ការផ្ទុះជំងឺកូវីដ១៩ បានបង្កឲ្យស្ទើរគ្រប់ផ្នែកនៃពិភពលោកបិទដំណើរការសាលារៀនជាបណ្តោះអាសន្ន និងជំរុញឲ្យមានការរៀនអនឡាញវិញ ។ នៅពាក់កណ្តាលខែមេសា កូវីដ១៩ បានបង្ខំឲ្យ ១៩០ប្រទេសបិទដំណើរការសាលារៀន ដែលប៉ះពាល់ដល់សិស្ស និងនិស្សិតចំនួន ៩០% ដែលស្មើនឹងជិត ១.៦ប៊ីលាននាក់ជុំវិញពិភពលោក ។
ការផ្លាស់ប្តូរនេះ បានបង្កើតនូវឱកាសសម្រាប់វិស័យថ្មីមួយ គឺបច្ចេកវិទ្យាសម្រាប់ការអប់រំ ឬ EdTech ។ វិស័យនេះ ត្រូវបានព្យាករណ៍ថានឹងមានតម្លៃដល់ទៅ ៣៥០ប៊ីលានដុល្លារនៅឆ្នាំ ២០២៥ ខណៈដែលមនុស្សកាន់តែច្រើនរៀនសូត្រអនឡាញវិញ ព្រោះមួយផ្នែកមកពីកំណើនប្រជាជនក្នុងទ្វីបអាស៊ី ។
អ្នកស្រី ប៊ីជូ រ៉ាវីនដ្រាន (Byju Raveendran) ស្ថិតក្នុងចំណោមសហគ្រិនដែលប្រឡូកចូលក្នុងវិស័យនេះមុនគេ ។ អ្នកស្រីបានបង្កើតកម្មវិធីអប់រំ Byju កាលពីឆ្នាំ ២០១៥ ដែលមានវីដេអូអប់រំខ្លីៗសម្រាប់សិស្សកម្រិតបឋមសិក្សា និងអនុវិទ្យាល័យ ។ ជាក់ស្តែង ចំនួនអ្នកប្រើប្រាស់កម្មវិធីនេះ បានកើនឡើងច្រើនជាង ២៥% ទៅទៀតមកស្មើ ៥០លាននាក់បន្ទាប់ពីការផ្ទុះជំងឺកូវីដ ១៩។
លោក ធីម៉ូធី យូ (Timothy Yu) ដែលជាស្ថាបនិក និងនាយកប្រតិបត្តិរបស់កម្មវិធីបង្រៀនអនឡាញSnapask ដែលបច្ចុប្បន្នមានតម្លៃប្រមាណ ២០០លានដុល្លារក៏កំពុងមើលឃើញកំណើននៃចំនួនអ្នកប្រើប្រាស់នៅអាស៊ីដែរ ។
ក្រៅពីគ្រាន់តែមានវីដេអូមេរៀនហើយ កម្មវិធីនេះអនុញ្ញាតឲ្យសិស្ស និងនិស្សិតសួរសំណួរ និងឆ្លើយតបនឹងសំណួររបស់គ្រូបង្រៀនដែរ ។ កម្មវិធីនេះ ថែមទាំងជួយកាត់បន្ថយសម្ពាធលើគ្រូបង្រៀនដោយផ្តល់ការងារនៅផ្ទះដល់គ្រូប្រមាណ ៣០០,០០០នាក់ ។
ជាក់ស្តែង ការអប់រំមិនត្រឹមតែកើតមានឡើងក្នុងសាលារៀន ឬសាកលវិទ្យាល័យទេ ។ ក្នុងសម័យថ្មីនេះ មនុស្សត្រូវបន្តរៀនសូត្រដើម្បីការពារការងារនៅថ្ងៃអនាគត ។ World Economic Forum បានព្យាករណ៍ថា នៅឆ្នាំ ២០២២ ប្រមាណពាក់កណ្តាលនៃបុគ្គលិកទាំងអស់នឹងត្រូវរៀនជំនាញថ្មី ឬពង្រឹងជំនាញខ្លួនឡើងវិញ ដើម្បីអាចបំពេញការងារខ្លួនបាន ។
ដោយហេតុដូចនេះទើបលោក ដេវីដ ប្រេក (David Blake) កំពុងតែប្រើ Learn In ដើម្បីផ្តល់សេវាពង្រឹងជំនាញដល់បុគ្គលិកជុំវិញពិភពលោក ។ Learn In សហការជាមួយនឹងក្រុមហ៊ុន ឬស្ថាប័នការងារក្នុងការសិក្សាពីជំនាញដែលត្រូវការចាំបាច់សម្រាប់ដំណើរការ និងការវិនិយោគដែលពួកគេត្រូវចូលរួម ។ បន្ទាប់មកបុគ្គលិកត្រូវចូលរួមការហ្វឹកហាត់វគ្គខ្លីដោយទទួលបានការធានាថាអាចរក្សាការងារ បន្ទាប់ពីបញ្ចប់ការហ្វឹកហាត់ ៕ ដកស្រង់ចេញពីវេបសាយ ៖ cnbc
ចែករំលែកព័តមាននេះ