ខេត្តកំពង់ឆ្នាំង ៖ ប្រជាពលរដ្ឋជាអ្នកធ្វើចំការដាំដំណាំត្រាវ នៅចុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង បានត្អូញត្អែរថា ឆ្នាំនេះទិន្នផលត្រាវរបស់ពួកគាត់ខូចខាតជាងពាក់កណ្តាល ដោយមិនដឹងពីមូលហេតុឡើយ ទោះបីពួកគាត់បានទាក់ទងរកមន្ត្រីជំនាញជួយដាក់ថ្នាំយ៉ាងណាក្ត…
ខេត្តកំពង់ឆ្នាំង ៖ ប្រជាពលរដ្ឋជាអ្នកធ្វើចំការដាំដំណាំត្រាវ នៅចុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង បានត្អូញត្អែរថា ឆ្នាំនេះទិន្នផលត្រាវរបស់ពួកគាត់ខូចខាតជាងពាក់កណ្តាល ដោយមិនដឹងពីមូលហេតុឡើយ ទោះបីពួកគាត់បានទាក់ទងរកមន្ត្រីជំនាញជួយដាក់ថ្នាំយ៉ាងណាក្ត ីក៏មិនទទួលបានផលដែរ ធ្វើឲ្យពួកគាត់មានការខាតបង់ធនធានយ៉ាងច្រើន ។
ជួបជាមួយកោះសន្តិភាពនៅព្រឹកថ្ងៃទី៨ ខែមិថុនា ឆ្នាំ២០២០ នេះ ប្រជាពលរដ្ឋធ្វើចំការដែលដាំដំណាំត្រាវបានលើកឡើងថា ថ្វីបើដំណាំត្រាវឆ្នាំនេះបានថ្លៃមួយគីឡូក្រាម២៥០០រៀល គឺថ្លៃជាងឆ្នាំមុនក៏ពិតមែន ប៉ុន្តែដំណាំត្រាវបានខូចខាតជាងពាក់កណ្ដាលដោយពុំដឹងមូលហេតុ ។
ស្ត្រីឈ្មោះ ប៊ុត សុផុន មានទីលំនៅភូមិកណ្ដាលបានលើកឡើងថា ថ្ងៃនេះគាត់បានមកស៊ីឈួលសំអាតមើមត្រាវឱ្យឈ្មោះ ហំ ដោយក្នុង១ថ្ងៃបាន៣ម៉ឺនរៀល ។ ស្ត្រីរូបនោះបានបញ្ជាក់ថា គាត់ក៏ជាអ្នកដាំត្រាវម្នាក់ដែរ ប៉ុន្តែគាត់ដាំតិចតួច ហើយទិន្នផលវិញគឺខូចខាតស្ទើរទាំងស្រុង ព្រោះពេលប្រមូលផលបាន១តោន យកមកសំអាត បានតែ៩០គីឡូក្រាមប៉ុណ្ណោះ ព្រោះត្រាវ១មើមបានខូចរលួយជាងពាក់កណ្តាល ហេតុនេះហើយយើងត្រូវចិតយកកន្លែងស្អុយរលួយចេញ ទុកតែសាច់ល្អ ទើបឈ្មួញព្រមទិញ ។ ចំពោះមូលហេតុវិញគាត់មិនបានដឹងនោះទេ ។ កាលពីឆ្នាំកន្លងទៅ មើមត្រាវក្នុង១គីឡូក្រាមតម្លៃ១៤០០រៀល ប៉ុន្តែឆ្នាំនេះឡើងថ្លៃបាន១គីឡូក្រាមតម្លៃ២៥០០រៀល ប៉ុន្តែមើមត្រាវឆ្នាំនេះខូចជាងពាក់កណ្តាល ។
បុរសឈ្មោះ គង់ ថាយ ជាអ្នកជួយសំអាតមើមត្រាវឲ្យគេបានបញ្ជាក់ថា គាត់សង្ស័យថា មូលហេតុមើមត្រាវខូច ប្រហែលមកពីអ្នកចំការប្រើថ្នាំបាញ់សម្លាប់ស្មៅច្រើនពេក ព្រោះឥទ្ឋិពលវាខ្លាំងណាស់ ពេលបាញ់ ហូរចូលទឹកក៏ងាប់ត្រីដែរ ។ ម្ចាស់ចំការដែលគាត់កំពុងជួយសំអាតមើមត្រាវឱ្យនេះឈ្មោះ ហំ ។ កាលពីម្សិលមិញ ពេលគាស់មើមត្រាវសរុប លក់បានតែ១តោន៣០គីឡូក្រាមប៉ុណ្ណោះ លក់បានលុយជាង៣លានរៀល ថ្ងៃនេះម្ចាស់ឈឺលែងមកចំការ ដោយសារបាក់ទឹកចិត្ត ព្រោះខាតដើមទុនច្រើនពេក ។ បើតាមគាត់បានដឹង ម្ចាស់ចំការបានចំណាយប្រាក់ជាង១២លានរៀល ក្នុងការដាំដុះដំណាំត្រាវនាឆ្នាំនេះ ។
ដោយឡែកនៅព្រឹកនោះផងដែរ មានក្រុមឈ្មួញ៣-៤នាក់បានជិះម៉ូតូមកទិញមើមត្រាវដល់ចំការ ដោយពួកគាត់ប្រាប់ថា ពួកគាត់ទិញក្នុងមួយគីឡូក្រាម២៥០០រៀល ដោយក្នុងម្នាក់ទិញ១០០គីឡូក្រាម ហើយបានដឹកយកទៅលក់នៅខេត្តកំពង់ស្ពឺ ដោយបានតម្លៃ៣៥០០ រៀលក្នុងមួយគីឡូក្រាម ដោយក្នុង១ជើង ពួកគាត់ អាចរកចំណូលបាន១០ម៉ឺនរៀលដែរ ៕ (កែសម្រួលដោយ ៖ ធីតា)
ចែករំលែកព័តមាននេះ