ខេត្តស្វាយរៀង ៖ សហគមន៍ត្រពាំងពិការចិញ្ចឹមឃ្មុំធម្មជាតិ តាមបែបបច្ចេកទេសនៅព្រៃធម្មជាតិទទួល ផលបានល្អប្រសើរ និងចង់បានដើមទុនពង្រីកធុងចិញ្ចឹមឃ្មុំបែបធម្មជាតិនេះឲ្យបានច្រើន ដើម្បីផ្គត់ផ្គង់ទីផ្សារនិងសហគមន៍ ។ ទីតាំងចិញ្ចឹមឃ្មុំធម្មជាតិ តាមបែបបច្ចេកទេសនេះ ស្ថិតនៅភូមិត្រពាំងពិការ ឃុំ
អំពិល ស្រុករមាសហែក ។
លោក ទូច ស្រី អាយុ៤០ឆ្នាំ ជាប្រធានសហគមន៍ចិញ្ចឹមឃ្មុំព្រៃធម្មជាតិត្រពាំងពិការបានឲ្យដឹងថា ការចិញ្ចឹមឃ្មុំនេះ គឺចាប់ផ្តើមពីខែធ្នូ ឆ្នាំ២០១៩ មកដល់ខែឧសភា ២០២០នេះ គឺ៦ខែហើយ ។ ពូជឃ្មុំនេះគឺជាពូជឃ្មុំអុីតាលី ដែលមានការគាំទ្រ និងផ្តល់ពូជពីមន្ទីរកសិកម្មរុក្ខាប្រមាញ់ និងនេសាទខេត្ត ក្នុងគម្រោងកម្មវិធីរបស់ក្រសួងកសិកម្មរុក្ខាប្រមាញ់ និងនេសាទបានផ្តល់ពូជឃ្មុំចំនួន២៣ធុង ក្នុង១ធុងមានឃ្មុំចំនួន១ម៉ឺនក្បាល គិតជាទឹកប្រាក់សរុបជាង៧.០០០ដុល្លារ ។
លោក ទូច ស្រី បន្តទៀតថា ការចិញ្ចឹមឃ្មុំធម្មជាតិ រយៈពេល១៥ថ្ងៃ ប្រមូលផលម្តង២៣ធុងយកទឹកឃ្មុំបាន៤៥លីត្រ ។ លោកថាក្នុង១ខែយកទឹកឃ្មុំបាន៩០លីត្រ ហើយទឹកឃ្មុំ១លីត្រ តម្លៃ៨ម៉ឺនរៀល ឬ១ដបកន្លះលីត្រ តម្លៃ៤ម៉ឺនរៀល ។ ប្រាក់ដែលបានមកពីការលក់ទឹកឃ្មុំនេះ គឺសម្រាប់ឧបត្ថម្ភគណៈកម្មការដើរល្បាតថែរក្សាព្រៃឈើ ។ គណៈកម្មការព្រៃឈើ មានចំនួន៩នាក់ ស្រីម្នាក់ជាគណនេយ្យ ហើយសហគមន៍ពុំទាន់មានប្រាក់គាំទ្រ ឬឧបត្ថម្ភទេ គឺធ្វើការដោយស្ម័គ្រចិត្ត ។ ប្រភពបន្តទៀតថា ព្រៃឈើធម្មជាតិ មានដើមឈើចម្រុះលើផ្ទៃដីសរុប៤៤៤ហិកតា មានវល្លិ និងរុក្ខជាតិចម្រុះផ្កាផ្លែ ប្តូរគ្នាតាមរដូវខួបប្រាំងខួបវស្សា ។
លោក គង់ សុខ ជំទប់ទី១ ឃុំអំពឹល បានឲ្យដឹងថា សហគមន៍ព្រៃឈើត្រពាំងពិការ គឺបម្រើផលប្រយោជន៍ឲ្យប្រជាពលរដ្ឋភូមិត្រពាំងពិការ ដែលមានប្រជាពលរដ្ឋរស់នៅចំនួន៣៨៥គ្រួសារ មនុស្សសរុប១.៤៦៤នាក់ (ស្រី្ត៧៤៨នាក់) ។
សូមមហាជនមកដឹងអំពីដំណើរនៃជីវិតសត្វឃ្មុំ ទាំងអស់គ្នាបើតាមលោក ទូច ស្រី បានឲ្យដឹងថា ឃ្មុំជាសត្វមួយប្រភេទរស់នៅជាសហគមន៍ គ្រប់គ្រងដោយស្តេចឃ្មុំញីតែមួយគត់ ក្នុងមួយសម្បុកមានអាម៉ាតយាមសម្បុកចំនួន៥ក្បាល មានឃ្មុំកម្មករតិចច្រើនទៅតាមសម្បុកឬតាមពូជឃ្មុំតូចធំ ។ ចំណែកឃ្មុំពូជអុីតាលី ដែលអ្នកជំនាញបានចាប់យកមកដាក់ធុងចិញ្ចឹមបែបបច្ចេកទេសនេះ ក្នុងមួយធុងមានស្តេចឃ្មុំញីមួយ មានឃ្មុំអាម៉ាតអ្នកយាមសម្បុក៥ក្បាល មានឃ្មុំកម្មករ១ម៉ឺនក្បាល ។ ក្នុង១ធុងមានស្តេចឃ្មុំញីមួយគត់ ។
ស្តេចឃ្មុំញីមានតួនាទីពងបង្កើតកូន (ឃ្មុំស្តេចញីមួយ ពងបានរាប់ម៉ឺនក្បាល) និងបញ្ជាឲ្យអាម៉ាតយាមសម្បុក មើលការខុសត្រូវមិនឲ្យឃ្មុំសហគមន៍ផ្សេង ឬសម្បុកផ្សេងចូលមកក្នុងធុង ឬសម្បុក ។ មើលខ្លាចឃ្មុំកម្មករនាំលម្អងផ្កា ដែលមានជាតិពុលចូលមកក្នុងសហគមន៍ (ក្នុងធុង) ឬក្នុងសម្បុក បើមានឃ្មុំកម្មករណានាំលម្អងផ្កាដែលមានជាតិពុល មកដល់ខាងមុខធុងឬនៅមុខសម្បុកគឺខាំសម្លាប់ចោលភ្លាម ។ ហើយឃ្មុំមកពីសហគមន៍ផ្សេង ឬមកពីសម្បុកផ្សេងចូលមក ក៏ខាំសម្លាប់ចោលភ្លាមដែរ ។ ឃ្មុំអាម៉ាតមានមាឌធំជាងឃ្មុំកម្មករ ហើយស្គាល់ឃ្មុំកម្មករសម្បុកខ្លួនទាំងអស់ និងដឹងក្លិនផ្កាដែលមានជាតិពុលទៀតផង ។
សម្បុកមួយៗមានតួនាទី ឋានៈឃ្មុំអ្វីខ្លះ ?
ស្តេចឃ្មុំញី បញ្ជាឃ្មុំកម្មករឲ្យរកចំណីចិញ្ចឹមស្តេចឃ្មុំញី ចិញ្ចឹមអាម៉ាត និងកូនៗឃ្មុំកម្មករ ដោយរកទឹក និងលម្អងផ្កាមកផលិតទឹកឃ្មុំ ។ ឃ្មុំមានតែស្តេចឃ្មុំញីមួយគត់ គ្មានស្តេចឃ្មុំឈ្មោលទេ ហើយស្តេចឃ្មុំញី មានអាយុយ៉ាងតិច២ឆ្នាំ គឺស្លាប់ ។ មុននឹងស្លាប់គេបង្កើតកូន បានមួយសំបុកឬមួយធុង ។ បើមានកូនឃ្មុំឈ្មោលច្រើន គឺត្រូវខាំសម្លាប់ចោលទុកតែ៣០ក្បាល សម្រាប់បន្តបង្កើតពូជស្តេចឃ្មុំញី ។ ក្រោយពីឃ្មុំឈ្មោលបង្កាត់ពូជបង្កើតបានពូជស្តេចញីហើយ ស្តេចឃ្មុំញីសម្លាប់ឃ្មុំឈ្មោលចោលទាំងអស់ភ្លាម គឺនៅក្នុងសហគមន៍ឃ្មុំ មានស្តេចឃ្មុំញីមួយ ឃ្មុំអាម៉ាត៥ គឺញីទាំងអស់ ។
តួនាទីឃ្មុំអាមាត្យនិងឃ្មុំកម្មករមេឃ្មុំកម្មករនិងឃ្មុំកម្មករគឺញីទាំងអស់ ហើយឃ្មុំកម្មករមិនអាចបង្កើតពងកូនបានទេ មានតួនាទីតែដើររកចំណីនិងទឹកលម្អងផ្កាប៉ុណ្ណោះ ។ ស្តេចឃ្មុំញី មួយធុងឬ១សម្បុកមានតែមួយទេ បើមាន២ គឺមួយដែលកើតក្រោយត្រូវហើរចេញចោលសំបុកទៅបង្កើតសម្បុកថ្មីនាំកូនចៅ មានឃ្មុំអាម្រាតនិងឃ្មុំកម្មករទៅជាមួយ បង្កើតសហគមន៍ថ្មី ។ ស្តេចឃ្មុំញី មានមាឌធំវែង មានស្លាបតែពាក់កណ្តាលខ្លួនទេ ហើយមានអាយុយ៉ាងតិច២ឆ្នាំងាប់ ។
ឃ្មុំអាមាត្យ មាឌធំស្លាបវែងធម្មតា កាចណាស់ជាអ្នកការពារសម្បុក បើដឹងថា មិនមែនជាឃ្មុំកម្មករសំបុកខ្លួន ឬសហគមន៍ខ្លួនទេ គឺខាំសម្លាប់ចោលភ្លាម ហើយបើសត្វ ឬមនុស្សដែលចូលទៅយាយីមិនស្គាល់ គឺវាយប្រហារដោយកន្ទុយអុច ។ បើឃ្មុំផ្លិត ឬឃ្មុំចង្អេរ បើមេហ្វូងអុចហើយធំក្លិន ឃ្មុំកម្មករព្រួតគ្នាអុចរហូតរាប់រយមេអាចងាប់បាន ។ ឃ្មុំអាមាត្យនិងឃ្មុំកម្មករមានអាយុត្រឹមតែ៣ខែទេងាប់ហើយ ។
ទឹកឃ្មុំផ្អែម ឃ្មុំក្រេបលម្អងផ្កា ហើយមិនសម្លាប់ផ្កាទេ ក៏ប៉ុន្តែច្បាប់ធម្មជាតិរបស់ស្តេចឃ្មុំញីវិញគឺមិនធម្មតា រួមមេត្រីបង្កើតពងកូនហើយខាំសម្លាប់ចោលភ្លាម ទុកតែឃ្មុំញីទេ ។ ឃ្មុំញីទាំងអាមាត្យ និងឃ្មុំកម្មករគឺមិនអាចមានពងកូនទេ ។សហគមន៍ចិញ្ចឹមឃ្មុំព្រៃធម្មជាតិត្រពាំងពិការ អំពាវនាវសូមឲ្យមហាជនជួយគាំទ្រ ជួយទិញទឹកឃ្មុំ ព្រៃធម្មជាតិត្រពាំងពិការផង និងសូមឲ្យមន្ទីរក្រសួងពាក់ព័ន្ធជួយរកទីផ្សារទឹកឃ្មុំនេះផង ៕
ចែករំលែកព័តមាននេះ