ខេត្តមណ្ឌលគិរី ៖ ក្នុងរយៈពេល៣ថ្ងៃសត្វព្រៃ៣ប្រភេទត្រូវបានមន្ត្រីជំនាញលែងឲ្យមានសេរីភាពទៅក្នុងព្រៃធម្មជាតិវិញ ក្រោយពីចាប់រឹបអូសពីជនល្មើស ដែលរួមមានទោច ឈ្លូស និងពង្រូល ។
មន្ត្រីមន្ទីរបរិស្ថានខេត្ត បានឲ្យដឹងថា នៅថ្ងៃទី៧ ខែមិថុនា ឆ្នាំ២០២០ មន្ត្រីឧទ្យានុរក្សដែនជម្រកសត្វព្រៃស្រែនៃមន្ទីរបរិស្ថានខេត្ត សហការជាមួយអង្គការWWF បានលែងឈ្លូសឈ្មោលជំទង់១ក្បាលទៅក្នុងព្រៃធម្មជាតិវិញ បន្ទាប់ពីទទួលបានការថែទាំ និងព្យាបាលអស់រយៈពេល២ថ្ងៃដោយមន្ត្រីពេទ្យសត្វ ខណៈឈ្លូស១ក្បាលនេះចុះខ្សោយកម្លាំងខ្លាំង និងការរងសម្ពាធដែលបណ្តាលឲ្យមានកម្រិតស្ត្រេសខ្ពស់ (myopathy) ។
គួរបញ្ជាក់ថា ឈ្លូស១ក្បាលនេះ ត្រូវបានប្រជាពលរដ្ឋរស់នៅក្នុងសហគមន៍តំបន់ការពារធម្មជាតិក្នុងភូមិសាស្ត្រឃុំពូជ្រៃ ស្រុកពេជ្រាដាប្រទះឃើញមានសភាពខ្សោះកម្លាំងគួរឲ្យអាណិត ក៏បានទាក់ទងទៅមន្ត្រីឧទ្យានុរក្សដើម្បីសង្គ្រោះ និងថែទាំសុខភាព ។
ផ្អែកតាមលទ្ធផលពិនិត្យនិងវិភាគរោគវិនិច្ឆ័យពីសំណាក់មន្ត្រីពេទ្យសត្វបង្ហាញថា ឈ្លូស១ក្បាលនេះខ្សោះជាតិទឹកខ្លាំង និងមានកម្រិតស្ត្រេសខ្ពស់ តែមិនមានរងរបួសអ្វីទេ ។ ដូច្នេះអ្នកជំនាញបានផ្តល់អាហារនិងទឹក ព្រមទាំងផ្តល់ការព្យាបាលចាំបាច់នានា ដោយការតាមដានសុខភាព និងថែទាំជាប់ជាប្រចាំក្នុងរយៈពេល២ថ្ងៃ រហូតដល់អ្នកជំនាញបញ្ជាក់ថា ឈ្លូស១ក្បាលនេះមានសុខភាពប្រសើរឡើងវិញ និងមានលទ្ធភាពអាចវិលត្រឡប់ទៅក្នុងព្រៃវិញបាន ទើបមន្ត្រីឧទ្យានុរក្សនិងអ្នកជំនាញរបស់អង្គការ WWF យកវាទៅលែងចូលទៅទីជម្រករបស់វាវិញ។
ដោយឡែក នៅថ្ងៃទី៨ ខែមិថុនា ឆ្នាំ២០២០ មន្ត្រីរដ្ឋបាលការពារនិងអភិរក្សធម្មជាតិនៃមន្ទីរបរិស្ថានខេត្ត បានលែងទោចថ្ពាល់លឿង១ក្បាល ចូលទៅក្នុងជម្រកព្រៃធម្មជាតិវិញ បន្ទាប់ពីទទួលការសង្គ្រោះបឋម និងថែទាំសុខភាពអស់រយៈពេល២ថ្ងៃ ។ ករណីនេះកាលពីថ្ងៃទី៣ ខែមិថុនា ឆ្នាំ២០២០ មន្ត្រីឧទ្យានុរក្សដែនជម្រកសត្វព្រៃកែវសីមា បានអប់រំណែនាំប្រជាពលរដ្ឋកុំឲ្យចិញ្ចឹមសត្វព្រៃ ហើយបានទទួលយកទោចថ្ពាល់លឿង១ក្បាលពីប្រជាពលរដ្ឋរស់នៅភូមិថ្មី ឃុំស្រែព្រះ ស្រុកកែវសីមា ដើម្បីថែទាំសុខភាព និងលែងចូលទៅក្នុងព្រៃធម្មជាតិវិញ។
ទោចថ្ពាល់លឿង ជាថនិកសត្វស្ថិតក្នុងក្រុមប្រភេទមានដោយកម្រ មានឈ្មោះជាភាសាអង់
គ្លេស Yellow-cheeked Gibbon ត្រូវបានកំណត់ក្នុងឧបសម្ព័ន្ធទី១នៃអនុសញ្ញា CITES ហើយក៏ត្រូវបានចាត់ចូលក្នុងបញ្ជីក្រហមនៃ អង្គការសហភាពអន្តរជាតិអភិរក្សធនធានធម្មជាតិ (IUCN) ព្រោះពួកវាជាពពួកសត្វកំពុងរង គ្រោះថ្នាក់ ហើយក៏កំពុងប្រឈមនឹងការលួចប្រមាញ់ពីសំណាក់មនុស្ស និងការបាត់បង់ ទីជម្រក ។ ហេតុនេះ សូមរួមគ្នាថែរក្សានិងការពារសម្បត្តិធម្មជាតិនិងសត្វព្រៃ ឲ្យបានឋិតថេរគង់វង្សនិងយូរអង្វែង ។
ចំណែកពង្រូល១ក្បាល ត្រូវបានមន្ត្រីឧទ្យានុរក្សដែនជម្រកសត្វព្រៃកែវសីមា សង្គ្រោះពីការតាមប្រមាញ់ ហើយយកមកពិនិត្យនិងថែទាំសុខភាពបឋម រួចលែងវាចូលទៅរស់នៅក្នុងព្រៃធម្មជាតិវិញ កាលពីយប់ថ្ងៃទី៩ ខែមិថុនា ឆ្នាំ២០២០ នៅចំណុចព្រៃស្រោង ក្នុងភូមិសាស្ត្រដែនជម្រកសត្វព្រៃកែវសីមា ។ ជាសត្វរាត្រីចរ ពង្រូល គឺជាថនិកសត្វស្ថិតក្នុងក្រុមមានដោយកម្រ និងមានឈ្មោះជាភាសាអង់គ្លេស Sunda Pangolin ត្រូវបានកំណត់ក្នុងឧបសម្ព័ន្ធទី១ នៃអនុសញ្ញា CITES ហើយក៏ត្រូវបានចាត់ចូលក្នុងបញ្ជីក្រហមនៃអង្គការសហភាពអន្តរជាតិអភិរក្សធនធានធម្មជាតិ(IUCN) ថាជាប្រភេទសត្វដែលទទួលការគំរាមកំហែងនិងជិតផុតពូជ ។
មន្ត្រីបរិស្ថាន បានអំពាវនាវឲ្យមានការចូល រួមប្រយុទ្ធប្រឆាំងនឹងការយាយីទីជម្រក ការប្រមាញ់ និងការដាក់អន្ទាក់ ព្រមទាំងទប់ស្កាត់ការធ្វើជំនួញសត្វព្រៃគ្រប់ប្រភេទ ៕ (កែសម្រួលដោយ ៖ បុប្ផា)
ចែករំលែកព័តមាននេះ