សហរដ្ឋអាមេរិក ៖ ក្រុមប្រឹក្សាក្រុងមីនីអាប៉ូលិស Minneapolis កាលពីថ្ងៃអាទិត្យ(ម៉ោងក្នុងតំបន់) បានបោះឆ្នោត ដើម្បីរុះរើនាយកដ្ឋានប៉ូលីសក្នុងទីក្រុងនេះ ដែលក្នុងនោះ អតីតមន្ត្រីប៉ូលិស ៤រូប ត្រូវបានចោទប្រកាន់ពាក់ព័ន្ធនឹងការស្លាប់របស់បុរសស្បែកខ្មៅម្នាក់ ដែលបង្កឱ្យមានការតវ៉ាទូទាំងប្រទេស នេះបើតាមសារព័ត៌មានចិន ស៊ីនហ៊ួរ ។
សមាជិកចំនួន០៩រូប ដែលជាសមាជិកជាន់ខ្ពស់ នៃសមាជិកសភា ដែលមានសមាជិកចំនួន១៣រូបនោះ បានបោះឆ្នោត ដើម្បីរំសាយនាយកដ្ឋានប៉ូលីស Minneapolis ហៅកាត់ MPD ដែលត្រូវបានគេចោទប្រកាន់ជាយូរមកហើយ អំពីការរើសអើងជាតិសាសន៍ ។
កាលពីថ្ងៃអាទិត្យ នៅក្នុងការប្រជុំសហគមន៍ជាមួយសកម្មជន នៅឧទ្យានផានហន ប្រធានក្រុមប្រឹក្សាក្រុង បានមានប្រសាសន៍ថា “ការប្តេជ្ញាចិត្តរបស់យើង គឺបញ្ចប់ការរើសអើងជាតិសាសន៍នៅក្នុងទីក្រុងនេះ ជាមួយនាយកដ្ឋានប៉ូលីស Minneapolis ដូចដែលយើងបានដឹងហើយ ការបង្កើតប្រព័ន្ធសុវត្ថិភាពសាធារណៈ គឺដើម្បីការពារយើងឲ្យមានសុវត្ថិភាព” ។
នៅក្នុងសេចក្តីថ្លែងការណ៍របស់សមាជិកនៃក្រុមប្រឹក្សា បាននិយាយថា “ការខិតខំធ្វើកំណែទម្រង់របស់ប៉ូលីសជាច្រើនទសវត្ស បានបង្ហាញថា នាយកដ្ឋានប៉ូលីស Minneapolis មួយនេះមិនអាចធ្វើកំណែទម្រង់ហើយនិងមិនទទួលខុសត្រូវចំពោះសកម្មភាពរបស់ខ្លួនទៀត” ។
អភិបាលក្រុងមីនីអាប៉ូលិស លោក Jacob Frey បាននិយាយនៅក្នុងសេចក្តីថ្លែងការណ៍មួយថា លោកនឹងធ្វើការឆ្ពោះទៅរកកំណែទម្រង់ និងដោះស្រាយការរើសអើងជាតិសាសន៍ដែលមានលក្ខណៈជាប្រព័ន្ធនៅក្នុងវប្បធម៌ប៉ូលីស ។
អភិបាលក្រុងរូបនេះ បានសង្កត់ធ្ងន់ថា អាជ្ញាធរក្រុងនឹងចូលរួមក្នុង “យុទ្ធសាស្ត្រដឹកនាំដោយសហគមន៍ និងសុវត្ថិភាពសាធារណៈបន្ថែមទៀត” ។
ការសម្រេចចិត្តធ្វើកំណែទម្រង់របស់ក្រុមប្រឹក្សាក្រុង បានកើតឡើង ខណៈពេលមានការតវ៉ា និងអំពាវនាវឱ្យបញ្ចប់អំពើហិង្សារបស់ប៉ូលីស ដែលបានកើតឡើងបន្ទាប់ពីមរណភាពរបស់លោក ចច ផ្លយ កាលពីថ្ងៃទី ២៥ ខែឧសភា ក្រោមកណ្តាប់ដៃមន្ត្រីប៉ូលិស០៤រូប នៃ MPD ដោយមានម្នាក់ក្នុងចំណោមពួកគេ បានលុតជង្គង់លើកញ្ចឹងករបស់ Floyd អស់រយៈពេលជិត៩នាទី ។ មន្ត្រីទាំង៤រូប ត្រូវបានបណ្តេញចេញ ដោយប្រឈមនឹងការចោទប្រកាន់ពីបទព្រហ្មទណ្ឌ ។
មរណភាពរបស់បុរសស្បែកខ្មៅរូបនេះហើយ បានបង្កឱ្យមានការតវ៉ាប្រឆាំងនឹងភាពសាហាវឃោរឃៅរបស់ប៉ូលីស និងភាពអយុត្តិធម៌ពូជសាសន៍ ដែលមិនត្រឹមតែរីករាលដាលពាសពេញសហរដ្ឋអាមេរិកប៉ុណ្ណោះទេ ថែមទាំងបានរាលដាលពាសពេញតំបន់ផ្សេងទៀតនៃពិភពលោកផងដែរ ពិសេសតំបន់អឺរ៉ុប ។
ចំណែកឯអភិបាលរដ្ឋ មីនីសូតា លោក Tim Walz ក៏បានប្រកាសកាលពីថ្ងៃអង្គារសប្ដាហ៍មុន ដែលក្នុងនោះលោកបាននិយាយថានាយកដ្ឋានសិទ្ធិមនុស្សរបស់រដ្ឋមីនីសូតា នឹងបើកការស៊ើបអង្កេតលើគោលនយោបាយនីតិវិធី និងការអនុវត្តន៍របស់នាយកដ្ឋានប៉ូលីស Minneapolis ក្នុងរយៈពេល១០ឆ្នាំកន្លងមកនេះ ។ ដើម្បីកំណត់ថា តើពួកគេបានចូលរួមក្នុងការអនុវត្តការរើសអើងជាប្រព័ន្ធដែរឬទេ ?
ចែករំលែកព័តមាននេះ