ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា ប៉ូលិសអធិការស្រុកបន្ទាយអម្ពឹល បានសការជាមួយក្រុមហេឡូត្រាស បន្ទាប់ពីទទួលព័តមានពីប្រជាពលរដ្ឋថា ប្រទះឃើញគ្រាប់មីនមិនទាន់ផ្ទុះប្រភេទ ៧២A ចំនួន២៣គ្រាប់ ដែលសេសសល់កាលពីសង្គ្រាមស៊ីវិលដ៏រាំរ៉ៃនៅកម្ពុជា ក្នុងអំឡុងឆ្នាំ៧៩ រហូតមកទល់ឆ្នាំ98 ។
បើតាមពលរដ្ឋដែលប្រទះឃើញមានឈ្មោះ យិន កន ភេទប្រុស អាយុ៥៥ឆ្នាំ រស់នៅភូមិយាយទេព ឃុំបេង ស្រុកបន្ទាយអម្ពឹល បានរៀបរាប់ថា នៅម៉ោង៦ព្រឹក រូបគាត់បានទៅភ្ជួរដីស្រែ លុះនៅម៉ោង៨និង៣០នាទីព្រឹក ក៏ស្រាប់តែប្រទះឃើញគ្រាប់មីនប្រភេទ ៧២A ចំនួន២៣គ្រាប់ នៅត្រង់ចំណុចគោកកឋិនខាងត្បូងភូមិចំងាយ៣គីឡូម៉ែត្រ ក្រោយមកគាត់ក៏បានរាយការណ៍ឱ្យប៉ូលិសចុះទៅពិនិត្យតែម្តង។
លោកអនុសេនីយ៍ឯក ឈឿង ឆប នាយប៉ុស្តិ៍រដ្ឋបាលឃុំបេង បានឱ្យដឹងថា ក្រោយពីបានទទួលព័តមាននេះ លោកបានសហការខាងហេឡូត្រាស ដើម្បីចុះទៅនឹងកន្លែងកើតហេតុពិនិត្យគ្រាប់មីនប្រភេទ ៧២A ដែលសេសសល់ពីសង្គ្រាម ចំនួន២៣គ្រាប់នេះ គឺនៅមានគុណភាពនៅឡើយ ក្រោយពីពិនិត្យរួចលោកក៏បានប្រគល់ទៅឱ្យហេឡូត្រាស ដើម្បីយកទៅកម្ទេចចោលនៅក្នុងថ្ងៃដដែលនោះផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ