រាជធានីភ្នំពេញ៖ លោកឃួង ស្រេង អភិបាលរាជធានីភ្នំពេញ បានលើកឡើងថា ប្រពន្ធ័ប្រឡាយ លូ គឺជាសសៃឈាមយ៉ាងសំខាន់នៃការអភិវឌ្ឍន៏រាជធានីភ្នំពេញ ដូចនេះអាជ្ញាធរត្រូវចុះមើលអោយដល់មូលដ្ឋានរបស់ខ្លួន ក្នុងការបង្ការ…
រាជធានីភ្នំពេញ៖ លោកឃួង ស្រេង អភិបាលរាជធានីភ្នំពេញ បានលើកឡើងថា ប្រពន្ធ័ប្រឡាយ លូ គឺជាសសៃឈាមយ៉ាងសំខាន់នៃការអភិវឌ្ឍន៏រាជធានីភ្នំពេញ ដូចនេះអាជ្ញាធរត្រូវចុះមើលអោយដល់មូលដ្ឋានរបស់ខ្លួន ក្នុងការបង្ការ ទប់ស្កាត់ ការរំលោភយកចំណីផ្លូវ ប្រឡាយ លូ អាងស្តុបទឹក ដើម្បីធ្វើយ៉ាងណា ដោះស្រាយបញ្ហាលិចលង់របស់ប្រជាពលរដ្ឋឲ្យបានល្អប្រសើរ ខណៈរដូវវស្សាបានឈានមកដល់។ នេះជាការលើកឡើងរបស់លោកឃួង ស្រេង នៅក្នុងកិច្ចប្រជុំពាក់ព័ន្ធនឹងវិធានការដោះស្រាយបញ្ហាលិចលង់ដោយទឹកជំនន់ទឹកភ្លៀង នៅសាលារាជធានីភ្នំពេញ នាព្រឹកថ្ងៃទី៨ មិថុនា ២០២០។
លោកឃួង ស្រេង បានលើកឡើងថា តំបន់មួយចំនួនដែលទទួលរងការលិចលង់ដោយទឹកជំនន់ដោយសារតែ ប៉ុន្មានថ្ងៃនេះមានភ្លៀងធ្លាក់ខ្លាំងរហូតដល់កំពស់ទឹក១០៥មីល្លីម៉ែត្រ ដែលធ្វើឲ្យតំបន់មួយចំនួនមានការលិចលង់។ លោកបន្តថា ការលិចលង់នេះ គឺផ្ដើមចេញពីមូលហេតុមួយចំនួនផងដែរ ដូចជា ការរំលោភយកប្រឡាយ ការទុកដាក់សំរាមមិនបានល្អ ធ្វើឲ្យសំរាមហូរចូលទៅក្នុងប្រឡាយ លូជាដើម ។ ជុំវិញបញ្ហានេះ លោកសូមឱ្យអាជ្ញាធរខណ្ឌ សង្កាត់ត្រូវចុះផ្ទាល់ដល់ទីតាំងប្រឈមនៅពេលមានភ្លៀងធ្លាក់ម្ដងៗ គឺទៅធ្វើសកម្មភាពកាយសំរាមចេញពីលូ ប្រឡាយ ដើម្បីធ្វើយ៉ាងណាអោយទឹកហូរបានលឿន ។
លោកឃួង ស្រេង បានបញ្ជាក់ថា ការទុកដាក់សំរាមមិនបានល្អ បណ្ដាលឲ្យហូរចូលទៅក្នុងប្រឡាយ លូនេះ ជាវិធានការចំពោះមុខ អាជ្ញាធររាជធានីភ្នំពេញ និងធ្វើការផាកពិន័យចំពោះប្រជាពលរដ្ឋដែលទុកដាក់សំរាម មិនបានត្រឹមត្រូវ ។ ប៉ុន្តែមុននឹងការអនុវត្តនូវវិធានការផ្អាកពិន័យនេះ ក្នុងនាមយើងជាអាជ្ញាធរត្រូវសម្អាតខ្លួនប្រាណឲ្យបានល្អជាគំរូដល់ប្រជាពលរដ្ឋជាមុនសិន។
លោកបន្តថា បញ្ហាសំរាម បញ្ហាការលិចលង់គឺជារឿងទាំងអស់គ្នា ទាំងប្រជាពលរដ្ឋ និងអាជ្ញាធរ។ ដូច្នេះយើងត្រូវរួមគ្នាសហការគ្នាដើម្បីធ្វើកិច្ចការងារនេះ បើសិនគ្មានការចូលរួមពីប្រជាពលរដ្ឋទេយើងក៏មិនអាចអនុវត្តការងារនេះ បានជោគជ័យដែរ ។
សូមបញ្ជាក់ថា កិច្ចប្រជុំខាងលើនេះធ្វើឡើងដើម្បីឲ្យអាជ្ញាធរមូលដ្ឋាន មន្ត្រីជំនាញសាធារណការលើកឡើងពីបញ្ហាប្រឈមពិភាក្សារួមគ្នា ដើម្បីដោះស្រាយធ្វើយ៉ាងណាឱ្យរាជធានីភ្នំពេញ កាត់បន្ថយការលិចលង់ដោយជំនន់ទឹកភ្លៀងអោយកាន់តែមានភាពប្រសើឡើង ជាពិសេសសម្រាប់រដូវវស្សានេះតែម្តង ៕
ចែករំលែកព័តមាននេះ