រាជធានីភ្នំពេញ ៖ ក្រសួងសុខាភិបាលនៅព្រឺកថ្ងៃទី១០ ខែមិថុនានេះបានបញ្ជាក់ថា អ្នកជំងឺកូវីដ១៩ ម្នាក់ទៀតហើយបានជាសះស្បើយ ហើយក៏មិនមានករណីវិជ្ជមានវីរុសកូវីដ១៩ថ្មីទេ (គិតត្រឹមថ្ងៃទី៩ ខែមិថុនា) ។
យ៉ាងណាមិញ ក្រសួងសុខាភិបាលបានបញ្ជាក់ថាបងប្អូនត្រូវបន្តប្រុងប្រយ័ត្នខ្ពស់ កុំមានការធ្វេសប្រហែសឲ្យសោះ ព្រោះកូវីដ១៩ នៅគំរាមគំហែងកម្ពុជានៅឡើយ ។
ជាមួយគ្នានោះផងដែរ នាយកដ្ឋានប្រយុទ្ធនឹងជំងឺឆ្លងបានរម្លឹកពលរដ្ឋថា «ជំងឺកូវីដ-១៩ នៅតែបន្តគម្រាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ព្រោះប្រទេសជិតខាងយើងនិងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ» ។
ប្រភពដដែលបានណែនាំថា «យើងត្រូវបន្តអនុវត្តគម្លាតសង្គមបន្តទៀត ដូចជាពន្យាការរៀបអាពាហ៌ពិពាហ៌ ពិធីជប់លៀង ការចាក់ធុងបាសរាំ ។ ល។ យើងត្រូវបន្តគម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា ។ ល។ យើងត្រូវបន្តពាក់ម៉ាស់នៅពេលចាំបាច់ និងឧស្សាហ៍លាងដៃជាមួយសាប៊ូ អាល់កុល ឬជែល »។ សូមបញ្ជាក់ថា ប្រទេសកម្ពុជាបានរកឃើញករណីជំងឺកូវីដ១៩ដំបូងបំផុតនៅថ្ងៃទី ២៧ មករា ២០២០ ។
សូមរម្លឹកផងដែរថា ក្រសួងសុខាភិបាលបានឲ្យដឹងថា «បុរសជានជាតិសខ្មែរ-បារាំងធអាយុ ៣០ឆ្នាំធ្វើដំណើរមកពីប្រទេសបារាំងតាមជើងហោះហើរ ពីសាធារណរដ្ឋកូរ៉េ មកដល់កម្ពុជានៅថ្ងៃទី២៤ ខែឧសភា ឆ្នាំ២០២០ ស្នាក់នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ត្រូវបានជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ១៩ ចំនួន២ដង និងត្រូវបានអនុញ្ញាតឱ្យចេញពីមន្ទីពេទ្យមិត្តភាពខ្មែរ-សូវៀត»។
ក្រសួងបានបន្តថានៅទូទាំងប្រទេសគិតត្រឹមម៉ោង០៧ព្រឹកថ្ងៃទី១០ ខែមិថុនានេះ ចំនួនអ្នកព្យាបាលជាសះស្បើយសរុបទូទាំងប្រទេស មានចំនួន១២៥ នាក់ (ស្មើរនឹង៩៩,២១ ភាគរយ ធៀបនឹងចំនួនអ្នកមានវីរុសកូវីដ១៩ទាំងអស់) នៅក្នុងចំនួននេះមានស្រី ៣៩នាក់ និងបុរស៨៦នាក់ ៕
ចែករំលែកព័តមាននេះ