ក្រុងព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីអគ្គិភ័យមួយបានឆាបឆេះបឹងកាឡូចំនួន២យ៉ាងសន្ធោសន្ធៅ បង្កឱ្យមានការភ្ញាក់ផ្អើលកាលពីម៉ោង៥ព្រឹកព្រលឹម ថ្ងៃទី១១ ខែមិថុនា ឆ្នាំ២០២០ ស្ថិតក្នុងសង្កាត់លេខ៤ ក្រុងព្រះសីហនុ។…
ក្រុងព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីអគ្គិភ័យមួយបានឆាបឆេះបឹងកាឡូចំនួន២យ៉ាងសន្ធោសន្ធៅ បង្កឱ្យមានការភ្ញាក់ផ្អើលកាលពីម៉ោង៥ព្រឹកព្រលឹម ថ្ងៃទី១១ ខែមិថុនា ឆ្នាំ២០២០ ស្ថិតក្នុងសង្កាត់លេខ៤ ក្រុងព្រះសីហនុ។ ហើយក្នុងហេតុការណ៍នោះសមត្ថកិច្ចចម្រុះផ្នែកពន្លត់អគ្គីភ័យ កំពុងអន្តាគមន៍ពន្លត់នៅទីតាំងកន្លែងកើតហេតុហើយ ។
សេចក្តីរាយការណ៍បន្តថា បឹងកាឡូចំនួន២ទីតាំងខាងលើនេះ មាន ទីតាំងទី១-ឈ្មោះ ហ្វូតព្រីន មានចំនួន១៤តូប និងភោជនីយដ្ឋាន១ រួមទាំងសម្ភារមួយចំនួនត្រូវអគ្គិភ័យឆាបឆេះអស់ទាំងស្រុង ។ ចំណែកទីតាំង២-ឈ្មោះ បាណាណា មានចំនួន១៣តូប រួមទាំងសម្ភារមួយចំនួនទៀត ក៏ត្រូវអគ្គិភ័យលេបប្របាក់ខ្ទេចអស់ទាំងស្រុងផងដែរ ។
តាមប្រភពពីលោកឧត្តមសេនីយ៍ត្រី ប៊ូ សុធី ស្នងការរងទទួលបន្ទុកបង្ការ និងពន្លត់អគ្គីភ័យ នៃស្នងការដ្ឋាននគរបាលខេត្ត បានឲ្យដឹងថា ចំពោះមូលហេតុដែលបណ្ដាលឲ្យមានការឆាបឆេះនេះ គេនៅពុំទាន់ដឹងនៅឡើយទេ គ្រាន់តែគេសង្ស័យថា អាចមកពីឆ្លងចរន្តអគ្គិសនី ប៉ុន្តែពេលនេះសមត្ថកិច្ចកំពុងតែបន្តធ្វើការស្រាវជ្រាវ និងស៊ើបអង្កេតលើរកមូលហេតុនៃករណីអគ្គិភ័យខាងលើនេះឱ្យកាន់តែច្បាស់ហើយ។
គួរបញ្ជាក់ថា ហេតុការណ៍អគ្គិភ័យខាងលើបានប្រើប្រាស់រថយន្តពន្លត់អគ្គិភ័យអស់ចំនួន៣គ្រឿង និងប្រើប្រាស់ទឹកសរុប៨ឡានផងដែរ ដើម្បីអន្តរាគមន៍បាញ់ទឹកពន្លត់ លុះរហូតដល់ម៉ោង៦និង១០នាទីព្រឹកថ្ងៃដដែល ទើបភ្លើងបានរលត់ទាំងស្រុង ហើយករណីនេះ មិនបណ្តាលឱ្យមានអ្នកនរណាម្នាក់រងរបួសឡើយ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ