រាជធានីភ្នំពេញ ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈបានព្រមានធ្ងន់ៗថា ក្រសួងនិងសហការជាមួយស្ថាប័នពាក់ព័ន្ធក្នុងការអនុវត្តច្បាប់ ប្តឹងដល់បុគ្គល ឬក្រុមប្រើប្រាស់បណ្តាញសង្គមណាដែលនៅតែបន្តផ្សព្វផ្សាយ សារគ្រប់ទម្រង់ ដែលធ្វើឲ្យប៉ះពាល់ធ្ងន់ធ្ងរដល់វប្បធម៌ ទំនៀបទម្លាប់ ប្រពៃណី អត្តសញ្ញាណ និងកិត្យានុភាពជាតិ។ ក្នុងការប្តឹងនេះ ក្រសួងថា នឹងប្រើប្រាស់ច្បាប់ស្តីពីការការបង្ក្រាបអំពើជូញដូរមនុស្ស និងអំពើធ្វើអាជីវកម្មផ្លូវភេទ។
ក្នុងសេចក្តីណែនាំដែលចេញផ្សាយកាលពីថ្ងៃទី៨ ខែមិថុនា នេះ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្នុងនាមប្រធានក្រុមប្រឹក្សាពិន័យនិងលើកសរសើរ «ឲ្យបញ្ឈប់ជាបន្ទាន់រាល់សកម្មភាពផ្សព្វផ្សាយ គ្រប់រូបភាពជាអក្សរ សំឡេង និងវីដេអូ ណាដែលមានចរិកលក្ខណៈអាកាស ស្រើបស្រាល អុជអាល បំបែកបំបាក់ ប្រកាន់ពូជសាសន៍ ពណ៌សម្បុរ ដែលបង្កឲ្យមានផលប៉ះពាល់ដល់វប្បធម៌ ទមនៀបទម្លាប់ ប្រពៃណី ជំនឿ សាសនា សេចក្តីថ្លៃថ្នូរ និងកិត្យានុភាពរបស់សង្គមជាតិ ចាប់ពីថ្ងៃជូនដំណឹងនោះ» ។
ក្រសួងវប្បធម៌ និងវិចិត្រ បានសង្កេតឃើញថា បច្ចុប្បន្នមានគេហទំព័រ និងបណ្តាញទំនាក់ទំនងសង្គមមួយចំនួន ពិសេសអាជីវករតាមប្រព័ន្ធអនឡាញ អ្នកនិពន្ធបទភ្លេង ទំនុកច្រៀង និងអ្នកសម្តែងក្រៅប្រព័ន្ធបានផ្សព្វផ្សាយរូបភាព សារអក្សរ សារសំឡេង និងវីដេអូដោយអសីញាណ ប្រាស់ចាកក្រមសីលធម៌ បង្កឲ្យមានផលប៉ះពាល់យ៉ាងធ្ងន់ធ្ងរដល់វប្បធម៌ ទមនៀបទម្លាប់ ប្រពៃណី អត្តសញ្ញាណ និងកិត្យានុភាពជាតិ ជារឿងៗ។
លោកស្រី ភឿង សកុណា បានបញ្ជាក់ថា ក្រសួងលោកស្រី នឹងហការជាមួយ ក្រសួងមហាផ្ទៃ ក្រសួងព័ត៌មាន ក្រសួងប្រៃសណីយ៍ និងទូរគមនាគមន៍ ស្ថាប័នពាក់ព័ន្ធ មួយចំនួនទៀត ក្នុងការចាត់ការលើជនណាដែលមិនគោរពតាមការណែនាំនេះ។ ចំណាត់ការរបស់ក្រសួងចុងក្រោយ គឺ ប្តឹង ម្ចាស់គេហទំព័រ និងអ្នកប្រើប្រាស់បណ្តាញទំនាក់ទំនងសង្គមទាំងនោះ តាមបទព្រហ្មទណ្ឌផ្អែកលើច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ៕
ចែករំលែកព័តមាននេះ