ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវពស់វែកទ្រង់រនាមប្រវែងជាង៣ម៉ែត្រ ចឹក បណ្តាលឱ្យបាត់បង់ជីវិត ខណៈពេលជនរងគ្រោះកំពុងដើរព្រៃតែម្នាក់ឯងឃើញពស់ក៏ស្ទុះទៅចាប់ បែរជាត្រូវពស់នោះបកមកចឹកវិញ ហេតុការណនេះកើតហេតុកាលពីរសៀលម៉ោង៥ នៅថ្ងៃទី០៨ ខែមិថុនា ឆ្នាំ២០២០នេះ ស្ថិតក្នុងភូមិសំឡាញ ឃុំត្បែងមួយ ស្រុកសង្គមថ្មី ខេត្តព្រះវិហារ ។
នេះបើតាមការលើកឡើងពីលោកវរសេនីយ៍ទោ ជួន មឿន អធិការដ្ឋាននគរបាលស្រុកសង្គមថ្មី បានឱ្យដឹងថា បុរសរងគ្រោះខាងលើឈ្មោះ យាម តាក់ អាយុ៣៧ឆ្នាំ មុខរបរជាកសិករ រស់នៅភូមិសំឡាញ ឃុំត្បែងមួយ ស្រុកសង្គមថ្មី ខេត្តព្រះវិហារ។
លោកអធិការដ្ឋានបន្តថា ចំពោះមូលហេតុដែលបណ្តាលឱ្យបុរសរងគ្រោះខាងលើត្រូវបាត់បង់ជីវិតនោះ គឺដោយសារតែបុរសរូបនេះបានប្រទះឃើញពស់វែងទ្រង់រនាម១ក្បាល ប្រវែងជាង៣ម៉ែត្រ ហើយខណៈពេលដែលជនរងគ្រោះកំពុងតែដើរក្នុងព្រៃតែម្នាក់ផងនោះ ក៏ស្ទុះទៅចាប់ពស់ ប៉ុន្តែជាអកុសលក៏ត្រូវពស់នោះបកមកចឹកវិញ ។
លោកអធិការបន្តទៀតថា ភ្លាមៗនោះបុរសរងគ្រោះខាងលើ មិនទាន់បាត់បង់ជីវិតភ្លាមនោះទេ គឺក្រោយពេលពស់នោះចឹងហើយ បុរសរងគ្រោះខាងលើក៏បានវាយពស់នោះងាប់ ហើយក៏យកពស់ចេញពីព្រៃ រួចត្រឡប់មកផ្ទះវិញ ដើម្បីឱ្យគេជួយសង្គ្រោះ តែដោយសារតែពិសជ្រៀបពេញខ្លួនទៅហើយ ក៏បានធ្វើឱ្យបុរសរងគ្រោះរូបនោះដាច់ខ្យល់នៅពាក់កណ្តាលផ្លូវតែម្តង បន្សល់ទុកពស់ដែលងាប់កាន់ជាប់ក្នុងដៃជនរងគ្រោះ ។
ក្រោយពេលកើតហេតុ មកដល់ពេលនេះក្រុមគ្រួសារជនរងគ្រោះ បានយកសាកសពបុរសរងគ្រោះខាងលើ មកធ្វើបុណ្យតាមប្រពៃណីផងដែរ ។ (កែសម្រួលដោយ ៖ បុប្ផា)
ចែករំលែកព័តមាននេះ