថ្មីអស់ទៅហើយ៕ (កែសម្រួលដោយ ៖ ធីតា)
ចែករំលែកព័តមាននេះ