ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា ប្រជាពលរដ្ឋរស់នៅក្នុងភូមិមួយ ដែលលាយឡំទៅដោយរហូតដល់១០ជនជាតិឯណោះ ដែលគេតែងតែហៅថា «ភូមិ១០៥ថ្នល់កែង» ស្ថិតក្នុងឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។
សេចក្តីរាយការណ៍បន្តថា «ភូមិ១០៥ថ្នល់កែង» នេះគឺជាភូមិមួយដែលបានបង្កើតឡើងដោយតាម៉ុកកាលពីអំឡុងឆ្នាំ១៩៩១ តាមជនបទដាច់ស្រយាលពីទីប្រជំជនស្រុកត្រពាំងប្រាសាទ និងស្រុកអន្លង់វែង ។ ហើយការរស់នៅរបស់ប្រជាពលរដ្ឋប្រកបមុខរបរជាកសិករ។
បើតាមលោកស្រី ប៊ួ ចាន់ណ មេភូមិ១០៥ថ្នល់កែង បានឲ្យដឹងថា ភូមិនេះបានបង្កើតឡើងនៅឆ្នាំ១៩៩១ មានប្រជាពលរដ្ឋរស់នៅ២១២គ្រួសារ ហើយការរស់នៅរបស់ប្រជាជនគឺមានការលាយឡំគ្នាទៅដោយជនជាតិ រហូតទៅដល់១០ជនជាតិ ។ ខណៈនោះមានជនជាតិលាវភាគច្រើន ជនជាតិចារាយ ជនជាតិទំពួន ជនជាតិភ្នង ជនជាតិស្ទៀង ជនជាតិកាវ៉ែត ជនជាតិក្រុង ជនជាតិរដែ ជនជាតិកួយ និងជនជាតិក្រោលជាដើម។
លោកស្រីបានបន្តថា ភូមិ១០៥ថ្នល់កែង នេះ កាលពីធ្វើសមារណកម្មក្នុងឆ្នាំ១៩៩៨ មក ភូមិនេះជួបការលំបាកខ្វះខាតផ្នែកជីវភាព និងផ្លូវថ្នល់ក្នុងការធ្វើដំណើរ ដោយកង់ ឬម៉ូតូទៅកាន់ទីប្រជុំជនស្រុងម្តងៗ ជាពិសេសបញ្ជូនអ្នកជំងឺដោយប្រើប្រាស់អង្រឹងសែង រួចដើរដោយថ្មើជើង។
លោកស្រីបានបញ្ជាក់ថា មកដល់ក្នុងអំឡុងឆ្នាំ២០១៧ និង២០១៨នេះ ទីប្រជុំជនស្រុកអន្លង់វែង និងទីប្រជុំជនស្រុកត្រពាំងប្រាសាទ ហាក់បីដូចជានៅជិតគ្នាបំផុត ខណៈមានការហេដ្ឋារចនាសម្ព័ន្ធផ្លូវក្រាលកៅស៊ូមួយខ្សែ ចូលមកដល់ ភូមិ១០៥ និងផ្លូវក្រាលក្រួសក្រហមជាច្រើនខ្សែយ៉ាងខ្វិតខ្វែង ស្ថិតនៅក្នុងភូមិផងដែរ ទើបធ្វើឱ្យផ្នែកជីវភាពរបស់ប្រជាពលរដ្ឋក្នុងភូមិ ក៏មានភាពធូរធាល្អប្រសើរជាងមុន៕ (កែសម្រួលដោយ ៖ បុប្ផា)
ចែករំលែកព័តមាននេះ