រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ផ្ទះលក់អីវ៉ាន់ចាបហ៊ួយមួយកន្លែងបានបិទទ្វារ ហើយនាំប្រពន្ធទៅសំរាលកូននៅមន្ទីរពេទ្យ ស្រាប់តែត្រូវអគ្គិភ័យឆាបឆេះ បណ្តាលឲ្យរងការខូចខាតសម្ភារៈស្ទើរទាំងស្រុង ដែលសរុបជាថវិកាជាង១ម៉ឺនដុល្លារ បង្កឱ្យមានការភ្ញាក់ផ្អើលដល់ប្រជាពលរដ្ឋនៅជិតនាំគ្នាជួយវាយទំលុះទ្វារ ដើម្បីយកទឹកបាញ់ពន្លត់កាលពីម៉ោង១២អធ្រាត្រថ្ងៃទី១០ ខែមិថុនា ឆ្នាំ២០២០ ស្ថិតនៅភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ ។
សេចក្តីរាយការណ៍បន្តថា ម្ចាស់ផ្ទះរងគ្រោះខាងលើឈ្មោះ សំបូរ ភេទប្រុស អាយុ៣៧ឆ្នាំ មុខរបរលក់អីវ៉ាន់ចាបហ៊ួយ ស្នាក់នៅផ្ទះកើតហេតុ មានស្រុកកំណើតនៅភូមិ កោះចិន ឃុំពាមពភ្លោះ ស្រុកកោះសុទិន ខេត្តកំពង់ចាម។
តាមប្រភពពីពលរដ្ឋជិតកន្លែងកើតហេតុ បានប្រាប់ថា នៅមុនកើតហេតុ ពួកគាត់កំពុងតែដេកលង់លក់ ក៏ស្រាប់តែមានផ្សែងហុយខ្លាំង បណ្តាលឲ្យឈ្លក់ក៏នាំគ្នាផ្អើលឆោឡោមករកមើល ស្រាប់តែឃើញអណ្តាតភ្លើងកំពុងតែឆេះចេញផ្ទះលក់ចាបហួយដែលបានចាក់សោពីខាងក្រៅជាប់ ។ ភ្លាមៗនោះពួកគាត់ក៏នាំគ្នាវាយទំលុះទ្វារ ហើយអ្នកខ្លះទាញទុយោទឹកមកបាញ់ពន្លត់ អ្នកខ្លះទៀតយកធុងដងទឹកជះ និងទាក់ទងទៅសមត្ថកិច្ចនគរបាលប៉ុស្តិ៍ចោមចៅទី៣ ។
ពេលដឹងដំណឹងភ្លាម លោក ថេង កុសល ដែលជាមេប៉ុស្តិ៍ចោមចៅទី៣ បានដឹកនាំកម្លាំងចុះទៅអន្តរាគមន៍កន្លែងកើតហេតុភ្លាមៗទាន់ពេលវេលា បន្ទាប់មកប្រជាពលរដ្ឋដែលជួលផ្ទះនៅជាន់ខាងលើផ្ទះដែលកំពុងតែឆេះនេះ បានទាក់ទងទៅហៅម្ចាស់ផ្ទះដែលកំពុងតែនាំប្រពន្ធបទៅសំរាលកូននៅមន្ទីរពេទ្យ។
បើតាមសម្ដីម្ចាស់ផ្ទះគាត់បានបញ្ជាក់ប្រាប់ថា មុនពេលកើតហេតុ គាត់បាននាំប្រពន្ធទៅ សម្រាលកូននៅមន្ទីរពេទ្យចំនួន២យប់២ថ្ងៃមកហើយ ដោយចាក់សោផ្ទះទុកចោលមិនមានអ្នកនៅផ្ទះទេ ហើយការសម្រាលកូនលើកនេះជាកូនទី២ ហើយចំពោះការឆេះនេះ បណ្តាលខូចខាតសម្ភារៈស្ទើរទាំងស្រុងដែលសរុបជាថវិកាជាង១ម៉ឺនដុល្លារឯណោះ ។
គួរបញ្ជាក់ថា អគ្គិភ័យខាងលើនេះ ប្រជាពលរដ្ឋនាំគ្នាបាញ់ពន្លត់អស់រយៈពេលចំនួន១ម៉ោងទើបរលត់ទៅវិញ ដោយមិនបានប្រើប្រាស់រថយន្តពន្លត់អគ្គិភ័យនោះ ទេ គឺមានតែប្រជាពលរដ្ឋជួយពន្លត់ រួមជាមួយសមត្ថកិច្ច និងអាជ្ញាធរមូលដ្ឋានតែប៉ុណ្ណោះ ។ ចំពោះមូលហេតុដែលបណ្តាលឲ្យឆេះផ្ទះ ត្រូវបានគេសង្ស័យថា ប្រហែលមកទុស្សេខ្សែភ្លើងហើយ ប៉ុន្តែយ៉ាងណាក៏ដោយ ពេលនេះសមត្ថកិច្ចកំពុងតែស្រាវជ្រាវបន្តទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ