ប្រទេសចិន ៖ តាមប្រភពព័ត៌មាន Bangkok Post ប្រព័ន្ធផ្សព្វផ្សាយរដ្ឋរបស់ប្រទេសចិនបានរាយការណ៍នៅថ្ងៃអង្គារ៍នេះថា ប្រទេសចិន បានលុបសត្វពង្រូលចេញពីបញ្ជីឱសថបុរាណផ្លូវការរបស់ខ្លួន បន្ទាប់ពីការបង្កើនការការពារស្របច្បាប់លើសត្វដែលជិតផុតពូជ។
សត្វពង្រូល ត្រូវបានគេឈប់យកវាធ្វើជាឱសថបុរាណហើយចាប់ពីឆ្នាំនេះ រួមជាមួយនឹងការដកចេញនូវការប្រើប្រាស់ថ្នាំធ្វើពីលាមកប្រជៀវវផងដែរ។ សត្វពង្រូល ដែលជាថនិកសត្វ ត្រូវបានគេជួញដូរច្រើនជាងគេបំផុតនៅលើពិភពលោក ហើយវាត្រូវបានអ្នកវិទ្យាសាស្ត្រមួយចំនួនគិតថា អាចជាប្រភពចម្លងជំងឺកូវីដ១៩ ដែលលេចចេញនៅផ្សារមួយក្នុងទីក្រុង Wuhan ប្រទេសចិន កាលពីឆ្នាំមុន។
វាមានតម្លៃខ្ពស់នៅលើទីផ្សារងងឹត ដោយសារវាត្រូវបានគេប្រើជាទូទៅនៅក្នុងឱសថបុរាណចិន ទោះបីជាអ្នកវិទ្យាសាស្ត្រនិយាយថា ពួកគេមិនមានតម្លៃព្យាបាលក៏ដោយ។ អាជ្ញាធរព្រៃឈើរបស់ប្រទេសចិន កាលពីថ្ងៃសុក្រ បានផ្តល់ឱ្យសត្វពង្រូលនូវការការពារខ្ពស់បំផុតនៅក្នុងប្រទេស ដោយសារតែស្ថានភាពគំរាមកំហែងជិតផុតពូជរបស់វា។
នៅក្នុងប៉ុន្មានខែថ្មីៗនេះ ប្រទេសចិន បានហាមឃាត់ការលក់សត្វព្រៃសម្រាប់ម្ហូបអាហារ ដោយលើកឡើងពីហានិភ័យនៃជំងឺដែលរាលដាលដល់មនុស្ស ប៉ុន្តែនៅតែស្របច្បាប់សម្រាប់ការស្រាវ ជ្រាវនិងឱសថបុរាណ។
មូលនិធិពិភពលោកសម្រាប់ធម្មជាតិកាលពីថ្ងៃសៅរ៍ បាននិយាយថា ខ្លួនបានស្វាគមន៍យ៉ាងខ្លាំង ចំពោះវិធានការរបស់ចិនក្នុងការធ្វើឱ្យប្រសើរឡើងនូវការការពារសត្វពង្រូល ដោយហៅវាថាជាការទប់ស្កាត់ការជួញដូរសត្វពង្រូលខុសច្បាប់៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ