ខេត្តតាកែវ ៖ បន្ទាប់ពីពិភពលោករួម និងប្រទេសកម្ពុជាបានផ្ទុះរីករាលដាលជំងឺកូវីដ១៩ ដែលធ្វើឲ្យប៉ះពាល់ដល់សេដ្ឋកិច្ចជាតិ ជាពិសេសប៉ះពាល់ជីវភាពបងប្អូនប្រជាពលរដ្ឋ កម្មករកម្មាការិនីកាត់ដេសំលៀកបំពាក់ ក្រុមហ៊ុនមួយបានសហការជាមួយអាជ្ញាធខេត្តតាកែវ នៅព្រឹកថ្ងៃទី៩ ខែមិថុនា ឆ្នាំ២០២០នេះបានចុះចែកអំណោយដល់បងប្អូនកម្មករ កម្មាការិនីមួយចំនួន នៅក្នុងខេត្តតាកែវ ដែលទទួលរងផលប៉ះពាល់ពីជំងឺកូវីដ១៩ ដែលកម្មវិធីនេះរៀបចំធ្វើឡើងនៅសាលាក្រុងដូនកែវ ខេត្តតាកែវ ។
លោក ប៉ុន សុភា អ្នកសម្របសម្រួលសាធារណៈ និងសហគមន៍របស់ក្រុមហ៊ុនបានមានមតិសំណោះសំណាលជាមួយបងប្អូនប្រជាពលរដ្ឋដែលមកទទួលអំណោយដោយលើកឡើងថា ការចុះចែកអំណោយជាស្បៀងអាហារ និងរបស់ប្រើប្រាស់មួយចំនួនដល់បងប្អូនកម្មករ កម្មាការិនីនៅពេលនេះវាជាអំពើមនុស្សធម៌ហើយវាក៏ជាការរួមចំណែកក្នុងការកាត់បន្ថយទុក្ខលំបាករបស់បងប្អូនប្រជាពលរដ្ឋទីទ័រក្រ និងក្រុមគ្រួសារបងប្អូនកម្មករ កម្មាការិនីកាត់ដេសំលៀកបំពាក់នៅក្នុងខេត្តតាកែវ ដែលទទួលរងផលប៉ះពាល់ពីជំងឺកូវីដ១៩ ដោយសារការព្យួរការងារមួយរយៈ ។
អ្នកសម្របសម្រួលសាធារណៈ និងសហគមន៍របស់ក្រុមហ៊ុនខាងលើបានបន្តទៀតថា កន្លងមកក្រុមលោកបានធ្វើសកម្មភាពមនុស្សធម៌ជាច្រើន ក្នុងការជួយបងប្អូនប្រជាពលរដ្ឋនៅតាមបណ្ដាលខេត្តមួយចំនួនដូចជាចុះចែកស្បៀងអាហារ ចុះចែកសាប៊ូលាងដៃការពារមេរោគ ចែកម៉ាស់ និងបានចែកខិតប័ណ្ណ ប៉ាស្ទ័រ និងបាដាជាង១ម៉ឺនច្បាប់ពីវិធីបង្កា ការពារជំងឺកូវីដ១៩ ។
សកម្មភាពនេះ គឺជាទំនួលខុសត្រូវសង្គមរបស់ក្រុមហ៊ុនលោក ជាពិសេសវាជាចូលរួមចំណែកជាមួយរាជរដ្ឋាភិបាកម្ពុជា ក្នុងការជួយកាត់បន្ថយទុកលំបាករបស់បងប្អូនប្រជាពលរដ្ឋ ជាពិសេសបងប្អូនកម្មករ កម្មាការិនីដែលបំរើការនៅតាមបណ្ដាលរោងចក្រមួយចំនួនដែលទទួលរងផលប៉ះពាល់ពីការរីករាលដាលជំងឺកូវីដ១៩នេះ ។
លោក កង អាណាន់ អភិបាលក្រុងដូនកែវបានថ្លែងអំណគុណយ៉ាងជ្រាលជ្រៅចំពោះក្រុមហ៊ុន ដែលបានចូលរួមធ្វើសកម្មភាពមនុស្សធម៌តាមរយៈការចុះចែកអំណោយដល់ប្រជាពលរដ្ឋទីទ័រក្រ និងបងប្អូនកម្មករ កម្មាការិនីដែលប៉ះពាល់ជីវភាពដោយសារជំងឺកូវីដ១៩ នៅក្នុងក្រុងដូនកែវ ដែលសកម្មភាពនេះគឺជាការរួមចំណែកជាមួយរាជរដ្ឋាភិបាល អាជ្ញាធមូលដ្ឋាន ក្នុងការកាត់បន្ថយការលំបាករបស់បងប្អូនប្រជាពលរដ្ឋ និងបងប្អូនកម្មករ កម្មាការរិនី ៕
ចែករំលែកព័តមាននេះ