ប៉េកាំង៖ ប្រទេសចិនបានព្រមាននិស្សិតរបស់ខ្លួនឱ្យពិចារណាលើហានិភ័យនៃការសិក្សានៅប្រទេសអូស្ត្រាលីក្នុងកំឡុងពេលមានជំងឺរាតត្បាតកូវីដ១៩ ដែលការព្រមាននេះវាហាក់កាន់តែធ្វើឱ្យមានតានតឹងខាងជម្លោះនយោបាយរវាងប្រទេសទាំងពីរ ។ នេះបើយោងតាមការចុះផ្សាយរបស់ BBC ថ្ងៃទី១០ ខែមិថុនា ។
ក្រសួងអប់រំចិនកាលពីថ្ងៃអង្គារ ទី ៩ មិថុនាកន្លងទៅនេះ បានចេញសេចក្តីណែនាំដល់និស្សិតមុនពេលសាកលវិទ្យាល័យអូស្ត្រាលីបើកដំណើរការឡើងវិញនៅខែកក្កដាខាងមុខនេះ ។ ក្រសួងអប់រំចិនបានលើកឡើងពីការគំរាមកំហែងរបស់ Covid-19 និងការរើសអើងប្រឆាំងនឹងជនជាតិអាស៊ីដែលជាហានិភ័យដែលអាចកើតមាន។
នៅក្នុងសេចក្តីថ្លែងការណ៍មួយបាននិយាយថា «និស្សិតគួរតែមានការប្រុងប្រយ័ត្ននៅពេលជ្រើសរើសទៅ ឬត្រឡប់ទៅអូស្ត្រាលីវិញ» ។ ក្រសួងបាននិយាយនៅក្នុងសេចក្តីថ្លែងការណ៍របស់ខ្លួនបន្ថែមទៀតថា «ការរីករាលដាលនៃជំងឺ Covid-19 ទូទាំងពិភពលោកមិនទាន់ត្រូវបានគ្រប់គ្រងប្រកបដោយប្រសិទ្ធភាពទេ ហើយវាមានហានិភ័យក្នុងការធ្វើដំណើរអន្តរជាតិ និងការបើកទ្វារឡើងវិញនៃសាលារៀនមួយចំនួន » ។
យ៉ាងណាមិញ ការព្រមានធ្វើឡើងបន្ទាប់ពីមានការហេតុការណ៍មិនល្អមួយចំនួនបានកើតឡើងក្នុងអំឡុងពេលឆ្លងរាលដាលនៃវីរុសកូវីដ១៩ ដូចជាមានឧប្បត្តិហេតុរើសអើងជាច្រើនប្រឆាំងនឹងជនជាតិអាស៊ីនៅក្នុងប្រទេសអូស្ត្រាលី ។ការណែនាំប្រឹក្សារបស់ចិនចំពោះជនជាតិចិនដែលចង់វិលត្រឡប់ទៅសិក្សានៅអូស្ត្រាលីនេះធ្វើឲ្យមានននូវការកត់សម្គាល់ពីការកើនឡើងចុងក្រោយនៃភាពតានតឹងរវាងប្រទេសចិននិងអូស្ត្រាលី ដែលរដ្ឋាភិបាលរបស់ពួកគេបានបង្កប់ក្នុងជម្លោះការទូតជាច្រើនក្នុងកំឡុងពេលមានជំងឺរាតត្បាតកូវីដ១៩ ។
ជុំវិញបញ្ហានេះ រដ្ឋមន្ត្រីក្រសួងអប់រំអូស្ត្រាលីលោក Dan Tehan មានប្រសាសន៍ថា « អូស្ត្រាលីគឺជាទិសដៅពេញនិយមសម្រាប់និស្សិតអន្តរជាតិ ពីព្រោះយើងជាសង្គមពហុវប្បធម៌ដែលទទួលបានជោគជ័យដែលស្វាគមន៍និស្សិតអន្តរជាតិនិងផ្តល់ការអប់រំកម្រិតពិភពលោក» ។ លោកបានបន្តថា ភាពជោគជ័យរបស់យើងក្នុងការបង្វែរខ្សែកោងមេរោគមានន័យថាយើងគឺជាប្រទេសមួយដែលមានសុវត្ថិភាពបំផុតនៅលើពិភពលោកសម្រាប់និស្សិតអន្តរជាតិដែលចង់បោះមូលដ្ឋានសិក្សានៅពេលនេះ» ។
ទំនាក់ទំនងរវាងប្រទេសទាំងពីរបានកើតមានភាពតានតឹងជាងមុនចាប់តាំងពីប្រទេសអូស្ត្រាលីបានអំពាវនាវឱ្យមានការសាកសួរឯករាជ្យអំពីប្រភពដើមនៃវីរុសកូវីដ១៩ នេះដែលត្រូវបានគេរកឃើញដំបូងថាវាបានផ្ទុះនូវជំងឺឆ្លងមួយនេះនៅប្រទេសចិនកាលពីចុងឆ្នាំ ២០១៩ ៕
ចែករំលែកព័តមាននេះ