រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យ២នាក់ជិះម៉ូតូឌុបគ្នាមកពីទិញគ្រឿងញៀន ដើម្បីយកទៅជក់ ក៏ស្រាប់តែបានជួបនឹងកម្លាំងសមត្ថកិច្ចខណ្ឌសែនសុខ កំពុងជិះល្បាតត្រង់ចំណុចមុខមន្ទីរពេទ្យព្រះកុសុមៈ តាមបណ្ដោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ ធ្វើឲ្យជនសង្ស័យទាំង២នាក់ភ័យស្លន់ស្លោក៏ជិះរត់គេច តែត្រូវសមត្ថកិច្ចជិះដេញតាមពីក្រោយ ដោយឆ្លងកាត់ខណ្ឌទួលគោក ដល់ខណ្ឌឬស្សីកែវ រហូតជនសង្ស័យជិះទៅបុកម៉ូតូ២គ្រឿងទៀត ទើបអាចឃាត់ខ្លួនបាននៅត្រង់ចំណុចខាងក្រោយវត្តឧណ្ណាលោម តាមបណ្ដោយផ្លូវលេខ១៣ ស្ថិតក្នុងសង្កាត់ជ័យជំនះ ខណ្ឌដូនពេញ បង្កឲ្យមានការភ្ញាក់ផ្អើលកាលពីម៉ោង១រំលងអធ្រាត្រឈានចូលថ្ងៃទី៨ ខែមិថុនា ឆ្នាំ២០២០។
សេចក្តីរាយការណ៍បន្តថា ៖ ជនសង្ស័យខាងលើ ១-ឈ្មោះ ខែម ខៃ ភេទប្រុស អាយុ២៣ឆ្នាំ ជាកសិករ ស្នាក់នៅភូមិព្រៃសង្គម ឃុំច្រេះ ស្រុកមេសាង ខេត្តព្រៃវែង ២-ឈ្មោះ ប៊ែត សំបូរ ភេទប្រុស អាយុ១៨ឆ្នាំ ជាកសិករ ស្នាក់នៅភូមិសំពណ៌ ឃុំព្រៃទទឹង ស្រុកមេសាង ខេត្តព្រៃវែង។
តាមប្រភពពីកម្លាំងសមត្ថកិច្ចអន្តរាគមន៍ខណ្ឌសែនសុខ បានប្រាប់ឲ្យដឹងថា នៅមុនពេលកើតហេតុ កម្លាំងសមត្ថកិច្ចបានជិះម៉ូតូល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេងៗដែលអាចកើតឡើងដោយប្រការណាមួយ។ លុះមកដល់ចំណុចខាងលើ ក៏ប្រទះឃើញជនសង្ស័យទាំង២នាក់ជិះម៉ូតូមួយគ្រឿង ម៉ាកស៊ុយស័រគីលែត ពណ៌ក្រហម ពាក់ស្លាកលេខ ព្រៃវែង 1O-6107 គួរឲ្យសង្ស័យ សមត្ថកិច្ចក៏ហៅឲ្យឈប់ ដើម្បីធ្វើការឆែកឆេរត្រួតពិនិត្យ។
សមត្ថកិច្ចបន្តថា ខណៈពេលនោះ ជនសង្ស័យក៏ធាក់ម៉ូតូរបស់សមត្ថកិច្ច រួចព្យាយាមជិះរត់គេចខ្លួន តែត្រូវកម្លាំងសមត្ថកិច្ចជិះដេញតាមពីក្រោយ។ ដោយជនសង្ស័យជិះម៉ូតូរត់គេចឆ្លងចូលទៅខណ្ឌទួលគោក និងខណ្ឌឬស្សីកែវ បង្កឲ្យមានការភ្ញាក់ផ្អើលដល់កម្លាំងសមត្ថកិច្ចខណ្ឌចេញមកជួយចាំស្ទាក់ចាប់ផងដែរ។ បន្ទាប់មកជនសង្ស័យក៏ជិះរត់បន្តឆ្លងចូលទៅខណ្ឌដូនពេញទៀត តាមបណ្ដោយផ្លូវលេខ១៣ពីជើងទៅត្បូង និងក្នុងល្បឿងយ៉ាងលឿន។
សមត្ថកិច្ចបន្តទៀតថា លុះមកដល់ចំណុចកើតហេតុ ដោយជនសង្ស័យភ័យស្លន់ស្លោរក៏ជ្រុលទៅបុកពីក្រោយម៉ូតូចំនួន២គ្រឿង ដោយមួយគ្រឿងម៉ាក ZOOMER-X ពណ៌សលាយទឹកក្រូច ពាក់ស្លាកលេខ ភ្នំពេញ1GW-8281 ដែលបើកដោយបុរសម្នាក់បណ្តាលឲ្យរងរបួសស្រាល រីឯម៉ូតូរងការខូចខាតផ្នែកខាងក្រោយ។ ចំណែកមួយគ្រឿងទៀត ម៉ាកសង់ប៉ិច ពណ៌ខ្មៅ ពាក់ស្លាកលេខ ភ្នំពេញ1BF-5219 បើកដោយបុរសម្នាក់របួសស្រាល ឯម៉ូតូខូចខាតបន្តិចបន្តួច។ ដោយឡែកម៉ូតូរបស់ជនសង្ស័យវិញខូចខាតយ៉ាងដំណំ ចំណែកជនសង្ស័យទាំងពីរ ក៏ត្រូវបានសមត្ថកិច្ចចាប់ក្របួចភ្លាមៗតែម្ដង។
នៅចំពោះមុខសមត្ថកិច្ចជនសង្ស័យទាំងពីរនាក់ឆ្លើយសារភាពថា ពួកគេទើបតែមកពីលេងផ្ទះម្តាយនៅឯភ្នំពេញ ហើយក៏ចង់ត្រឡប់ទៅផ្ទះនៅឯខេត្តព្រៃវែងវិញនៅព្រឹកស្អែក ប៉ុន្តែមុនពេលទៅផ្ទះវិញ ខ្លួនក៏ឆ្លៀតនាំគ្នាមកទិញគ្រឿងញៀននៅម្តុំបឹងឈូក ចំនួន៤ម៉ឺនរៀល ប៉ុន្តែទិញយកទៅមិនទាន់នឹងបានជក់ផង ក៏ជិះមកជួបជាមួយនឹងសមត្ថកិច្ចល្បាត ហើយដោយសារតែពួកគេភ័យស្លន់ស្លោពេក ក៏បោះចោលថ្នាំញៀន រួចជិះរត់ពីសមត្ថកិច្ចតែម្ដង។
បច្ចុប្បន្នជនសង្ស័យទាំងពីរនាក់ រួមទាំងវត្ថុតាំង និងម៉ូតូរបស់ជនរងគ្រោះចំនួន២គ្រឿងត្រូវកម្លាំងសមត្ថកិច្ចដឹកបញ្ជូនទៅអធិការដ្ឋាននគរបាលខណ្ឌសែនសុខ ដើម្បីសាកសួរ និងកសាងសំណុំរឿង រង់ចាំធ្វើការចាត់ការទៅតាមនីតិវិធីជាបន្តទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ