រាជធានីភ្នំពេញ ៖ នៅទីបំផុតតារាចម្រៀងនាង មាស សុខសោភា បានប្រកាសដើរចេញពីផលិតកម្មថោនជាផ្លូវការហើយ បន្ទាប់ពីតារាចម្រៀងរូបនេះហាក់មិនមានចេញបទថ្មីៗនៅក្នុងផលិតមួយនេះ ស្របពេលកន្លងមក នាងក៏ធ្លាប់បានបង្ហាញសញ្ញាវិជ្ជមានពីការចាកចេញនេះផងដែរ។
មាស សុខសោភា បានប្រកាសពីការចាកចេញនេះជាសាធារណៈតាមបណ្តាញសង្គមហ្វេសប៊ុកផ្លូវការរបស់នាង កាលពីរសៀលថ្ងៃទី៩ ខែមិថុនា ឆ្នាំ២០២០ ខណៈពេលដែលដំណឹងពីការចាកចេញពីកំពូលតារាចម្រៀងមួយនេះ បានធ្វើឲ្យមានការភ្ញាក់ផ្អើល និងបានក្លាយជាវេទិកាដេញដោលគ្នាពីប្រិយមិត្តគាំទ្រជាច្រើនរបស់នាង។
តារារូបនេះបានបង្ហោះសារថា ថ្ងៃ នេះគឺជាថ្ងៃដ៏តានតឹងមួយរបស់នាងខ្ញុំ ដែលនាងខ្ញុំត្រូវចាកចេញពីផលិតកម្ម Town។ អរគុណដល់បងប្រុស បងស្រី ដែលបានមើលថែប្អូនរយៈពេល៩ឆ្នាំនេះ អនុស្សារីយ៍ និងអំពើល្អរបស់បងទាំងពីរនៅតែស្ថិតក្នុងបេះដូងរបស់ប្អូនជានិច្ច។
ឆ្លៀតក្នុងឱកាសនេះ នាងខ្ញុំក៏សូមអរគុណដល់បណ្តាផលិតកម្មទាំងអស់ ដែលបានផ្តល់ឱកាសដល់នាងខ្ញុំនាពេលកន្លងមក ទន្ទឹមនឹងនេះ នាងខ្ញុំក៏សូមស្វាគមន៍ជាថ្មីសម្រាប់ការសហការផលិតបទចម្រៀង ពីបណ្តាផលិតកម្មទាំងអស់ដូចគ្នា។ អរគុណដល់បងប្អូនទាំងអស់ដែលតែងតែគាំទ្រនាងខ្ញុំ ហើយដរាបណាបងប្អូននៅតែគាំទ្រ និងស្រលាញ់នាងខ្ញុំ នោះ នាងខ្ញុំក៏តែបន្តខិតខំប្រឹងប្រែងផលិតនូវបទចម្រៀងថ្មីៗ ដើម្បីបងប្អូនទាំងអស់គ្នាជានិច្ច។
ជាការកត់សម្គាល់ ក្នុងពេលដែល មាស សុខសោភា បានប្រកាសចាកចេញពីផលិតកម្មថោននាពេលនេះក៏ពិតមែន ប៉ុន្តែតារាចម្រៀងរូបនេះ នៅមិនទាន់បញ្ជាក់ទេថា ខ្លួនអាចនឹងទៅជ្រកកោននៅក្នុងផលិតថ្មីមួយណានោះ ខណៈពេលដែលនាងក៏មានបើកផលិតកម្មមួយខ្លួនឯងផងដែរ។
ពាក់ព័ន្ធបញ្ហាខាងលើនេះ បងប្រុសរបស់ មាស សុខសោភា គឺលោក មាស សុខរតនៈ បានអះអាងប្រាប់តាមសារអេឡិចត្រូនិចនៅថ្ងៃទី១០ ខែមិថុនា ឆ្នាំ២០២០ថា រហូតមកដល់ពេលនេះ មាស សុខសោភា នៅមិនទាន់គិតរឿងចូលកន្លែងណាមួយនៅឡើយទេ។
លោកបញ្ជាក់ថា បើទោះបីជាមិនទាន់បានចូលផលិតកម្មណាមួយពិតប្រាកដនោះក៏ដោយ ប៉ុន្តែបច្ចុប្បន្ន មាស សុខសោភា ក៏មានផលិតកម្មមួយផ្ទាល់ខ្លួនផងដែរ គឺផលិតកម្ម CamTrax Music ដែលនាងបានចេញបទចម្រៀងថ្មីៗជាបន្តបន្ទាប់ផងដែរ។
ដោយឡែកពាក់ព័ន្ធករណីថា មាស សុខសោភា អាចនឹងចូលផលិតកម្មហង្សមាសឬយ៉ាងណានោះ? លោក មាស សុខរតនៈ បានលើកឡើងថា ជាធម្មតាយើងជាតារាចម្រៀងមួយរូប នៅពេលដែលចាកចេញពីផលិតកម្មមួយ គឺតែងតែចង់រកផលិតកម្មថ្មីណាមួយទៀតជាធម្មតា។
លោកបញ្ជាក់ថា ការចូលផលិតកម្មហង្សមាសពី មាស សុខសោភា ឬយ៉ាងណានោះ? លោកមិនអាចនិយាយបានមុនឡើយ ប៉ុន្តែលោកហ៊ានធានាអះអាងថា ការចាកចេញពីផលិតថោនរបស់ប្អូនស្រីលោក គឺមិនមែនដោយសារទំនាស់ណាមួយឡើយ ប៉ុន្តែគឺជាការចាកចេញដោយសន្តិវិធីជាធម្មតាមិនមានរឿងអ្វីផ្សេងឡើយ។
បើតាមលោក មាស សុខរតនៈ ថា ការចាកចេញពីថោនរបស់ មាស សុខសោភា នាពេលនេះ គឺគ្រាន់តែជាការផ្លាស់ប្តូរនូវបទពិសោធន៍ថ្មីបន្ថែមទៀត ព្រោះប្អូនស្រីរបស់លោកបានច្រៀងនៅផលិតកម្មថោននេះជាយូរឆ្នាំមកហើយ នោះជាហេតុដែលយើងត្រូវស្វែងរកអ្វីដែលថ្មី កុំឲ្យការងារនៅតែដដែល។
យ៉ាងណាមានការលើកឡើងថា ប្រសិនបើ មាស សុខសោភា ពិតជាបានចូលផលិតកម្មហង្សមាស តាមការគ្រោងទុកមែននោះ ប្រាកដណាស់តារាចម្រៀងរូបនេះអាចនឹងទទួលបានតំណែងនៅក្នុងកម្មវិធីលំដាប់ពិភពលោកណាមួយជាមិនខាន ដោយមិនខុសពីកំពូលតារាចម្រៀងលោក ខេមរៈ សិរីមន្ត នោះឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ