រាជធានីភ្នំពេញ ៖ ក្រោយពីអ្នកស្រី កែ ឡេង ប្រកាសលាឈប់ពីវិស័យប៉េតង់មហាជនមានការចាប់អារម្មណ៍ថា នៅក្នុងវិស័យមួយនេះ អាចនឹងពិបាកស្វែងរកធនធានមកជំនួស ខណៈដែលធនធានក្នុងវិស័យនេះ រមែងដណ្ដើមបានមេដាយជូនជាតិស្ទើរគ្រប់កម្មវិធីប្រកួតទាំងអស់ ។ នៅក្នុងពេលនេះ អ្នកជំនាញមើលឃើញថា កីឡាការិនីវ័យក្មេងមួយរូប គឺកីឡាការិនី ស្រ៊ាង សុរ៉ាឃីម អាចនឹងក្លាយជាជម្រើសមួយនៅក្នុងវិស័យនេះ ស្របពេលដែលនាងក៏មានស្នាដៃរាប់មិនអស់ផង ។
ក្រោយចូលប្រឡូកក្នុងវិស័យកីឡាប៉េតង់ប្រមាណជាង៦ឆ្នាំ កីឡាការិនី ស្រ៊ាង សុរ៉ាឃីម ដែលមានវ័យទើបតែ២១ឆ្នាំ ទទួលបានផ្លែផ្កាមិនអន់ប៉ុន្មានទេ នៅក្នុងវិស័យកីឡាប៉េតង់។ នាងបានសាងស្នាដៃជាច្រើនទាំងក្នុងការប្រកួតលើឆាកថ្នាក់ជាតិ និងអន្តរជាតិ ខណៈដែលនាងក៏កំពុងត្រូវបានគេមើលឃើញថា អាចជំនួសការបាត់វត្តមានរបស់អ្នកស្រីកែ ឡេង បាន បើមានការជំរុញ និង បណ្ដុះបណ្ដាលដោយម៉ត់ចត់បន្តិច ។
នាងធ្លាប់ដណ្តើមបានមេដាយប្រាក់ និងសំរឹទ្ធពិភពលោកនៅប្រទេសបែលហ្ស៊ិក កាលពីឆ្នាំ២០១៧, ធ្លាប់ដណ្ដើមបានមេដាយមាស Asian Beach Games កាលពីឆ្នាំ២០១៦ នៅប្រទេសវៀតណាម និងធ្លាប់ដណ្ដើមបានមេដាយមាសកីឡាស៊ីហ្គេមនៅប្រទេសហ្វីលីពីនកាលពីឆ្នាំ២០១៩ ។ ក្នុងនោះក៏មានប្រវត្តិដណ្តើមបានស្នាដៃរាប់មិនអស់ផ្សេងទៀតផងដែរ ។
តាមរយៈសមិទ្ធផលទាំងនេះ មិនត្រឹមតែជួយឲ្យកីឡាការិនីមកពីស្រុកអង្គរបូរីខេត្តតាកែវរូបនេះ មានឈ្មោះបោះសំឡេងលើឆាកជាតិនិងអន្តរជាតិប៉ុណ្ណោះទេ ថែមទាំងជួយឲ្យរូបគេទទួលអាហារូបករណ៍សិក្សាថ្នាក់សាកលវិទ្យាល័យ១០០ភាគរយ និងបានក្របខណ្ឌការងារនៅក្រសួងការពារជាតិទៀតផង។ បច្ចុប្បន្ន សុរ៉ាឃីម មានឋានន្តរសក្តិជាអនុនាវីត្រី(ស័ក្តិ១)។
នាងជាកូនច្បងនៅក្នុងគ្រួសារដែលមានបងប្អូនពីរនាក់ ហើយកន្លងមកនាងមិនធ្លាប់ស្រមៃថា ខ្លួនអាចមានសមត្ថភាព និងសាងភាពល្បីល្បាញដូចរៀមច្បងវីរកីឡាការិនី កែ ឡេងម្ចាស់មេដាយមាសពិភពលោក៤ជំនាន់ និងកីឡាការិនី អ៊ុក ស្រីមុំ ម្ចាស់មេដាយមាសពិភពលោកនៅបែលហ្ស៊ិកកាលពីឆ្នាំ២០១៧ បែបនេះឡើយ ។ សំខាន់នាងមានសមត្ថភាព និងមានកម្លាំងល្អ ទាំងវ័យក្មេង ដែលអាចបណ្ដុះឱ្យក្លាយជាធនធានល្អសម្រាប់ជាតិមួយបាន។
កីឡាការិនីរូបនេះ រមែងបង្ហាញពីការតាំងចិត្តខ្ពស់ក្នុងការអភិវឌ្ឍសមត្ថភាព និងសាងស្នាដៃជូនជាតិបន្តនៅឆាកអន្តរជាតិ ដែលសូម្បីតែមន្ត្រីសហព័ន្ធក៏សម្លឹងមើលឃើញថា នាងអាចនឹងស្នងតំណែងអ្នកស្រី កែ ឡេង បាន ។ នាងបានផ្ដល់កិច្ចសម្ភាសន៍ដដែលជាដដែលថា នាងមិនទាន់ដឹងថានឹងអាចជំនួសតំណែងរបស់រៀមច្បង អ្នកស្រី កែ ឡេង និង អ៊ុក ស្រីមុំ បាននោះទេ ប៉ុន្តែនាងនឹងតាំងចិត្តខិតខំប្រឹងប្រែងហ្វឹកហាត់ឲ្យអស់ពីសមត្ថភាព ពោលគឺឲ្យបានខ្លាំងដើម្បីយកស្នាដៃ ។
នាងថា ទោះមិនបាន១០០ភាគរយដូចរៀមច្បងទាំង២ តែក៏ត្រូវតែប្រឹងឱ្យបាន១ភាគរយដូចអ្នកទាំងពីរនោះដែរ ។ នាងបន្តថា ទោះបីមិនទាន់ដឹងច្បាស់សម្រាប់វត្តមានក្នុងការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាធ្វើជាម្ចាស់ផ្ទះខាងមុខ តែនាងប្តេជ្ញាខិតខំប្រឹងប្រែងហ្វឹកហាត់អភិវឌ្ឍន៍សមត្ថភាពឲ្យកាន់តែប្រសើរ ដើម្បីត្រៀមប្រជែងដណ្តើមមេដាយពីព្រឹត្តិការណ៍មួយនេះ ប្រសិនបើមានការផ្ដល់ឱកាស ។ នាងបានទាំងចាត់ទុកថា កីឡាប៉េតង់ជាប្រភេទកីឡាសក្តានុពលមួយក្នុងចំណោមកីឡា១៧ប្រភេទដែលរំពឹងដណ្តើមបានមេដាយពីការប្រកួតកីឡាស៊ីហ្គេមឆ្នាំ២០២៣ នៅពេលដែលនាងត្រូវបានគេចាត់ឱ្យក្លាយជាសមាសភាពប្រកួតនោះផង ៕ (កែសម្រួលដោយ ៖ បុប្ផា)
ចែករំលែកព័តមាននេះ