យោងទៅតាមលោកមហាសេដ្ឋី ហ្គូតាំ អាដានី (Gautam Adani) បានឲ្យដឹងថា ប្រទេសឥណ្ឌានឹងក្លាយជាមជ្ឈមណ្ឌលនៃការចាយវាយ និងផលិតកម្ម ព្រមទាំងការផ្គត់ផ្គង់សេវាកម្មក្នុងរយៈពេលប៉ុន្មានទសវត្សរ៍ខាងមុខនេះ ហើយពេលនេះជាពេលល្អបំផុតក្នុងការជឿលើប្រទេសឥណ្ឌាផងដែរ ។
ការលូតលាស់សេដ្ឋកិច្ចរបស់ឥណ្ឌាបានធ្លាក់ចុះមកស្មើ ៤.២% កាលពីឆ្នាំមុន ហើយភ្នាក់ងារព្យាករណ៍អន្តរជាតិបានឲ្យដឹងថា ផលិតផលក្នុងស្រុកសរុបរបស់ឥណ្ឌា នឹងបន្តធ្លាក់ចុះក្នុងឆ្នាំនេះដែរ ព្រោះតែការផ្ទុះជំងឺកូវីដ ១៩ ។
ក្នុងការចែករំលែកមតិ លោក អាដានី បាននិយាយថា ពួកយើងត្រូវតែយល់ថា មិនមានគំនិតអ្វីដែលខុស និងត្រូវទាំងស្រុងទេ ។ ស្ថានការនេះ ត្រូវការរដ្ឋាភិបាលដែលអាចធ្វើការសម្រេចចិត្តដយោងទៅតាមព័ត៌មានដែលមានស្រាប់ និងអាចសម្របខ្លួនទៅតាមព័ត៌មានថ្មីៗដែលកើតចេញមក ។
លោកបានបន្តថា ប្រទេសដែលមានធនធានច្រើនកំពុងតែជួបការលំបាក ខណៈដែលប្រទេសឥណ្ឌាបានធ្វើល្អក្នុងការទប់ស្កាត់ការរាតត្បាតជំងឺនេះ ។
លោក អាដានី ដែលជាម្ចាស់ក្រុមហ៊ុនគ្រប់គ្រងហេដ្ឋារចនាសម្ព័ន្ធសំខាន់ៗក្នុងប្រទេសឥណ្ឌាដូចជាកំពង់ផែ និងអគ្គិសនី បានឲ្យដឹងថា មិនមាននរណាអាចបដិសេធថា ឥណ្ឌានឹងក្លាយជាទីផ្សារដ៏ធំមួយក្នុងរយៈពេលប៉ុន្មានទសវត្សខាងមុខទេ ។ លើសពីនេះទៅទៀត លោកបានបន្ថែមថាវិបត្តិបច្ចុប្បន្ននេះនឹងបង្កើតឱកាស និងអាជីវកម្មថ្មីៗដែលជួយដល់ការលូតលាស់របស់ប្រទេស ។
លោកបានបន្តថា អ្នកដែលជោគជ័យ គឺជាអ្នកដែលដឹងថា ភាពរឹងមាំកើតឡើងចេញពីច្រកម្ខាងនៃវិបត្តិ ហើយពួកយើងកំពុងតែត្រៀមខ្លួនសម្រាប់វា ។ ក្រុមហ៊ុនទាំង ៦ របស់លោកមិនមានបញ្ហាធំដុំទេតាំងពីការផ្ទុះជំងឺកន្លងមក ។
លោកបានបន្ថែមថា Adani Group កំពុងតែផ្តោតស្មារតីលើការបង្កើនប្រសិទ្ធភាពនៃការប្រើប្រាស់មូលធន កែច្នៃរចនាសម្ព័ន្ធ ដើម្បីកាត់បន្ថយហានិភ័យក្នុងអាជីវកម្ម និងវិនិយោគលើការដំណើរការក្រុមហ៊ុនជាដំណាក់កាល ៕ ដកស្រង់ចេញពីវេបសាយ ៖ economictimes
ចែករំលែកព័តមាននេះ