ខេត្តស្វាយរៀង ៖ សូមស្គាល់មុខម្ហូបដែលអ្នកខេត្តស្វាយរៀងតែងតែធ្វើម្ហូបសម្រាប់បរិភោគប្រចាំថ្ងៃ និងនៅពេលមានពិធីតូចធំ គឺមានមុខម្ហូបជាច្រើនដែលអ្នកស្វាយរៀងចូលចិត្តធ្វើបរិភោគ ឬទទួលភ្ញៀវ ហើយមហាជនដែលមកពីខេត្តផ្សេងៗ មកលេងសាច់ញាតិត្រូវដឹងអំពីមុខម្ហូបទាំងអស់នេះ មិនថានៅជនបទ ឬបណ្តាស្រុក ក្រុងនានាក្នុងខេត្តស្វាយរៀង។ សូមមកស្គាល់មុខម្ហូបចំនួន០៥មុខ ដែលបងប្អូនអ្នកនៅខេត្តស្វាយរៀងតែងតែធ្វើជាប្រចាំសម្រាប់បរិភោគ និងទទួលភ្ញៀវក្នុងពិធីផ្សេងៗ។ យើងខ្ញុំសូមបង្ហាញជួនដូចខាងក្រោម ៖
ទី១.សម្លកកូរកណ្តៀង សម្លកកូរកណ្តៀង ជាទីពេញនិយម សម្រាប់មន្ត្រីរាជការក៏ដូចជាប្រជាពលរដ្ឋដែលមានដើមកំណើតនៅខេត្តស្វាយរៀង ហើយតាមរយៈ មុខម្ហូបមួយនេះ(សម្លកណ្តៀង) គេនឹងអាចសម្គាល់ដឹងបានថា ជាម្ហូបអ្នកខេត្តស្វាយរៀង និងមានលក់ នៅតាមហាង ឬភោជនីយដ្ឋាននានាក្នុងខេត្តស្វាយរៀង ព្រមទាំងពេញនិយមផងដែរ ក្នុងការធ្វើម្ហូបប្រចាំថ្ងៃ និងពេលមានពិធីផ្សេងៗ។
សម្លកកូរកណ្តៀង គេជ្រើសរើស ត្រីរ៉ស់ ឬត្រីអណ្តែង ធំៗ កាត់ជាកង់ហើយអ្នកខ្លះចិញ្ច្រាំ ឬហាន់សាច់ជ្រូកបីជាន់លាយ។ អ្នកខ្លះគេប្រើសាច់មាន់ អ្នកខ្លះទៀត ចូលចិត្តស្លជាមួយកូនត្រីជញ្ជាត់។ ទី២.ផ្អកត្រីប្រៃ ឬផ្អកត្រីក្រឹម ដោយប្រើខ្ញីហាន់ដាក់មួយៗអ្នកខ្លះ ប្រើម្ទេស អាចសត្វ និងមានអន្លក់បន្លែពពាយ ត្រប់ស្រួយ ត្រសក់។ ហើយផ្អកត្រីប្រៃ ឬផ្អកក្រឹម នេះគេមានអាំងត្រីរ៉ស់ត្រីអណ្តែងទន់ផ្គាប់ជាមួយផងដែរ។
ចំពោះផ្អកត្រីប្រៃ ឬផ្អកត្រីក្រឹមអ្នកស្វាយរៀង ក៏ជាម្ហូបប្រចាំសម្រាប់ខេត្តស្វាយរៀងគឺសម្បូរនៅរដូវវស្សា និងក្រោយរដូវវស្សាប៉ុណ្ណោះក៏ប៉ុន្តែមានគេទុក រហូតដល់ខួបវិញក៏មាន។ ទី៣.ជ្រក់ត្រាវ ចំពោះជ្រក់ត្រាវនេះក៏គេមិនចោលផងដែរ ព្រោះជ្រក់ត្រាវគេ តែងតែយកផ្គាប់ជាមួយត្រីអាំងគ្រប់ប្រភេទដែលបង្ហាញឲ្យដឹងថា មុខម្ហូបអ្នកខេត្តស្វាយរៀង។
ទី៤. សាច់ជ្រូកលីងជាមួយជ្រក់សណ្តែក គឺនិយមមែនទែន សាច់ជ្រូកលីងជាមួយជ្រក់សណ្តែកនេះ ដែរអ្នកខេត្តស្វាយរៀងគេមិនដែលចោលនោះទេគេតែងតែយកមកធ្វើម្ហូបនៅក្នុងកម្មវិធីមង្គលការ និងបុណ្យទានផ្សេងៗ ហើយសាច់ជ្រូកលីងជ្រក់សណ្តែកនេះ ក៏គេអាចសម្គាល់ថា ជាអ្នកខេត្តស្វាយរៀង ផងដែរ។
ទី៥.ខខ្នុរជើងជ្រូក គេជ្រើសរើសផ្លែខ្នុរ ចាស់ឬស្រគាល គេចិតសម្បកបន្លាចេញ ហើយកាប់ដុំៗប៉ុនកដៃ ជើងជ្រូក និងសាច់ជ្រូក គេកាប់ប៉ុនៗកំភួនដៃ (ខ) ពិតជាឆ្ងាញ់មែន។ ហើយអាហាពេលព្រឹកពេញនិយមនោះគឺ នំបញ្ចុកសម្លខ្មែរ ពេលមានពិធីបុណ្យទានគេមិនចោល នំបញ្ចុកទេ។ ហើយបបរបាញ់កាញ់ ជាអាហារមួយផងដែរសម្រាប់អ្នកខេត្តស្វាយរៀង គេតែងតែ ឃើញយកបបរបាញ់កាញ់យកមកធ្វើនៅក្នុងកម្មវិធីបុណ្យគ្រប់ប្រភេទ និងទទួលភ្ញៀវក្នុងពិធីហែជំនូន និង ពិធីឡើងផ្ទះជាដើម។ ហើយមានមុខម្ហូបជាច្រើនទៀតគួរតែដឹង ដោយអ្នកស្វាយរៀងមានមុខម្ហូបជាច្រើន ដែលខេត្ត នានាមិនមាន យើងខ្ញុំ និងលើកយកមកបង្ហាញនៅពេលក្រោយទៀត៕ ដោយ ៖ វ៉ាន់ ប៊ុនធឿន
ចែករំលែកព័តមាននេះ