រាជធានីភ្នំពេញ ៖ ប៉ុន្មានថ្ងៃមកនេះ បទចម្រៀងមួយបទដែលត្រូវបានគេផ្សព្វផ្សាយតាមរយៈ Chanel youtube មានចំណងជើងថា «កណ្តៀវអូនស្រួយ» ដែលបកស្រាយដោយកញ្ញា បរមី នោះ បានទទួលការរិះគន់ដូចទឹកបាក់ទំនប់ ក្នុងពេលដែលបទចម្រៀងនេះបានបង្កប់នូវអត្ថន័យអាសអាភាសយ៉ាងខ្លាំងនោះ។
យ៉ាងណា បន្ទាប់ពីផ្ទុះការរិះគន់យ៉ាងកងរំពងនេះរួចមក អ្នកនិពន្ធបទចម្រៀងមួយបទនេះ ត្រូវបានក្រសួងវប្បធម៌ និងវិចិត្រសិល្បៈបានកោះហៅយកទៅអប់រំណែនាំ និងបានធ្វើកិច្ចសន្យាបញ្ចប់សកម្មភាពមួយនេះ និងត្រូវលុបបទចម្រៀងខាងលើនេះចេញជាបន្ទាន់ផងដែរ។
ប្រធាននាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈលោក ប៉ុក បូរក្ស បានអះអាងប្រាប់កោះសន្តិភាពតាមសារអេឡិចត្រូនិចនៅថ្ងៃទី១០ ខែមិថុនា ឆ្នាំ២០២០នេះថា បន្ទាប់ពីមានការរិះគន់ពីមហាជនទៅលើបទចម្រៀងខាងលើនេះរួចមក ក្រសួងក៏បានចាត់វិធានការភ្លាមៗផងដែរ ទៅលើអ្នកនិពន្ធបទចម្រៀងមួយនេះ។
លោកបញ្ជាក់ថា ការងារនេះ យើងបានរកឃើញអត្តសញ្ញាណអ្នកនិពន្ធហើយ ហើយអ្នកនិពន្ធក៏បានលុបចម្រៀងពី channel YouTube រួចហើយដែរ ខណៈពេលព្រឹកនេះ យើងកំពុងជួបអ្នកនិពន្ធរូបនេះ ដើម្បីអប់រំណែនាំ និងធ្វើកិច្ចសន្យាជាផ្លូវការ។
ចំណែកប្រធានក្រុមប្រឹក្សាភិបាលនៃសមាគមសិល្បៈករខ្មែរលោក ហេង ឡុង ក៏បានបង្ហោះសារពាក់ព័ន្ធបញ្ហាខាងលើនេះផងដែរថា បទ «កណ្ដៀវអូនស្រួយ» ទាល់តែចំណងជើងបែបនេះ ទើបអាចធ្វើឱ្យបទចម្រៀងល្បីមែនទេ? អរគុណដល់ក្រុមប្រឹក្សាពិន័យ និងលើកសរសើររបស់ក្រសួងវប្បធម៌ ដែលកំពុងតែមានចំណាត់ការដើម្បីស្នើសុំឲ្យលុបបទនេះចេញពីបណ្ដាញ youtube។
ទោះជាយ៉ាងណា គេសង្កេតឃើញថា ផលិតកម្ម Domrey TV មួយនេះ មិនមែនជាលើកទី១ នោះឡើយ ដោយចេញបទចម្រៀងអក្រុមសីលធម៌បែបនេះ ពោលគឺកាលពីពេលថ្មីៗកន្លងទៅនេះ ផលិតកម្មខាងលើ ក៏បានចេញបទចម្រៀងមួយបទ ដែលមានចំណងជើងថា «ស្រណោះអង្រែ» ក៏មានន័យបង្កប់ទៅដោយពាក្យពេជន៍អាសអាភាសជាច្រើនដូចគ្នា និងបទ «កណ្ដៀវអូនស្រួយ» នេះផងដែរ។
ជាការកត់សម្គាល់ ករណីខាងលើនេះ មិនមែនជាករណីទី១ទេ ដែលបានកើតឡើង ដោយកន្លងមក ក៏មានបទចម្រៀងមួយចំនួនទៀតដែលមានអត្ថន័យស្រដៀងគ្នានេះ ក៏ត្រូវបានក្រសួងវប្បធម៌កោះហៅអ្នកនិពន្ធមកដុះក្អែល និងធ្វើកិច្ចសន្យាឲ្យបញ្ឈប់សកម្មភាពនេះដូចគ្នា។
លោក ប៉ុក បូរក្ស ធ្លាប់បានលើកឡើងថា កន្លងមក ក៏មានបទចម្រៀងមួយចំនួនទៀតក៏បានផលិតឡើង ដោយរូបភាព និងខ្លឹមសារ គ្រោតគ្រាត ប្រាសចាកប្រពៃណីទំនៀមទម្លាប់ ជាពិសេសតម្លៃ និងសេចក្តីថ្លៃថ្នូររបស់វប្បធម៌ជាតិផងដែរ និងថា បទចម្រៀងនេះ ក៏ផលិតឡើងដោយមានការការអនុញ្ញាតពីនាយកដ្ឋានដែលជាសមត្ថកិច្ចជំនាញទៀត។
លោកថា ជាទូទៅនាយកដ្ឋានតែងតែស្រាវជ្រាវរកអ្នកផលិតបទចម្រៀងទាំងនោះ ដើម្បីមកទទួលខុសត្រូវចំពោះទង្វើរបស់ខ្លួន ហើយក្នុងករណី បើសាមីជនពុំចេញមកទទួលខុសត្រូវនោះទេ នាយកដ្ឋាននឹងមានវិធានការណ៍តាមផ្លូវច្បាប់។
បើតាមលោក ប៉ុក បូរក្ស ជាទូទៅនាយកដ្ឋានយើងនៅតែរក្សាគោលការណ៍ទន់ភ្លន់ គឺអប់រំណែនាំ ព្រោះពេលខ្លះ ពួកគាត់ក៏មានស្នាដៃជួយធ្វើស្នាដៃដែលមានការអប់រំល្អដែរ មិនមែនបែបហ្នឹងតែរហូតនោះទេ ហើយជាគោលការណ៍ គឺយើងហៅគាត់មកជួប ដើម្បីអប់រំណែនាំ និងឲ្យបញ្ឈប់ការធ្វើស្នាដៃដែលប៉ះពាល់ជាតិសាសន៍ខ្លួនឯងដូច្នេះទៀតប៉ុណ្ណោះ៕ (កែសម្រួលដោយ ៖ បុប្ផា)
ចែករំលែកព័តមាននេះ